Niadtong Marso 1 hangtod Hunyo 30, 2024, kapig 1,000 ka Saksi ni Jehova ang miapil sa preaching campaign sa tibuok Brazil. Ang campaign giorganisar tunong sa bag-ong pag-release sa publikasyon nga Mabuhi Ka Hangtod sa Hangtod! sa 11 ka pinulongan sa nasod. Ingong resulta, halos 300 ang mihangyo nga magpa-Bible study.

Samtang nagsangyaw, usa ka babaye nga Xavante ug pinulongan sa Campinápolis ang nangutana sa mga magmamantala: “Kamo tong nagahimog mga video sa akong pinulongan? Dugay na kaayo kong nangita ninyo. Nakit-an ra gyod mo nako!” Miingon siya nga nag-Bible study siya sa una uban sa mga Saksi ni Jehova pero miundang siya kay dili siya kasabot ug Portuguese. Pero pagkahibalo niya nga naa nay Xavante ang atong binase sa Bibliya nga mga publikasyon, gipangita niyag balik ang mga Saksi. Nagpa-Bible study siya pag-usab.

Sa Santa Maria de Jetibá, nakaplagan sa usa ka sister ang interesadong babaye nga Pomeranian ug pinulongan. Tulo ka beses na niya siyang naduaw ug dugay kaayo silang mag-estorya. Sa ikatulo nilang panag-estorya, ang babaye miingon nga miampo siya sa Diyos sa adlaw una pa sa ilang unang panag-estorya. Mihangyo siya sa Diyos nga tudloan siya kon unsaon pagsimba sa hustong paagi. Lipay kaayo siyang midawat ug pagtuon sa Bibliya.

Sa gamayng baryo sa southern Brazil, nailaila sa mga igsoon ang usa ka babaye nga Kaingang ug pinulongan ug dili siya pamilyar sa mga Saksi ni Jehova. Gibasa sa mga igsoon ang Salmo 83:18 ug gisultihan nila ang babaye nga Jehova ang ngalan sa Diyos. Natandog kaayo ang babaye kay wala gyoy nagtudlo niya sukad nga naa diay personal nga ngalan ang Diyos. Midawat dayon siyag pagtuon sa Bibliya.

Nagsadya ta uban sa atong mga igsoon sa Brazil kay daghan kaayo ang nagkat-on bahin sa “walay kataposang maayong balita” nga naa sa Pulong sa Diyos aron makaduyog sila sa paghimaya kang Jehova.—Pinadayag 14:6, 7.