E ne bo ayaé asu beluk na be wô’an éyoñe be nji nye’e avale mame da, nge bi avale mefulu da. Ve avale mame di nde e ne dañe bo na be kate wô’an:

•   Abim éyoñ mia yiane lôt a bibu’a ya menda me bôte menan

•   Avale mia yiane belane moné

•   E tyik nge mia ye biaé bon ne momo

 Jé ô ne bo nge mia môt ô nga luk mi nji yene mam avale da?

•  Jam wo yiane yem

•  Jam ô ne bo

 E nye’esan a nji tinane na mia yiane yene mam avale da. To’o beluk ba dañe nye’esan be nji bi ôsimesane wua éyoñ ése éyoñe ba fase mame me ne mfi.

 “Me nga yaé nda bôt é mbe é bo’o mame mese nsamba. Memane me sondô, bi mbe bi kele’e jome bimvame biam, bendômejañ, bésanga, a bone bap. Ve nda bôte nnôme wom é nji be nalé. Ajô te nde, bi nji be bi kui’ tyiñ a lat a abim éyoñ bia yiane lôt a bivuvumane biangan, nge laan a bi bia nyiñ ôyap a bia.”​—Tamara.

 “Bia minga wom bi nji be tyiñ a lat a avale bia yiane belane moné amu bi nji yaé vôma wua. Bengone be ôsu ya alu’u dangan, bi mbe bi sañeta’an abui ajô ete. Bi nga sañetane de abui biyoñ ôsusua na bia kui tyiñ.”​—Tyler.

 Sake éyoñ ése nje minlañ mi ne volô mia na mi kui tyiñ. Éve’an é ne na, mia ye bo aya nge ébu’a ya nda bôt ja ku ôkon, na môt a yiane tuñulu nye? Mia ye bo aya nge nlu’u wua a yi mon, nyu mbok ke teke yi? a

 “Bia minga wom bi nga laan abui biyoñ ajô ya biaé bon. Nye a mbe a yii bon, ajô te, bi nji be bi yene’e mam avale da. Me nji fo’o yem avale bi ne kôm ajô ete a zezé minlañ.”​—Alex.

 Alu’u denan e ne bo mvo’é to’o mi nji yene mam avale nda. Beyeme mam béziñ ba jô na nge mia môt ô nga luk mia kate kui tyiñ a lat a mam me ne mfi, wo yiane bo jam ese ô ne bo mfa’a ya tôé nsôñane wôé, to’o nalé a tinane na ô tyam alu’u dôé. Ve e bo nalé a liti na, nkômbane wôé ô ne mfi a dañe ngaka’a ô nga bo mise me Zambe na, wo ye kabetane môt ô nga luk.

 Nyoñe’e ntyi’ane ya semé ngaka’a ô nga bo éyoñ mi nga lu’an. Nalé a ye volô na mia môt ô nga luk mi kôm ajô ete nsamba, a na ô bo teke yene nye ane nsiñe wôé.

 Ñye’elane ya Bible: “Jôm Zambe a maneya lat, môt a bo’o te kandé je.”​—Matthieu 19:6.

 Mi taté tabe si a fas. Bi tame jô na nlu’u wua a yi bon, nyu mbo’o ki momo. Mame ya taté fase ma:

•   Abime ngul élate jenan é né.

   Ye alu’u denan da ye jibi minju’u ya yale mon?

•   Mbe’e ya bo mbiaé.

   Mbe’e ôte ô nji su’u ve na wo jeñe jôme ya di, jôme ya jaé a étaba’a asu nda bôte jôé.

•   Mame me moné.

   Ye ô ne wulu asu ésaé dôé, nda bôte jôé, a mimbe’e mivo’o mise mvo’é?

 Ñye’elane ya Bible: “Amu za ya be mia, nge a kômbô lôñ ôzomezôm nda, ye a ye bo te taté tabe si a lañe tañ a ye ya’ane je melôñ, nge a bili abim a ne sondô lôñe vie?”​—Luc 14:28.

 Kôme’e fase ajô ete mimfa’a mise. Ô ne bo na mi kui tyiñ mimfa’a miziñ. Nge ajô mi bili da fombô mbiane bon, nluk a nji yi bon a ne sili émiene na:

•   ‘Éyoñe ma jô na me nji yi mon, nalé a tinan aya, ye na me ngenane teke yi mon, nge ke na ma yi yi ki mon?’

•   ‘Ye ma koo woñ amu ma buni na me vo’o bo mbamba mbiaé?’

•   ‘Ye ma koo woñe na môt me nga luk a bo teke beta nyoñe ma ngap?’

 Nlu’u ki a yi bon a ne sili émiene na:

•   ‘Ye bi ntoo fo’o nkômesane ya bo bebiaé?’

•   ‘Ye abime moné bi bili e ne volô bia na bi toñe mon?’

 Ñye’elane ya Bible: “Fe’e je aso yôp . . . e ne . . . te avôle ya selan.”​—Jacques 3:17.

 Semé’é ôsimesane môte mbok. Bôte bebaé be ne fombô jôme jia, ve teke yene je avale da. Avale da fe, beluk bebaé be ne fase jame da, ve môt ase a bili osimesane wé, bi ne nyoñ éve’an a lat a avale môt ase a belane moné. Ôsusu’a na mia zu sañetane mame mene soo jo’ojo’o, mia yiane taté a bevôme mia kui tyiñ.

•   Mfa’a ôvé mia kui tyiñ?

•   Amu jé ôsimesane môt ase ô ne mfi?

•   Asu mfi ya alu’u denan, ye môte wua a ne tyendé ôsimesane wé, nge kañese wu nyu mbok?

 Ñye’elane ya Bible: “Môt a bo’o te jeñe mam mé émien, ve ma môt mbok.”​—1 Becorinthien 10:24.