•  Maayo ba kang mag-multitask?

•  Sayop nga ideya bahin sa multitasking

•  Mas maayong paagi

•  Ang giingon sa ubang batan-on

 Makamao ba kang mag-multitask​—dunganon ang lainlaing buluhaton? Daghan ang naghunahuna nga mas maayong mag-multitask ang mga batan-on nga anad sa bag-ong mga teknolohiya kay sa mga edaran nga bag-o pa lang nagkat-on niini. Pero tinuod ba gyod na?

 TINUOD o DILI?

•   Mas dali kang mahuman sa imong mga buluhaton kon mag-multitask ka.

•   Kon pirme kang mag-multitask, sayon na lang kaayo ni para nimo.

•   Mas maayong mo-multitask ang mga batan-on kay sa mga edaran.

 Kon “tinuod” ang imong tubag sa bisan asa niining tulo, nailad ka sa sayop nga ideya bahin sa multitasking.

 Naghunahuna ba ka nga madungan nimog himo ang duha ka butang? Puwede tingali nimong dunganog himo ang pipila ka butang nga dili ra mawala ang imong pokus. Pananglitan, kon maminaw kag music samtang manghinlo sa kuwarto, tingali maayo ra gihapon pagkalimpiyo ang imong kuwarto.

 Pero kon imong dunganon ang duha ka buluhaton nga nagkinahanglag pokus, posible nga parehong dili maayo ang resulta niini. Mao tingaling nakaingon ang batan-ong si Katherine: “Kon mag-multitask ka, daghan na hinuon kag mahimong sayop.”

 “Naa koy kaestorya dihang kalit nga may mi-text nako, ug kinahanglan kong mo-reply. Gidungan nako nig himo. Maong wala na ko kadungog sa ubang gipanulti sa akong kaestorya ug nagkasayopsayop pod ang akong gi-type.”​—Caleb.

 Ang technology expert nga si Sherry Turkle misulat: “Dihang mag-multitask ta, . . . dili nato mahimog maayo ang matag buluhaton. Ang pag-multitask makapagana sa atong utok maong moabtik ta ug maghunahuna nga maayo kaayo ang atong ginahimo pero ang tinuod nagkabati diay ang resulta.” a

 “Usahay maghunahuna ko nga kaya kaayo nakong dunganon ang pag-text ug ang pagpakig-estorya sa laing tawo. Pero ang ako untang i-reply sa akong ka-text mao hinuon ang akong nasulti sa akong kaestorya, ug ang ako untang itubag sa akong kaestorya mao hinuon ang akong na-text!”​—Tamara.

 Ang mga tawo nga mag-multitask maghagohago lang sa ilang kaugalingon. Pananglitan, sagad mas dugay silang mahuman sa ilang asaynment. O kaha usbon nilag himo ang ilang asaynment kay wala nila ni matarong ug himo. Bisag asa niini nga kahimtang, ang mga tawo nga mag-multitask mas gamay na lag panahon sa ubang butang nga gusto nilang himoon!

 Tungod niana, ang psychotherapist ug school counselor nga si Thomas Kersting miingon: “Kon ang utok samag file cabinet nga organisadong nagtipig ug impormasyon, ang utok sa mga grabeng mag-multitask gubot kaayo.” b

 “Kon dunganon nimog himo ang daghang buluhaton, mas daghan pong importanteng detalye ang imong malimtan. Ingong resulta, madugangan na hinuon ang imong trabaho. Abi nimog nakadaginot kag panahon pero wala diay.”​—Teresa.

•   Pagpokus sa usa ka buluhaton. Tingali lisod ni para nimo, ilabina kon naanad ka nga dunganog himo ang mga buluhaton​—sama sa pagtuon samtang nag-text. Pero ang Bibliya nagtambag nato nga ‘seguroon ang mas importanteng mga butang.’ (Filipos 1:10) Naay mga buluhaton nga mas importante kay sa ubang butang. Busa pilia kon unsay unahon, ug pagpokus lang niini hangtod nga mahuman.

   “Ang hunahuna nga dili makapokus samag bata; usahay kinahanglan nimo ning sultihan nga dili, bisag mas sayon tingali nga pasagdan lang nimo ni sa iyang gusto.”​—Maria.

•   Likayi ang mga butang nga makadisturbo. Matental ba ka sa pagtan-aw sa imong cellphone samtang nagtuon? Ibutang ni sa laing kuwarto. Palonga ang TV, ug likayi ang pagsigeg hunahuna sa social media. Ang Bibliya nag-ingon: ‘Gamita ang inyong panahon sa kinamaayohang paagi.’​—Colosas 4:5.

   “Nakita nako nga mas maayong magpokus lang sa usa ka butang. Lipay kaayo ko dihang mahuman nako ang usa ka trabaho sa akong listahan ug mopadayon sa sunod. Mas nalipay ko sa resulta.”​—Onya.

•   Paminaw pag-ayo sa imong kaestorya. Kon magsige kag tan-aw sa imong cellphone samtang nakig-estorya, pagpakita nig kawalay-pagtahod ug dili maayo ang resulta sa inyong panag-estorya. Ang Bibliya nagtambag nato nga trataron nato ang uban sa paagi nga gusto natong trataron ta nila.​—Mateo 7:12.

   “Usahay, samtang makig-estorya ko sa akong igsoon, magsige siyag text o magkurikuri sa iyang cellphone. Makalagot kaayo! Pero sa tinuod lang, naa poy panahon nga ingon ana ko.”​—David.