Kapitulo 10

Gingharian sa Diyos Nagmando Na

1, 2. Sa unsang paagi ang tawhanong mga kagamhanan napamatud-ang walay katakos?

 TINGALI nakaeksperyensiya ka nga nakapalit ug usa ka kasangkapan, sa pagdiskobre lamang nga kana dili moandar. Ibutang nato nga mitawag ka ug tig-ayo. Hinunoa, wala madugay human niya “ayoha” ang kasangkapan, nadaot kini. Pagkamakapahigawad kadto!

² Susama kini sa tawhanong mga kagamhanan. Ang katawhan dugay nang nangandoy ug kagamhanan nga makapatunghag kalinaw ug kalipay. Apan, ang dakong mga paningkamot sa pag-ayom-ayom sa mga kadaot sa katilingban wala gayod molampos. Daghan kaayong mga tratado sa kalinaw ang nahimo​—ug dayon wala tumana. Dugang pa, unsang kagamhanan ang nakawagtang sa kawalad-on, pagpihig, krimen, sakit, ug kadaot sa ekolohiya? Ang pagmando sa tawo dili na matabang. Bisan ang maalamong Haring Solomon sa Israel misukna: “Kon bahin sa yutan-ong tawo, sa unsang paagi masabtan niya ang iyang dalan?”​—Proverbio 20:24.

3. (a) Unsay tema sa pagpangwali ni Jesus? (b) Sa unsang paagi gihubit sa pila ka tawo ang Gingharian sa Diyos?

³ Ayawg wad-a ang paglaom! Ang usa ka dili-matarog tibuok kalibotang kagamhanan dili lamang usa ka damgo. Kini mao ang tema sa pagsangyaw ni Jesus. Gitawag niya kini ug “ang gingharian sa Diyos,” ug iyang gitudloan ang iyang mga sumusunod sa pag-ampo alang niana. (Lucas 11:2; 21:31) Natural, ang Gingharian sa Diyos usahay mahisgotan sa relihiyosong mga pundok. Gani, minilyon ang nag-ampo alang niana kada adlaw sa dihang mosumay sila sa Pag-ampo sa Ginoo (gitawag usab ug Amahan Namo o modelong pag-ampo). Apan ang mga tawo lainlain ug tubag sa dihang pangutan-on, “Unsay Gingharian sa Diyos?” Ang  pipila moingon, “Anaa kana sa imong kasingkasing.” Ang uban nagtawag niana nga langit. Ang Bibliya naghatag ug tin-awng tubag, ingon sa atong makita.

USA KA GINGHARIAN NGA DUNAY KATUYOAN

4, 5. Nganong gipili ni Jehova nga mopatunghag bag-ong kapahayagan sa iyang pagkasoberano, ug unsay malampos niini?

⁴ Si Jehova nga Diyos sa tanang panahon maoy Hari, o Soberanong Magmamando, sa uniberso. Ang kamatuoran nga iyang gilalang ang tanang butang nagbayaw kaniya ngadto sa hataas nga posisyon. (1 Cronicas 29:11; Salmo 103:19; Buhat 4:24) Apan ang Gingharian nga gisangyaw ni Jesus maoy kaabag, o ikaduha, sa unibersohanong soberanya sa Diyos. Kanang maong Mesiyanikong Gingharian adunay espisipikong katuyoan, apan unsa kana?

⁵ Ingon sa gipatin-aw sa Kapitulo 6, ang unang tawhanong magtiayon mialsa batok sa awtoridad sa Diyos. Tungod sa mga isyu nga gipasiugda, si Jehova mipili sa pagpatunghag bag-ong kapahayagan sa iyang pagkasoberano. Gipahibalo sa Diyos ang iyang katuyoan sa pagpatunghag usa ka “binhi” nga magadugmok sa Serpente, si Satanas, ug magwagtang sa mga epekto sa gipanunod nga sala sa katawhan. Ang pangunang “binhi” mao si Jesu-Kristo, ug “ang gingharian sa Diyos” mao ang ahensiya nga sa bug-os maglaglag kang Satanas. Pinaagi niining Ginghariana, ipasig-uli ni Jesu-Kristo ang pagmando ibabaw sa yuta sa ngalan ni Jehova ug magbindikar sa angay nga pagkasoberano sa Diyos sa tanang panahon.​—Genesis 3:15; Salmo 2:​2-9.

6, 7. (a) Asa ang Gingharian, ug kinsa ang Hari ug ang iyang kauban nga mga magmamando? (b) Kinsay mga sakop sa Gingharian?

