Asa mas ganahang magbasa ang imong anak—sa printed nga libro o sa gadyet?

 Daghang batan-on ang mas ganahang magbasa sa gadyet. “Para sa henerasyon nga naanad sa pag-click ug mga link o pag-scroll dayon sa sunod nga page, laayan na silang magbasa ug libro,” misulat si Dr.  Jean M. Twenge. a

 Naay mga bentaha ang pagbasa diha sa gadyet. “Ang among eskuwelahan naggamit ug digital nga mga libro,” miingon ang 20 anyos nga si John. “Tungod sa search feature, dali ra nakong makita ang mga impormasyon nga kinahanglan nako.”

 Kon magbasa diha sa gadyet, daghang tool ang dali rang ma-access sa mga tawo nga makatabang nila. Pananglitan, sa usa lang ka click o tap, makita dayon ang kahulogan sa usa ka pulong, ma-play ang audio, makatan-aw ug video sa parehong topic, o makakuhag dugang impormasyon pinaagi sa mga link. Pero nagpasabot ba na nga wala kaayoy kaayohan ang pagbasag printed nga mga basahon?

 Dihang magtuon, ang uban mas ganahang magbasa sa papel. Ngano?

•   Atensiyon. Ang batan-ong si Nathan miingon, “Dihang magbasa ko sa gadyet, ma-distract ko sa mga pop-up ug notification.”

   Si Karen, nga 20 anyos, miingon pod: “Dihang magbasa ko sa cellphone o tablet, dali ra kong matental nga mag-open ug laing app o magdula.”

   Prinsipyo sa Bibliya: ‘Gamita ang inyong panahon sa kinamaayohang paagi.’—Colosas 4:5.

   Hunahunaa kini: Kaya bang likayan sa imong anak ang mga app nga makaistorbo niya samtang magbasa o magtuon gamit ang gadyet? Kon dili, unsaon nimo pagtabang ang imong anak nga makapokus?

   Tip: Tabangi ang imong anak nga masabtan nga kon mag-open siyag laing mga app, malangay lang siya sa iyang mga homework ug mamenosan ang iyang panahon para sa ubang butang.

•   Ang masabtan. “Gipakita sa daghang eksperimento nga kadtong nagbasa gamit ang gadyet mas gamay lag masabtan kompara sa dihang magbasa sila sa papel,” miingon ang librong Be the Parent, Please.

   Ang usa ka rason kay ang mga tawo sagad paspas kaayong magbasa diha sa gadyet imbes hunahunaon pag-ayo ang ilang ginabasa. “Sa Internet,” miingon ang awtor nga si Nicholas Carr, “gusto natong makakuhag daghang impormasyon nga parehas ka paspas sa paglihok sa atong mga mata ug tudlo.” b

   Makatabang man pod usahay ang paspas nga pagbasa. Pero ang problema, miingon si Carr, “mao na ni ang nabatasan nga paagi sa pagbasa.” Ingong resulta, basin mabatasan sa imong anak ang paspas nga pagbasa ug dili na kini sabton.

   Prinsipyo sa Bibliya: “Bisan unsa pay imong mabatonan, seguradoha nga makabaton kag pagsabot.”—Proverbio 4:7.

   Hunahunaa kini: Unsaon nimo pagtabang ang imong anak nga makakat-on sa pag-research sa usa ka topic, sa printed man nga libro o gadyet?

   Tip: Magmabalanse. Okey ra nga magbasa diha sa printed nga libro o sa gadyet. Parehas ra ni nga makatabang. Gani, naay mga feature sa gadyet nga makatabang aron daling masabtan ang ginabasa. Busa, hisgotig maayo uban sa imong mga anak ang mga bentaha ug disadvantage sa pagbasa diha sa gadyet o printed nga libro. Hinumdomi sab nga magkalahi ang matag bata.

•   Ang mahinumdoman. Kon ikompara sa pagbasag printed nga basahon, miingon si Ferris Jabr sa usa ka artikulo sa Scientific American, ang pagbasa diha sa gadyet “mas makapakapoy sa atong hunahuna . . . ug medyo maglisod ta sa paghinumdom sa atong gibasa.”

   Pananglitan, ang pagbasag printed nga libro makatabang sa imong memorya kay samag naa kay “mapa” kon asa nimo nakita ang impormasyon diha sa panid. Sama nig “bookmark” sa imong hunahuna, nga makatabang nimo nga makita pag-usab ang maong impormasyon.

   Dugang pa, nakita sa mga researcher nga kadtong nagbasag printed nga basahon mas makahinumdom sa ilang nabasa. Mahinumdom sila sa impormasyon kay kon sa papel sila magbasa, mas dali silang makakat-on.

   Prinsipyo sa Bibliya: “Ampingi ang praktikal nga kaalam ug ang katakos sa panghunahuna.”—Proverbio 3:21.

   Hunahunaa kini: Maglisod ba ang imong anak sa pagsabot o paghinumdom sa iyang gibasa o gitun-an? Kon oo, unsaon nimo pagtabang ang imong anak nga mo-improve sa iyang pagtuon? Makatabang kaha ang printed nga libro?

   Tip: Konsideraha kon asa mas makakat-on ang imong anak kay sa kon unsay mas ganahan niyang gamiton sa pagbasa. Ang mga tawo naay tendensiya nga maghunahuna nga mas makakat-on sila kon sa gadyet sila magbasa.