Ang bag-ong mga hitabo sa South Korea nagpakita nga basig mohimog dakong kausaban ang gobyerno labot sa pagtahod sa pangunang tawhanong mga katungod. Niadtong Disyembre 7, 2017, si Presidente Jae-in Moon sa South Korea nakigkita sa mga opisyales sa National Human Rights Commission (NHRC) ug giingnan sila nga magrekomendar ug mga paagi nga mapauswag sa nasod ang pagtahod sa tawhanong mga katungod aron makab-ot ang internasyonal nga mga sukdanan. Espesipikong giingnan ni Presidente Moon ang NHRC sa pagsugyot ug mga solusyon nga motabang sa gobyerno nga matapos ang polisiya sa pagpriso sa mga lalaki nga dili magsundalo tungod sa konsensiya.

Human sa maong nabalita pag-ayo nga miting, ang mga Saksi ni Jehova sa South Korea nag-organisar ug kampanya sa pagpapirma (signature campaign) alang sa mga petisyon ngadto sa presidente. Ang polisiya sa gobyerno sa pagpapriso sa mga dili magsundalo tungod sa konsensiya nakaapektar pag-ayo sa daghang Saksi sukad pa sa una. Kay gihatagag mando ni Presidente Moon ang iyang administrasyon nga hatagag pagtagad ang mga petisyon gikan sa mga lungsoranon sa nasod, ang maong mga petisyon naghangyo sa presidente nga solusyonan ang maong problema nga gidangtan nag mga 70 ka tuig.

Upat ka semana human sugdi ang maong kampanya, ang mga petisyon nakompleto. Lakip sa mipirma sa mga petisyon ang kapig 14,000 ka lalaki nga napriso kay dili magsundalo tungod sa konsensiya. Lakip usab niini ang kapig 26,000 ka membro sa pamilya nga nag-antos tungod sa pagkapriso sa maong mga lalaki.

Niadtong Enero 15, 2018, ang 6 ka representante sa 41,275 ka Saksi nga mipirma sa mga petisyon mipresentar niini sa Office of the President. Sa maong mga petisyon, gipasalamatan ang presidente sa paghatag ug pagtagad sa maong isyu. Gipasiugda usab niini ang dili maayong mga epekto sa 70 ka tuig nga pagpapriso niadtong mga dili magsundalo tungod sa konsensiya ug ang mga kaayohan nga makuha sa nasod kon masolusyonan kini nga isyu. Niadtong Enero 16, 2018, gisang-at sa Office of the President ang maong mga petisyon ngadto sa Ministry of National Defense aron kini makonsiderar.

Samtang ginaandam ang mga petisyon, nakigmiting usab ang mga representante sa mga Saksi ni Jehova sa mga opisyales sa NHRC. Ilang gipatin-aw base sa Bibliya kon nganong dili magsundalo ang mga Saksi ni Jehova. Kon pahimoon ug alternatibong serbisyo diha sa komunidad, ang mga Saksi nga batan-ong lalaki nga apil sa maong programa dili kay magpondo lang sa prisohan kondili mapuslan sa gobyerno ug makaserbisyo alang sa kaayohan sa nasod. Giingnan sa mga opisyales ang mga Saksi nga pangunang prayoridad sa NHRC sa 2018 ang pagsulbad sa isyu labot sa mga dili magsundalo tungod sa konsensiya.

Ang nangapriso sa South Korea kay dili magsundalo tungod sa konsensiya mas daghan kon itandi sa total nga gidaghanon nianang sa tanang ubang nasod. Samtang gikonsiderar pag-usab sa mga opisyales ang dugay na kaayong polisiya sa gobyerno sa maong isyu, ang mga Saksi ni Jehova nanghinaot nga kining bag-ong lakang magtapos sa daghang tuig nga pagkapriso sa mga Saksi nga batan-ong lalaki. Tanantanan, sila nakagugol ug kapig 36,700 ka tuig sa prisohan kay dili magsundalo.