⁶ Sumala sa usa ka hubad sa mga pulong ni Jesus ngadto sa daotang mga Fariseo, siya miingon: “Ang gingharian sa Diyos anaa ra sa taliwala ninyo.” (Lucas 17:​21, King James Version) Gipasabot ba ni Jesus nga ang Gingharian anaa sa daotang mga kasingkasing niadtong dunot nga mga tawo? Wala. Ang mas tukmang hubad sa orihinal nga Grego mabasa: “Ang gingharian sa Diyos anaa sa inyong taliwala.” (Bag-ong Kalibotan nga Hubad) Si Jesus, nga didto sa ilang taliwala, sa ingon naghisgot sa iyang kaugalingon ingong ang umaabot nga Hari. Halayo sa pagkahimong usa ka butang nga anaa sa kasingkasing sa usa ka tawo, ang Gingharian sa Diyos maoy tinuod, nagalihok nga kagamhanan nga dunay  magmamando ug mga sakop. Usa kini ka langitnong kagamhanan, tungod kay kini gitawag “ang gingharian sa mga langit” ug “ang gingharian sa Diyos.” (Mateo 13:11; Lucas 8:10) Sa panan-awon, ang propetang si Daniel nakakita sa Magmamando niini ingong “usa nga sama sa anak sa tawo” nga gidala sa atubangan sa Diyos nga Labing Gamhanan ug gihatagan ug dumalayong “pagmando ug kahalangdon ug gingharian, nga ang tanang katawhan, mga nasod ug mga pinulongan manag-alagad kaniya.” (Daniel 7:​13, 14) Kinsa ang maong Hari? Aw, ang Bibliya nagtawag kang Jesu-Kristo “ang Anak sa tawo.” (Mateo 12:40; Lucas 17:26) Oo, gitudlo ni Jehova ang iyang Anak, si Jesu-Kristo, nga mahimong Hari.

⁷ Si Jesus wala mag-inusara sa pagmando. Uban kaniya maoy 144,000 nga “gipalit gikan sa yuta” aron mahimong kauban niyang mga hari ug mga saserdote. (Pinadayag 5:​9, 10; 14:​1, 3; Lucas 22:​28-30) Ang mga sakop sa Gingharian sa Diyos mao unya ang tibuok-yutang banay sa mga tawo nga mapinasakopon sa pagpanguna ni Kristo. (Salmo 72:​7, 8) Apan, sa unsang paagi kita makatino nga ang Gingharian sa pagkatinuod magbindikar sa pagkasoberano sa Diyos ug magpasig-uli sa paraisonhong mga kahimtang sa atong yuta?

ANG KATINUORAN SA GINGHARIAN SA DIYOS

8, 9. (a) Sa unsang paagi mahimo natong ikailustrar ang pagkakasaligan sa mga saad sa Gingharian sa Diyos? (b) Nganong makatino kita sa katinuoran sa Gingharian?

⁸ Handurawa nga naugdaw sa usa ka sunog ang imong balay. Karon usa ka may-ikasarang nga higala misaad nga motabang sa pagpatindog pag-usab sa imong balay ug pagtaganag pagkaon alang sa imong pamilya. Kon kanang maong higala kanunay nga matinud-anon kanimo, dili ka ba motuo kaniya? Pananglit mipauli ka gikan sa trabaho pagkasunod adlaw ug nakita nga ang mga trabahante nagsugod na sa paghinlo sa mga salin sa sunog ug nadad-an nag pagkaon ang imong pamilya. Walay duhaduha nga mosalig ka sa bug-os nga ngadtongadto, dili lamang mapasig-uli ang mga butang kondili mahimo pa ganing mas maayo kay sa nangagi.

⁹ Sa susama, si Jehova nagpasalig kanato sa katinuoran sa Gingharian. Ingon sa gipakita sa basahong Hebreohanon sa Bibliya,  daghang bahin sa Balaod ang naglandong sa kahikayan sa Gingharian. (Hebreohanon 10:1) Ang matagnaong mga hulagway sa mga kahimtang unya sa Gingharian sa Diyos nadayag usab sa yutan-ong gingharian sa Israel. Dili kadto ordinaryong kagamhanan, tungod kay ang mga magmamando naglingkod sa “trono ni Jehova.” (1 Cronicas 29:23) Dugang pa, gitagna usab: “Ang setro dili mopahilayo kang Juda, ni ang sungkod sa pangulo gikan sa tunga sa iyang mga tiil, hangtod moabot ang Shilo; ug maiya ang pagkamasinugtanon sa mga katawhan.” (Genesis 49:10) a Oo, ngadto niining harianong kaliwatan ni Juda nga matawo si Jesus, ang permanenteng Hari sa kagamhanan sa Diyos.​—Lucas 1:​32, 33.

