Sulat Gikan sa Nagamandong Lawas

Minahal nga mga Isigka-Saksi ni Jehova:

Gipahimuslan ni apostol Pablo ang matag higayon aron mapakita niya ang iyang gugma ug pagkamapasalamaton sa iyang mga isigka-magtutuo. Siya misulat ngadto sa mga Kristohanon sa Roma: “Ako nagpasalamat sa akong Diyos pinaagi ni Jesu-Kristo mahitungod kaninyong tanan, tungod kay ang inyong pagtuo gihisgotan lukop sa tibuok kalibotan.” (Roma 1:8) Oo, sa tibuok Imperyo sa Roma ang unang-siglong mga Kristohanon nailhan sa ilang lig-ong pagtuo ug kasibot sa buluhatong pagsangyaw. (1 Tes. 1:8) Mao nga sa walay duhaduha gihigugma gayod sila ni Pablo!

Sama kang Pablo, mapasalamaton usab kami kang Jehova sa dihang kami maghunahuna kaninyo. Kami nahigugma pag-ayo kaninyong tanan! Makaseguro gayod kamo nga si Jehova nahigugma usab sa matag usa kaninyo. Ang pipila kaninyo nakaagom ug grabeng pagsupak, apan padayon kamong nagsangyaw. Nalipay gayod ang kasingkasing ni Jehova sa maisogong espiritu nga inyong gipakita!—Prov. 27:11.

Samtang maampingon ninyong basahon ug pamalandongon ang seksiyon nga “Kalihokan sa mga Saksi ni Jehova sa Modernong Kapanahonan” niining makapaikag ug makapalig-on sa pagtuo nga edisyon sa Tinuig nga Basahon, makita ninyo ang daghang pamatuod nga ang Ginoong Jesu-Kristo padayong “nagapangdaog ug sa pagtapos sa iyang pagpangdaog” ug nga bisan unsa pang hinagiban ang pagagamiton batok sa iyang mga sumusunod dili gayod magmalamposon.—Pin. 6:2; Isa. 54:17.

 Si Pablo misulat ngadto sa mga Kristohanon sa Filipos: ‘Nagpasalamat ako sa akong Diyos tungod sa inyong giamot alang sa maayong balita.’ (Filip. 1:3-5) Kami nga mga membro sa Nagamandong Lawas mibati usab ug sama niana nganha kaninyo. Sa 2007 nga tuig sa pag-alagad, 6,691,790 ka magmamantala ang migugol ug 1,431,761,554 ka oras sa pagsangyaw sa maayong balita diha sa 236 ka kayutaan sa tibuok kalibotan. Pagkadako gayod sa inyong naamot sa pagpalambo sa maayong balita! Hunahunaa lamang ang gatosan ka libong mga tawo nga natabangan tungod sa atong hiniusang paningkamot, ug kining tanan maoy alang sa kadayeganan ni Jehova!

Sa laing okasyon, gipakita ni Pablo ang dakong empatiya ngadto sa iyang mga igsoon. Siya misulat sa mga taga-Tesalonica: “Kami walay-hunong nga nahinumdom . . . sa inyong pag-antos tungod sa inyong paglaom diha sa atong Ginoong Jesu-Kristo atubangan sa atong Diyos ug Amahan.” (1 Tes. 1:2, 3) Oo, kita daghag mga suliran. Apan bisan pa niini, hinungdanon gayod nga kita molahutay. Unsang mga kalisdanan ang imong ginaatubang? Ikaw ba naguol tungod sa usa ka grabeng balatian nga tungod niana nalimitahan ang imong mahimo diha sa pag-alagad kang Jehova? Ang imo bang kapikas nga imong gikauban sa daghang katuigan nabiktima sa dili gayod matagbaw nga kaaway, ang Sheol? (Prov. 30:15, 16) Ikaw ba naglisod sa pagpangitag kapikas sa kinabuhi nga nahigugma usab kang Jehova samtang ikaw matinumanong nagsunod sa tambag sa Bibliya nga magminyo lamang diha sa Ginoo? (1 Cor. 7:39) Nalisdan ka ba sa pag-atiman sa imong mga anak tungod sa hilabihan ka lisod nga kahimtang sa panginabuhi? Bisag unsa pay imong kahimtang, kon imong unahon ang Gingharian, makaseguro ka nga si Jehova dili gayod ‘malimot sa imong buhat ug sa gugma nga imong gipakita alang sa iyang ngalan.’ Palihog mga  igsoon, dili gayod kita “mohunong sa pagbuhat ug maayo”!—Heb. 6:10; Gal. 6:9.

Unsay makatabang kaninyo aron magmalahutayon? Sama sa mga taga-Tesalonica, makatabang kanato ang “paglaom pinaagi sa atong Ginoong Jesu-Kristo.” Haom gayod nga gipakasama ni Pablo ang “paglaom sa kaluwasan” sa usa ka lig-ong helmet nga nagpanalipod sa usa ka Kristohanon gikan sa negatibong panghunahuna ug mga pagduhaduha.—1 Tes. 5:8.

Sa pagkatinuod, kon kamo malipayong molahutay, inyong matubag ang pagtamay ni Satanas sa dakong isyu sa pagkasoberano sa uniberso. Si Satanas nangangkon nga ang mga alagad sa Diyos hakog ug nag-alagad lamang kaniya sa limitadong panahon, ug sila maluya sa pag-alagad kon makasinatig daghang pagsulay o kon ilang makita nga dugay pang matapos kini nga sistema sa mga butang kay sa ilang gidahom. Aduna kitay talagsaong pribilehiyo sa pagyagyag kang Satanas ingong labihan ka bakakon! Ang matag adlaw nga molabay sa inyong kinabuhi nagpaduol kaninyo sa katumanan sa paglaom.

Sama nga gipahimuslan ni Pablo ang kahigayonan aron sa pagdayeg sa iyang mga igsoon tungod sa ilang lig-ong pagtuo, sa ilang dakong nahimo sa buluhatong pagsangyaw, ug sa ilang pagkamalahutayon, busa among pahimuslan usab kining higayona sa pagdayeg ug pagpaabot sa among gugma nganha kaninyo. Ipadayon ang inyong maayong nahimo!

Hinaot nga si Jehova dagayang magpanalangin kanato niining umaabot nga tuig. Uban sa among mga panghinaot, kami ang

Inyong mga igsoon,

Nagamandong Lawas sa mga Saksi ni Jehova