Kapitulo 20

Unsay Akong Himoon Kon Pobre ang Akong Pamilya?

Si Gregory, nga taga-Sidlakang Uropa, dili makapalit ug besti o elektronikong gamit nga nabatonan sa ubang batan-on sa Kasad-pan. Wala siya malipay sa iyang kinabuhi mao nga nakahunahuna siya sa pag- balhin sa Austria. Sa imong tan-aw, pobre ba si Gregory?

□ Oo □ Dili

Sa laing bahin sa kalibotan, dunay batan-on nga ginganlag Loyiso nga nagpuyo sa usa ka baryo sa habagatang Aprika. Kay payag man siyag balay, nasina si Loyiso sa mga batan-on sa silingang lungsod kay maayo silag pagkabutang. Ang ilang balay dunay gripo sa tubig ug koryente. Makaingon ka ba nga pobre si Loyiso?

□ Oo □ Dili

KLARO nga ang pulong “pobre” lahi ug kahulogan sa nagkalainlaing kayutaan. Pananglitan, para kang Gregory pobre kaayo siya, apan kon itandi kang Loyiso, mas maayo siyag pagkabutang. Angay kang mahibalo nga bisag unsa ka pa ka pobre, dunay mas pobre pa gyod nimo. Apan bisan pag tinuod na, dili gihapon ka malipay kon wala kay tarong nga besti ug wala moy gripo sa balay.

Para sa ubang mga batan-on nga nagdakong pobre, sila makaluluoy ug way nahot, ug ilang lingawon ang ilang kaugalingon pinaagi sa paghubog-hubog o pagdroga. Apan kini makapasamot lang sa ilang kaguol. Ang palainom nahibalo nga ang makahubog nga ilimnon “mamaak ingon sa usa ka halas, ug magabuga ug hilo  ingon sa usa ka bitin.” (Proverbio 23:32) Ang pobreng tin-edyer nga si Maria nga taga-Habagatang Aprika ug usa rag ginikanan miingon, “Kon ipaagi nimo ug paghubog-hubog ang imong kalisod, ang imong problema madugangan hinuon.”

Tingali dili ka maghubog-hubog o magdroga, apan para nimo morag wala nay paglaom nga moarang-arang pa ang imong kahimtang. Asa ka man modangop? Ang maalamong tambag sa Bibliya samag yawi nga makapalingkawas kanimo sa pagkawalay paglaom, nga makatabang kanimo sa pag-ugmad ug positibong tinamdan. Atong susihon kon sa unsang paagi kini makatabang kanimo.

Hunahunaa Kon Unsay Imong Nabatonan

Usa ka importanteng lakang nga imong mahimo mao ang paghunahuna, dili sa mga butang nga wala nimo mabatoni, kondili sa kon unsay imong nabatonan. Ang pagbaton ug mahigugmaong pamilya nga kadangpan mas importante kay sa kuwarta! Ang sanglitanan sa Bibliya nag-ingon: “Maayo pa nga magkaon ug pulos utan, apan puno sa pagmahal kay sa mokaog pulos karne sa baka, apan kasilag ang kanunay nga kauban.” (Proverbio 15:17, Bibliya sa Kristohanong Katilingban) Ang Kristohanong mga batan-on dunay nabatonan nga mas bililhon​—ang mahigugmaong pagpaluyo sa ‘mga kaigsoonan.’​—1 Pedro 2:17.

Lantawa sa positibong paagi ang materyal nga mga butang nga imong nabatonan. Ingnon ta nga nagpuyo ka sa ordinaryong balay o kaha sa barong-barong. Tingali nagsul-ob kag daan, gision, o tinapakan nga sinina. Ug gusto sab kang makatilaw ug lainlaing klase sa pagkaon. Apan nagkinahanglan ka ba gayod ug sinina nga sunod sa uso o nindot nga balay aron makapahimuot sa Diyos? Nagkinahanglan ka bag lamiang mga pagkaon aron mabuhi ug makabatog maayong panglawas? Dili. Si apostol Pablo  nakakat-on ug hinungdanon kaayong leksiyon bahin niana. Siya nakasulay ug haruhay ug pit-os nga kinabuhi. (Filipos 4:12) Ang iyang konklusyon? “Angay kitang magmakontento kon duna kitay makaon ug ikabesti.”​—1 Timoteo 6:8, Today’s English Version.