10. (a) Kanus-a gipahiluna ang pundasyon sa Mesiyanikong Gingharian sa Diyos? (b) Unsang mahinungdanong buluhaton ang gipangunahan sa umaabot nga isigkamagmamando ni Jesus sa yuta?

¹⁰ Ang pundasyon sa Mesiyanikong Gingharian sa Diyos gipahiluna pinaagi sa pagpili ni Jesus sa mga apostol. (Efeso 2:​19, 20; Pinadayag 21:14) Kini sila ang unang membro sa 144,000 nga momando sa langit ingong kaabag nga mga hari uban ni Jesu-Kristo. Samtang dinhi sa yuta, kining umaabot nga mga isigkamagmamando manguna sa kampanya sa pagpanaksi, nga nahiuyon sa sugo ni Jesus: “Panglakaw . . . ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu.”​—Mateo 28:19.

11. Sa unsang paagi ang pagwali-sa-Gingharian nga buluhaton ginahimo karong adlawa, ug unsay ginapalampos niini?

¹¹ Ang sugo sa paghimog mga tinun-an ginatuman karon sa sukod nga walay ikatanding. Ang mga Saksi ni Jehova nagamantala sa maayong balita sa Gingharian sa tibuok kalibotan, uyon sa matagnaong mga pulong ni Jesus: “Kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.” (Mateo 24:14) Ingong usa ka bahin sa pagwali-sa-Gingharian nga buluhaton, usa ka dakong edukasyonal nga programa  ang ginahimo. Kadtong nagpasakop sa mga balaod ug mga prinsipyo sa Gingharian sa Diyos nakaeksperyensiya na sa kalinaw ug panaghiusa nga dili makab-ot sa tawhanong mga kagamhanan. Kining tanan naghatag ug tin-awng ebidensiya sa katinuoran sa Gingharian sa Diyos!

12. (a) Nganong haom nga tawgong mga Saksi ni Jehova ang mga magmamantala sa Gingharian? (b) Sa unsang paagi nalahi ang Gingharian sa Diyos gikan sa tawhanong mga kagamhanan?

¹² Giingnan ni Jehova ang mga Israelinhon: “Kamo mao ang akong mga saksi, . . . ang akong alagad nga akong napili.” (Isaias 43:​10-12) Si Jesus, “ang Matinumanong Saksi,” masibotong nagpahayag sa maayong balita sa Gingharian. (Pinadayag 1:5; Mateo 4:17)  Busa haom nga ang presenteng-adlaw nga mga magmamantala sa Gingharian magdala sa tinudlo sa Diyos nga ngalang Mga Saksi ni Jehova. Apan nganong gigugol sa mga Saksi ang dakong panahon ug paningkamot sa pagpakig-estorya sa uban mahitungod sa Gingharian sa Diyos? Ila kining gihimo tungod kay ang Gingharian mao lamang ang paglaom sa katawhan. Ang tawhanong mga kagamhanan ngadtongadto mahanaw, apan ang Gingharian sa Diyos dili gayod matapos. Ang Isaias 9:​6, 7 nagtawag sa Magmamando niini, si Jesus, ang “Prinsipe sa Pakigdait” ug midugang: “Sa kauswagan sa iyang prinsipenhong pagmando ug sa pakigdait walay kataposan.” Ang Gingharian sa Diyos dili sama sa mga kagamhanan sa tawo​—anaa karon ug wala na ugma. Sa pagkamatuod, ang Daniel 2:44 nag-ingon: “Ang Diyos sa langit magatukod ug usa ka gingharian nga dili gayod malumpag. Ug ang gingharian mismo dili igahatag sa laing katawhan. . . . Kini mismo molungtad sa mga panahong walay tino.”

13. (a) Unsa ang pipila ka suliran nga malamposong sulbaron sa Gingharian sa Diyos? (b) Nganong makatino kita nga ang mga saad sa Diyos matuman?

¹³ Kinsang tawhanong hari ang makawagtang sa gubat, krimen, sakit, gutom, ug kawalay-puloy-anan? Dugang pa, kinsang yutan-ong magmamando ang makabanhaw niadtong namatay? Ang Gingharian sa Diyos ug ang Hari niini mosulbad niining mga butanga. Ang Gingharian mapamatud-ang walay depekto, sama sa guba nga kasangkapan nga kanunayng ayohon. Hinunoa, ang Gingharian sa Diyos molampos, tungod kay si Jehova misaad: “Ang akong pulong nga magagula gikan sa akong baba . . . dili mobalik kanako nga walay kapuslanan, kondili nga kini magatuman sa akong gikahimut-an, ug kini magapauswag sa butang nga tungod niana kini akong gipadala.” (Isaias 55:11) Ang katuyoan sa Diyos dili mapakyas, apan kanus-a mosugod ang pagmando sa Gingharian?

