Ang Cuvier’s beaked whale makasalom sa giladmon nga 2,992 metros (9,816 ka piye), diin ang pressure moabot ug mga 30,300 kilopascals (4,390 psi). Kini nga balyena makapabilin ug dugay ilawom sa tubig. Sumala sa rekord, ang usa niini nakapabilin sa ilawom sa tubig sulod sa 3 ka oras ug 42 minutos sa wala pa ni motunga aron moginhawa. Sa unsang paagi nahimo ni sa maong mga mammal bisan pa sa grabeng pressure ug diyutayng oxygen?

 Sama sa ubang mammal sa dagat, ang mga gusok sa balyena mapilo ug ang baga niini mokiyos. Nadiskobrehan sa mga researcher nga ang mga mammal sa dagat mogamit ug diyutayng oxygen dihang mohinayg pitik ang ilang kasingkasing ug ang ilang dugo mopaingon sa ilang utok, kasingkasing, ug mga muscle imbes sa ubang bahin sa ilang lawas.

 Dugang pa, ang mga mammal sa dagat magpondog oxygen sa ilang mga muscle pinaagi sa protina nga gitawag ug myoglobin. Samtang nagasalom silag lawom, ipagawas sa myoglobin ang oxygen kon gikinahanglan. Mas daghag myoglobin ang mga muscle niini kay sa mga muscle sa tawo ug mga hayop sa yuta.

 Ang usa ka researcher miingon bahin sa mga Cuvier’s beaked whale: “Lawom gyod kaayo ang ilang pagsalom. Base sa among nahibaloan bahin sa mahimo sa lawas sa mga hayop, ang giladmon ug gidugayon sa pagsalom sa mga balyena mas labaw pa kay sa among gidahom.” Gusto sa mga siyentista nga mas masabtan ang paagi sa pagsalom niini nga mga balyena kay puwede ning makatabang sa mga doktor sa ilang pagtambal sa mga sakit sama sa collapsed lung.

 Unsay imong hunahuna? Ang abilidad ba sa Cuvier’s beaked whale nga makasalom ug lawom ug makapabilig dugay sa ilawom sa tubig mitungha pinaagig ebolusyon? O gidisenyo kini?