Niadtong Mayo 23, 2024, nahimong balido sa Kazakhstan ang desisyon bahin sa pagdumili nga magsundalo tungod sa konsensiya base sa relihiyosong tinuohan sa usa. Kini nga desisyon maoy bahin sa 20 anyos nga si Brader Daniil Smal, nga ang kaso gitawag sa huwes ingong “talagsaon.”

Mga usa ka tuig una pa niana, niadtong Mayo 17, 2023, si Daniil gipatawag sa district military office. Matinahoron niyang gipatin-aw ang iyang relihiyosong baroganan. Nakita pod sa mga opisyales sa district military ang opisyal nga dokumento nga nagpamatuod nga si Daniil kuwalipikado nga dili magsundalo tungod sa relihiyon. Pero wala dawata sa mga opisyales ang iyang request nga dili magsundalo. Pagkaugma, gipugos si Daniil sa mga awtoridad sa pagsakay sa tren paingon sa usa ka pasilidad sa militar nga mga 2,000 kilometros (1,243 ka milya) gikan sa iyang pinuy-anan sa Rudny. Gibarogan niya ang iyang neyutralidad niining lisod nga panahon, nga matinahorong midumili nga himoon ang panumpa sa militar, mosul-ob ug uniporme, o moapil sa mga training exercise. Misulay siyag pasaka ug pormal nga mga reklamo pero wala siya molampos, maong iyang gipaagi ang problema sa legal nga mga proseso. Miresulta nig tulo ka bulan nga mga husay sa korte.

Sa kataposan, niadtong Nobyembre 9, 2023, ang Military Court of the Almaty Garrison midesisyon nga ilegal ang paglista kang Daniil ingong sundalo. Sa desisyon, ang korte miingon: “Ang pagpugos [kang Daniil] nga magsundalo, nga supak sa iyang klarong gibarogan nga relihiyosong mga tinuohan, naglapas sa iyang katungod sa kagawasan sa konsensiya ug relihiyon.” Gisugo pod sa korte nga buhian si Daniil gikan sa military unit diin siya gidetener sulod sa unom ka bulan.

Wa madugay human sa desisyon sa korte, ang mga opisyales sa militar miapelar. Pero niadtong Abril 16, 2024, ang desisyon sa ubos nga korte gisuportahan sa Military Court of the Republic of Kazakhstan, ang kinatas-ang korte sa militar sa nasod. Kining importante nga desisyon, nga nahimong balido niadtong Mayo 23, 2024, mikutlo sa internasyonal nga balaod ug sa Constitution of Kazakhstan, nga naggarantiya sa mga sakop sa katungod sa kagawasan sa konsensiya. Ang korte lig-ong miingon: “Walay katungod ang estado nga pugson ang usa ka tawo nga molihok nga supak sa iyang konsensiya bisag unsa pa ang kahimtang.”

Kini ang unang higayon nga lig-ong giila sa korte sa Kazakhstan ang katungod nga modumili sa pagsundalo base sa relihiyosong tinuohan sa usa. Si Brader Lev Gladyshev, spokesman sa mga Saksi ni Jehova sa Kazakhstan, miingon: “Mapasalamaton ta nga klarong giila sa mga korte ang legal nga katungod ni Daniil nga modumili sa pagsundalo tungod sa konsensiya. Kini nga desisyon mahimong lig-on nga basehan aron suportahan ug protektahan ang pangunang tawhanong mga katungod sa Kazakhstan ug Central Asia.”—1 Timoteo 2:1, 2.