PAGMANDO SA GINGHARIAN​—KANUS-A?

14. Unsay sayop nga pagsabot sa mga tinun-an ni Jesus maylabot sa Gingharian, apan unsay nasayran ni Jesus mahitungod sa iyang pagmando?

¹⁴ “Ginoo, ipasig-uli mo ba ang gingharian sa Israel niining panahona?” Kining maong pangutana nga gisukna sa mga tinun-an ni Jesus nagpadayag nga niadtong tungora wala sila masayod  sa katuyoan sa Gingharian sa Diyos ug sa tinudlong panahon sa pagsugod sa pagmando niini. Nga mipasidaan kanila nga dili mangagpas mahitungod sa maong butang, si Jesus miingon: “Dili inyoha ang pagbatog kahibalo sa mga panahon o mga yugto sa panahon nga gikabutang sa Amahan sa iyang kaugalingong kamandoan.” Si Jesus nasayod nga ang iyang pagmando ibabaw sa yuta maoy sa umaabot pa, dugay pa human sa iyang pagkabanhaw ug pagkayab sa langit. (Buhat 1:​6-11; Lucas 19:​11, 12, 15) Ang Kasulatan mitagna niini. Sa unsang paagi?

15. Sa unsang paagi ang Salmo 110:1 naghatag katin-awan sa panahon sa pagmando ni Jesus?

¹⁵ Nga matagnaong nagtumong kang Jesus ingong “Ginoo,” si Haring David miingon: “Si Jehova miingon sa akong Ginoo: ‘Lingkod sa akong tuong kamot hangtod nga ibutang ko ang imong mga kaaway ingong tungtonganan sa imong mga tiil.’” (Salmo 110:1; itandi ang Buhat 2:​34-36.) Kining maong propesiya nagpaila nga ang pagmando ni Jesus dili dayon mosugod human sa iyang pagkayab sa langit. Hinunoa, maghulat siya sa tuong kamot sa Diyos. (Hebreohanon 10:​12, 13) Unsa ka dugay kining maong paghulat? Kanus-a mosugod ang iyang pagmando? Ang Bibliya motabang kanato sa pagkaplag sa mga tubag.

16. Unsay nahitabo niadtong 607 W.K.P., ug unsay relasyon niini sa Gingharian sa Diyos?

¹⁶ Ang bugtong dakbayan sa tibuok yuta diin gibutang ni Jehova ang iyang ngalan mao ang Jerusalem. (1 Hari 11:36) Kadto usab ang kabisera sa inuyonan-sa-Diyos nga yutan-ong gingharian nga hulad sa langitnong Gingharian sa Diyos. Busa, ang pagkalaglag sa Jerusalem pinaagi sa mga Babilonyanhon niadtong 607 W.K.P. makahuluganon kaayo. Kadtong hitaboa nagtimaan sa sinugdanan sa hataas nga pagbalda sa direktang pagmando sa Diyos ibabaw sa iyang katawhan sa yuta. Mga unom ka siglo sa ulahi, gipaila ni Jesus nga nagpadayon pa kining yugto sa nabaldang pagmando, kay siya miingon: “Ang Jerusalem pagayatakan sa kanasoran, hangtod ang tinudlong mga panahon sa kanasoran matuman.”​—Lucas 21:24.

17. (a) Unsa “ang tinudlong mga panahon sa kanasoran,” ug unsa ka dugay kini molungtad? (b) Kanus-a nagsugod ug natapos “ang tinudlong mga panahon sa kanasoran”?

¹⁷ Sulod sa “tinudlong mga panahon sa kanasoran,” ang kalibotanong mga kagamhanan pagatugotan sa pagbalda sa pagmando  nga inuyonan sa Diyos. Ang maong yugto nagsugod sa pagkalaglag sa Jerusalem niadtong 607 W.K.P., ug gipaila ni Daniel nga kini magpadayon sulod sa “pito ka panahon.” (Daniel 4:​23-25) Unsa ka dugay kana? Gipakita sa Bibliya nga ang tulo ug tunga ka “mga panahon” katumbas sa 1,260 ka adlaw. (Pinadayag 12:​6, 14) Doble nianang yugtoa, o pito ka panahon, maoy 2,520 ka adlaw. Apan walay talagsaong nahitabo sa kataposan nianang hamubong yugto sa panahon. Hinunoa, pinaagi sa pagpadapat sa “usa ka adlaw alang sa usa ka tuig” sa propesiya ni Daniel ug pag-ihap ug 2,520 ka tuig gikan sa 607 W.K.P., moabot kita sa tuig 1914 K.P.​—Numeros 14:34; Ezekiel 4:6.