Si Eldred nga taga-Habagatang Aprika nga nagdako nga pobre miingon: “Gidawat na lang namo nga apeke sa panalapi ang among pamilya ug nga dili namo mapalit ang tanan namong gusto.” Si Eldred nahinumdom nga gisigehag tapak sa iyang inahan ang iyang gisiong karsones! “Gisulog-sulog ko ug giagwanta na lang nako kini,” matod pa ni Eldred. “Ang importante limpiyo ang among sinina ug magamit pa.”

Ugmara ang Imong Pagtahod sa Kaugalingon

Si James, nga nag-edad ug 11, nagpuyo uban sa iyang inahan ug sa iyang manghod nga babaye sa eskuwater duol sa Johannesburg, sa Habagatang Aprika. Halos wala gayod silay nabatonang kabtangan. Apan si James dunay nabatonan nga bililhon​—panahon ug kusog—​ug gigamit niya kini sa pagtabang sa uban. Sa matag kataposan sa semana, si James moboluntaryo sa pagtukod ug Kingdom Hall sa mga Saksi ni Jehova sa ilang lugar. Maglaay gyod unta siya kon  wala pa siya moboluntaryo kay ang pagboluntaryo nakapabati kaniya nga may nahimo siyang mapuslanon ug nakaugmad pa siyag pagtamod sa kaugalingon. “Gaan kaayo ang akong panimati human sa tibuok adlaw nga pagtrabaho sa proyekto!” siya miingon.

Laing mapuslanong kalihokan mao ang pagsangyaw. (Mateo 24:14) Ang mga batan-ong Saksi ni Jehova regular nga nakigbahin nianang buluhatona. Pinaagi sa ilang pagsangyaw ilang gihatagan ang uban ug paglaom nga makabaton ug mas maayong kinabuhi sa umaabot, ug kini nakahatag kanilag dugang pagtahod sa kaugalingon ug dignidad. Bitaw, wala silay madawat nga suweldo niining buluhatona. Apan hinumdomi ang mensahe ni Jesus ngadto sa mga Kristohanon sa karaang kongregasyon sa Smirna. Bisag apeke sila, tungod sa ilang debosyon sa Diyos, si Jesus nakaingon kanila: ‘Nahibalo ako sa inyong kasakitan ug kakabos​—apan kamo dato.’ Tungod sa ilang pagpasundayag ug pagtuo sa giula nga dugo ni Jesus, sila maadunahan unya kaayo  kay ilang madawat ang purong-purong nga kinabuhing walay kataposan.​—Pinadayag 2:9, 10.

Magmalaomon

Makabaton kag suod nga relasyon kang Jehova dato ka man o kabos. Ang Bibliya nag-ingon: ‘Walay kalainan ang dato ug ang kabos kay ang Magbubuhat nilang tanan mao si Jehova.’ (Proverbio 22:2) Ang pagkahimong suod kang Jehova nakatabang sa libolibong batan-ong mga Saksi ni Jehova sa pagsagubang sa kawalad-on. Sila nahibalo nga ang kalipay wala magdepende sa pagbaton ug materyal nga mga butang kondili sa pagkahimong higala ni Jehova nga Diyos, kinsa malipay sa pagbaton ug mga higala nga nagtinguha sa pag-alagad kaniya. Ang Diyos nagsaad ug kinabuhi diha sa usa ka bag-ong kalibotan diin wala nay mag-ilaid sa kakabos.​—2 Pedro 3:13; Pinadayag 21:3, 4.

Sa pagkakaron, gamitag maayo ang imong kusog ug ang imong panahon. Magmalaomon. Pagtigom ug espirituwal nga mga bahandi. (Mateo 6:19-21) Isipa ang kawalad-on ingong hagit nga imong malahutay!

