Nagtudlo ba ang Bibliya ug Reinkarnasyon?

I-PLAY

Tubag sa Bibliya

Wala. Ang pulong nga “reinkarnasyon” o ang ideya bahin niini dili makita sa Bibliya. Ang pagtuo sa reinkarnasyon gibase sa pagtulon-an nga ang kalag dili mamatay. a Pero ang Bibliya nagtudlo nga ang kalag mao ang tawo mismo, mao nga kini puwedeng mamatay. (Genesis 2:7, footnote; Ezequiel 18:4) Dihang ang usa ka tawo mamatay, wala na gyod siya.—Genesis 3:19; Ecclesiastes 9:5, 6.

Unsay kalainan sa reinkarnasyon ug pagkabanhaw?

Ang gitudlo sa Bibliya bahin sa pagkabanhaw wala ibase sa pagtuo nga ang kalag dili mamatay. Sa pagkabanhaw, ang mga patay buhion pinaagi sa gahom sa Diyos. (Mateo 22:23, 29; Buhat 24:15) Ang pagkabanhaw maghatag ug paglaom sa usa ka tawo nga mabuhi pag-usab sa usa ka bag-ong kalibotan nga may posibilidad nga dili na mamatay pag-usab.—2 Pedro 3:13; Pinadayag 21:3, 4.

Sayop nga mga ideya bahin sa reinkarnasyon ug sa Bibliya

Sayop nga ideya: Ang Bibliya nag-ingon nga si propetang Elias nabuhi pag-usab ug nahimong si Juan nga Tigbawtismo.

Ang tinuod: Ang Diyos nagtagna: “Akong ipadala kaninyo si propetang Elias,” ug si Jesus miingon nga kining tagnaa natuman kang Juan nga Tigbawtismo. (Malaquias 4:5, 6; Mateo 11:13, 14) Pero wala ni magpasabot nga si Elias nabuhi pag-usab ug nahimong si Juan nga Tigbawtismo. Si Juan mismo miingon nga dili siya si Elias. (Juan 1:21) Hinuon, nagpasabot ni nga si Juan naghimo sa buluhaton nga sama nianang kang Elias, nga nagpahibalo sa mensahe sa Diyos nga ang mga tawo kinahanglang maghinulsol. (1 Hari 18:36, 37; Mateo 3:1) Dugang pa, nabatonan ni Juan ang “espiritu ug gahom sama sa nabatonan ni propeta Elias.”—Lucas 1:13-17, Ang Bag-ong Maayong Balita Biblia.

Sayop nga ideya: Dihang ang Bibliya maghisgot bahin sa pagkahimong “gipanganak pag-usab,” ang gipasabot niini mao ang reinkarnasyon.

Ang tinuod: Sa Bibliya, ang pagkahimong gipanganak pag-usab nagkahulogan nga ang usa ka tawo ipanganak pag-usab sa espirituwal nga paagi ug mahitabo ni samtang buhi pa siya. (Juan 1:12, 13) Ang pagkahimong gipanganak pag-usab wala magtumong sa dili kalikayan nga resulta sa miaging binuhatan, kondili kini maoy panalangin gikan sa Diyos, nga maghatag ug talagsaong paglaom para niadtong makadawat niini.—Juan 3:3; 1 Pedro 1:3, 4.

a Ang pagtuo bahin sa dili mamatay nga kalag ug reinkarnasyon nagsugod sa karaang Babilonya. Sa ulahi, gimugna sa maalamong mga tawo sa India ang doktrina sa Karma. Sumala sa Britannica Encyclopedia of World Religions, ang Karma mao “ang balaod sa hinungdan ug epekto, nga nagpasabot nga ang ginabuhat sa usa ka tawo sa iyang kinabuhi karon dunay epekto sa sunod niyang kinabuhi.”—Panid 913.