18. Unsay gihimo ni Jesus wala magdugay human madawat ang gahom sa Gingharian, ug sa unsang paagi kini nakaapektar sa yuta?

¹⁸ Si Jesus misugod ba sa pagmando gikan sa langit niadtong panahona? Ang Kasulatanhong mga katarongan sa pag-ingon nga siya nagmando na pagahisgotan sa sunod nga kapitulo. Natural, ang pagsugod sa pagmando ni Jesus dili pagatiman-an sa dihadiha nga kalinaw sa yuta. Ang Pinadayag 12:​7-12 nagpakita nga pagkadawat gayod sa Gingharian, palagpoton ni Jesus si Satanas ug ang demonyong mga manulonda gikan sa langit. Kini magkahulogan ug kaalaotan alang sa yuta, apan makalilipay nga mabasa nga ang Yawa aduna na lamay “mubo nga yugto sa panahon” nga nabilin. Sa dili madugay, magkalipay kita dili lamang tungod kay nagmando na ang Gingharian sa Diyos kondili tungod usab kay kini magdalag mga panalangin sa yuta ug sa masinugtanong katawhan. (Salmo 72:​7, 8) Sa unsang paagi kita nasayod nga kini mahitabo sa dili madugay?

[Footnote]

TAKSA ANG IMONG KAHIBALO

Unsay Gingharian sa Diyos, ug gikan diin kini magmando?

Kinsay nagmando sa Gingharian, ug kinsay mga sakop niini?

Sa unsang paagi kita gipasaligan ni Jehova nga ang iyang Gingharian maoy katinuoran?

Kanus-a nagsugod ug natapos “ang tinudlong mga panahon sa kanasoran”?

[Mga Pangutana sa Pagtuon]

[Kahon sa panid 94]

PILA KA MAHINUNGDANONG MGA HITABO MAYLABOT SA GINGHARIAN SA DIYOS

• Gipahibalo ni Jehova ang iyang katuyoan nga mopatunghag usa ka “binhi” nga magadugmok sa ulo sa Serpente, si Satanas nga Yawa.​—Genesis 3:15.

• Niadtong 1943 W.K.P., gipaila ni Jehova nga kining maong “binhi” maoy usa ka tawhanong kaliwat ni Abraham.​—Genesis 12:​1-3, 7; 22:18.

• Ang pakigtugon sa Balaod nga gihatag sa Israel niadtong 1513 W.K.P. nagtaganag “landong sa umaabot nga maayong mga butang.”​—Exodo 24:​6-8; Hebreohanon 10:1.

• Ang yutan-ong gingharian sa Israel nagsugod niadtong 1117 W.K.P., ug nagpadayon kini sa ulahi diha sa linya ni David.​—1 Samuel 11:15; 2 Samuel 7:​8, 16.

• Ang Jerusalem nalaglag niadtong 607 W.K.P., ug “ang tinudlong mga panahon sa kanasoran” misugod.​—2 Hari 25:​8-10, 25, 26; Lucas 21:24.

• Niadtong 29 K.P., si Jesus gidihogan ingong Tinudlong-Hari ug nagpadayon sa iyang yutan-ong ministeryo.​—Mateo 3:​16, 17; 4:17; 21:​9-11.

• Niadtong 33 K.P., si Jesus mikayab sa langit, nga didto naghulat sa tuong kamot sa Diyos hangtod sa pagsugod sa iyang pagmando.​—Buhat 5:​30, 31; Hebreohanon 10:​12, 13.

• Si Jesus gientrono sa langitnong Gingharian niadtong 1914 K.P. pagkatapos sa “tinudlong mga panahon sa kanasoran.”​—Pinadayag 11:15.

• Si Satanas ug ang iyang mga demonyo gitambog sa kasikbitan sa yuta ug nagdalag dugang kaalaotan sa katawhan.​—Pinadayag 12:​9-12.

• Gidumala ni Jesus ang tibuok-yutang pagwali sa maayong balita sa Gingharian sa Diyos.​—Mateo 24:14; 28:​19, 20.