MGA BATAN-ON NANGUTANA

Paglalang o Ebolusyon?—Bahin 2: Nganong Kinahanglang Susihon ang Ebolusyon?

I-PLAY

Si Alex naglibog. Siya nagtuog Diyos ug sa paglalang. Pero karon ang iyang titser sa biology nangusog sa pag-ingon nga tinuod ang ebolusyon, nga kini gipaluyohan sa kasaligang panukiduki sa siyensiya. Dili gusto ni Alex nga malantaw siya nga walay hibangkaagan. ‘Total,’ iyang gisultihan ang iyang kaugalingon, ‘kon napamatud-an sa mga siyentista nga tinuod ang ebolusyon, kinsa man ko nga mokuwestiyon nila?’

Ingon ka ba usab niana? Tingali sa tibuok nimong kinabuhi, nagtuo ka sa giingon sa Bibliya: “Gilalang sa Diyos ang mga langit ug ang yuta.” (Genesis 1:1) Apan, gikombinsir ka sa ubang tawo nga ang paglalang dili tinuod ug ang ebolusyon maoy tinuod. Motuo ka ba nila? Nganong kinahanglang susihon ang ebolusyon?

Duha ka rason kon nganong kinahanglang susihon ang ebolusyon

Ang mga siyentista wala magkausa bahin sa ebolusyon. Bisan sa daghan nang tuig sa pagpanukiduki, ang mga siyentista wala gihapoy eksplinasyon bahin sa ebolusyon nga gikauyonan nilang tanan.

Angayng palandongon: Kon ang mga siyentista wala magkausa bahin sa ebolusyon—ug mga eksperto man unta sila—sayop ka ba sa pagkuwestiyon sa teoriya?—Salmo 10:4.
Importante kon unsay imong tuohan. “Kon ang kinabuhi sulagma lang nga mitungha, nan ang atong kinabuhi—ug ang tanang butang sa uniberso—walay kahulogan,” matod ni Zachary. Husto siya. Kon tinuod man ugaling ang ebolusyon, ang kinabuhi daw walay katuyoan. (1 Corinto 15:32) Sa laing bahin, kon tinuod ang paglalang, kita makakitag makapakombinsir nga mga tubag sa mga pangutana bahin sa katuyoan sa kinabuhi ug sa kon unsay anaa sa umaabot.—Jeremias 29:11.

Angayng palandongon: Sa unsang paagi ang imong pagkahibalo sa kamatuoran bahin sa ebolusyon ug paglalang makahatag ug dakong kahulogan sa imong kinabuhi?—Hebreohanon 11:1.

Mga pangutana nga pamalandongon

PANGANGKON: ‘Ang tanang butang sa uniberso maoy resulta sa aksidente nga gitawag ug big bang.’

Kinsa o unsa ang nagpahinabo sa big bang o dakong pagbuto?
Unsay mas makataronganon—nga ang tanang butang nanungha lag iya o nga ang tanan nanungha gikan sa usa ka butang o sa usa ka persona?

PANGANGKON: ‘Ang mga tawo gikan sa mananap.’

Kon ang tawo gikan pa sa mananap—gikan sa unggoy, pananglitan—nganong dako kaayog diperensiya ang pangutok sa tawo ug nianang sa unggoy? a
Ngano kaha nga bisan ang labing “simple” nga mga matang sa kinabuhi komplikado man kaayo? b

PANGANGKON: ‘Ang ebolusyon napamatud-an nga tinuod.’

Ang tawo ba nga nag-ingon nga tinuod kini nakasusi sa ebidensiya?
Ang kadaghanan sa mga nagtuo ug ebolusyon nagtuo ba niini tungod lang kay sila gisultihan nga ang tanang tawong intelihente nagtuo niini?

ANG GIINGON SA UBANG BATAN-ON

Gwen

“Handurawa nga gisultihan ka nga dihay mibuto sa imprentahanan ug ang tinta namisik sa mga bungbong ug kisame ug nahimong diksiyonaryo. Motuo ka ba niana? Labaw nang dili katuohan nga ang tanang butang diha sa hapsay kaayong uniberso nanungha lang agig resulta sa aksidenteng pagbuto.”

Jessica

“Ang mga tawo dunay mga hiyas nga dili kinahanglan aron mabuhi. Gani, kita moatiman ug mga masakiton ug motabang niadtong nanginahanglan. Nganong ingon man kita niana kon ang teoriya sa ebolusyon—nga ‘lig-on ray makapabiling buhi’—tinuod pa?”

Julia

“Kon naglakawlakaw ka sa lasang ug nakakitag nindot kaayong balay nga kahoy, moingon ka ba: ‘Nindota oy! Ang mga kahoy tingali nangatumba nga miplastar lag iya mao nga nahimo kining balay.’ Siyempre dili! Kini dili rasonable. Busa nganong motuo man kita nga ang tanang butang sa uniberso nanungha lag iya?”

a Ang uban tingali moingon nga ang tawo mas intelihente kay mas dako silag utok kay sa mga unggoy. Apan, alang sa katarongan kon nganong sayop kana, tan-awa ang brosyur nga The Origin of Life—Five Questions Worth Asking, panid 28.

b Tan-awa ang brosyur nga The Origin of Life—Five Questions Worth Asking, panid 8-12.