TEKSTO

“Bisag ang usa ka tawo adunay kadagaya ang iyang kinabuhi wala magagikan sa mga butang nga iyang gipanag-iya.”​—Lucas 12:15.

SUGYOT

Ayaw pagpanugal, pagpanigarilyo, ug pag-inom-inom. Kon nagbisyo ang ubang mga sakop sa pamilya, pagpakitag maayong sulondan kanila pinaagi sa imong maayong paggawi.

NAHIBALO KA BA . . . ?

Ang pagpadapat sa mga prinsipyo sa Bibliya makatabang kanimo nga magmakontento bisan pa sa imong kahimtang.​—Filipos 4:12, 13; 1 Timoteo 6:8; Hebreohanon 13:5.

ANG AKONG PLANONG HIMOON!

Kini ang akong nabatonan ․․․․․

Kini ang akong himoon aron kining akong nabatonan akong magamit sa pagtabang sa uban ․․․․․

Kon unsay akong gustong ipangutana sa akong ginikanan bahin niini ․․․․․

UNSAY IMONG HUNAHUNA?

● Nganong lainlain ug kahulogan ang pulong “pobre”?

● Nganong dili maayong magdroga, maghubog-hubog, o mogamit ug ubang mga substansiya sa pagkalimot sa kalisod?

● Unsang praktikal nga mga lakang ang imong mahimo aron makasagubang ka sa kakabos?

[Blurb sa panid 168]

“Bisag sa akong tan-aw dili na gyod ako makahaw-as gikan sa kakabos, nahibalo ako nga dili gayod solusyon ang pag-anib ug gang o pagpangawat. Karon, daghan niadtong sama nakog edad nga mihimo niini nangundang sa pag-eskuyla, nangahimong palainom ug mga adik, o nangapriso.”​—George

 [Kahon/​Mga hulagway sa panid 164]

Maayo Kahang Mobalhin Ko sa Laing Nasod?

Ang ubang mga batan-on gustong mobalhin sa laing nasod aron makasapi o makasustento sa ilang pamilya. Ang uban mobalhin aron magtuon ug laing pinulongan, makapadayon sa ilang pag-eskuyla, o makalingkawas sa mga problema sa panimalay. Ang ubang Kristohanong mga batan-on mibalhin sa kayutaan nga nagkinahanglan ug daghang magwawali. Ang pagdesisyon sa pagbalhin sa laing nasod dili lalim ug kinahanglang hunahunaon ug maayo. Busa kon nagplano kang mobalhin sa laing nasod, basaha ug palandonga ang mga teksto sa ubos. Isukna sa imong kaugalingon ang mga pangutana sa ubos, ug isulat ang imong tubag diha sa usa ka papel. Dayon iampo kini.

◻ Unsa may gipangayo sa gobyerno aron makabalhin ka sa laing nasod?​—Roma 13:1.

◻ Pilay magasto sa pagbalhin ngadto sa laing nasod?​—Lucas 14:28.

◻ Unsay akong gihimo karon nga nagpamatuod nga makasustento ako sa akong kaugalingon kon tua na ako didto?​—Proverbio 13:4.

◻ Unsay gitambag kanako sa mga hamtong nga nagpuyo sa laing nasod?​—Proverbio 1:5.

◻ Unsay hunahuna sa akong ginikanan bahin niini?​—Proverbio 23:22.

◻ Unsay akong tuyo sa pagbalhin sa laing nasod?​—Galacia 6:7, 8.

◻ Kon moipon kog puyo sa uban, modasig kaha sila nako sa pagpabiling aktibo sa buluhaton sa Diyos?​—Proverbio 13:20.

◻ Unsang mga kapeligrohan sa moral, pisikal, ug sa espirituwal ang akong maatubang?​—Proverbio 5:3, 4; 27:12; 1 Timoteo 6:9, 10.

◻ Unsang mga benepisyo ang akong madahom kon magpuyo ako sa laing nasod?​—Proverbio 14:15.

[Hulagway sa panid 167]

Ang tambag sa Bibliya samag yawi nga makapalingkawas kanimo sa pagkawalay paglaom