Sumala sa report sa U.S. Centers for Disease Control and Prevention, mga katunga sa giinterbiyong mga batan-on nga nag-edad ug 15 ngadto sa 19 ang nakasulay na ug oral sex nga nagtumong sa pagtandog sa kinatawo pinaagig dila o baba aron sa pagpukaw sa gana sa sex. “Kon makig-estorya ka sa mga tin-edyer [bahin sa oral sex] sila moingon nga dili ra kini daotan,” miingon si Sharlene Azam, nga awtor sa librong Oral Sex Is the New Goodnight Kiss. “Gani, sila nagtuo nga dili ra kini pagpakig-sex.”

•  Unsay imong hunahuna?

•  Unsa ang tinuod bahin niini?

•  Nganong angay nimo kining tagdon?

 Tubaga ang mosunod nga mga pangutana.

1.   Makamabdos ba ang oral sex?

   1.   Oo

   2.   Dili

2.   Makadaot ba sa panglawas ang oral sex?

   1.   Oo

   2.   Dili

3.   Matawag ba nga sex ang oral sex?

   1.   Oo

   2.   Dili

 Ikompara ang imong mga tubag sa mosunod nga impormasyon.

1.   Makamabdos ba ang oral sex?

    Tubag: Dili. Kana ang usa ka hinungdan kon nganong daghan ang nagtuo nga OK ra ang oral sex.

2.   Makadaot ba sa panglawas ang oral sex?

    Tubag: Oo. Kon ang usa nagbuhat ug oral sex, siya posibleng magkasakit ug hepatitis (A o B), genital wart o kalunggo sa kinatawo, gonorrhea o tulô, herpes, HIV, ug syphilis.

3.   Matawag ba nga sex ang oral sex?

    Tubag: Oo. Bisag unsang buhat nga naglangkit sa kinatawo sa uban​—lakip ang pakighilawas, oral sex, anal sex, ug pagmasturbar o pag-ugay-ugay sa kinatawo sa uban—​matawag nga pagpakig-sex.

 Tagda ang mga teksto sa Bibliya nga may kalabotan sa oral sex.

 Ang Bibliya nag-ingon: “Kini mao ang pagbuot sa Diyos . . . nga ayran ninyo ang pakighilawas.”​—1 Tesalonica 4:3.

 Ang orihinal nga pulong nga gihubad nga “pakighilawas o seksuwal nga imoralidad” nagpasabot sa tanang matang sa seksuwal nga buhat sa dili magtiayon, lakip ang pagpakig-sex, oral sex, anal sex, ug pag-ugay-ugay sa kinatawo sa uban. Ang tawo nga nagbuhat niini makaagom ug daotang mga resulta, ug ang makapasubo pa, madaot ang iyang relasyon sa Diyos.​—1 Pedro 3:12.

 Ang Bibliya nag-ingon: ‘Siya nga nakighilawas nakasala batok sa iyang kaugalingong lawas.’​—1 Corinto 6:18.

 Ang oral sex dunay dili maayong epekto sa pisikal ug sa atong relasyon sa Diyos. Makapahugno usab kini sa emosyon. “Dili lang kadtong aktuwal nga nakig-sex ang mobati nga gipahimuslan, nagbasol, o huyang ug walay pulos,” miingon ang librong Talking Sex With Your Kids. “Ang tanang dili maayong pagbati nga posibleng bation sa usa kon nakig-sex siya sa sayop nga situwasyon mahimong masinatian usab niadtong mosulay sa bisan unsang matang sa pagpakig-sex sa sayop nga situwasyon. Bisag unsang matanga sa sex, sex gayod.”

 Ang Bibliya nag-ingon: “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan.”​—Isaias 48:17.

 Motuo ka ba nga ang mga balaod sa Diyos bahin sa sex makahatag gayod ug kaayohan kanimo? O giisip nimo kini ingong restriksiyon? Aron matubag kana, hunahunaa ang usa ka haywey nga dunay mga speed limit, traffic signal, ug stop sign. Giisip ba nimo ang maong mga sign ingong restriksiyon o proteksyon? Unsa kahay mahitabo kon ikaw​—ug ang ubang drayber—​dili manumbaling niana?

 Ingon usab niana kon bahin sa mga balaod sa Diyos. Kon dili nimo kini panumbalingon, segurado nga imong maani kon unsay imong gipugas. (Galacia 6:7) “Kon padayon nimong balewalaon ang imong mga tinuohan ug prinsipyo ug mohimog mga butang nga para nimo dili husto, moubos ang imong pagtahod sa kaugalingon,” nag-ingon ang librong Sex Smart. Pero kon ikaw magkinabuhi subay sa mga balaod sa Diyos, imong mapakita nga hinlo ka sa moral. Labaw sa tanan, padayon nimong mahuptan ang hinlong konsensiya.​—1 Pedro 3:16.