Me nga bialé Montréal, beta tisone ya Canada e Québec. Kale jam a bobejañe bam bebaé bi nga bi mbamba bebiaé be nga yalé bia abeñe quartier Rosemont. Bi mbe fo’o bi bili abeñe mon ényiñe, e mvo’é été.

Éyoñ me mbe mongô, me mbe me nye’e Bible. Ma simesane éyoñ me nga kui mimbu 12, me mbe me lañe’ ñlañ ya ényiñe Yésus Mfefé élat a me mbe me nye’e wô angôndô ya abui. Ñye’ane wé a nkoone éngôngole a mbe a ko bôt gol ô nga ve ma éva’a ya vu nye. Ve éngôngol ajô é ne na, ôte’eték ôte’etek me nga ke ma vuane nsôñane ôté a taté na ma yeñ a mbia be bôt.

Pepa a mbe mbôme mezik (saxophon), a nji kalane ma ve éko mezike jé, a nga ve fe ma beta nye’ane a mbe a bili asu mezik, a ne mezik me nga su’ulane bo nsôñane ya ényiñ jam. Me mbe me nye’e mezik aval é mbe na, me nga ji’a yé’é aval ba bome mvet. Mvuse ya valé bia bemvôé bam bi nga taté na bia ke bia yia rock bevôme bevôm. Beta be producteur mezik be nga zu yene ma a ve ma fane ya su’u mezike mam. Me nga san afep a beta nda bedisque. Bôt be nga taté na ba yeme mezik mam, amu me mbe me lôte éyoñ ése radio ya Québec.

Me mbe me buni’i na me bili jam ése é mbe é sili ma. Me mbe ésoé, be ñwumulu ma, me mbe me bili abui moné, me bo’o fe ésaé ma nye’e. A môs me mbe me kele’ sport, me bo’o b’interview, me kele’ ma futi éyôlé jam bevome bôte ba yi ; me mbe fe me kele’ kobô be telé. Alu ki me mbe me bo’o abôk a be concert. Me nga taté na ma nyu meyok asu na me bi ayo’o nleme ya yené bôt été, ve me nga su’ulan taté na ma nyu banga. Mimboone miam mi mbe njalan a ésas a mvine mam ya bisôk.

Bôt béziñ be mbe be kômbô ma amu be mbe be buni na ma nyiñe mevak été. Ve nleme wom été me mbe ane ékôkoé ndek, e dañe dañ éyoñ me mbe étam. Me ve ze bi dépression, me nga bo me mate’ étam. Éyoñ me mbe me ntoo zuk ya ényiñe mbôme mezik jam nde be producteur bam bebaé be nga wu SIDA. Nlem ô nga ye ma tebe abum! Me mbe me nye’e mezik, ve ényiñe ya été é mbe é vindane ma nlem.

Ja’a fo’o ésaé jam é mbe é wulu’u mvoé, me mbe me kômô’ô yene na émo é ji bo mvoé. Me mbe me sili’i mamiéne na amu jé bikotekot bi ne abui ana? Me mbe fe me yi na me yem amu jé Zambe a nji bo jôm. Me mbe me ye’elane Zambe asu na me bi biyan ya minsili mite. Môs éziñ bi mbe mone awo’one ane me nga beta taté na ma lañe Bible. Akusa bo me nji be me tu’a wôk mam me mbe me lañe, ve me nga kui na ma simesane na asu’ulan é nga yiane bo bebé.

Nté me mbe me lañe Bible, me nga kui vôm a jô na, Yésus a nga bômbô zaé melu 40 nkôte si. (Matthieu 4:​1, 2) Me nga jô mamiene na nge ma bo ane nye, éko éziñ na Zambe a ye litiban be ma, a ne me nga tyi’i môse ma ye taté na ma bômbô zaé. Sondô ébaé ôsusu’a na ma tôé ntyi’ane wom, Bengaa be Yéhôva debaé be nga kute ma mbé, me nga nyoñe be ve ane me mbe me yange. Me nga fômbô Jacques, Ngaa wua ya été mis été a sili nye na, “Aval avé bi ne ngule ya yeme na bi nga nyiñe melu ya asu’ulan ya émo di?” A nga ve ma éyalan é so’o Bible kalate 2 Timothée 3:​1-5. Me nga sili be abui minsili mife, me mbe fe’e ne vema a mbamba biyalan be mbe be va’a ma bi so’o Kalate Zambe été. Mvuse abime bone milañ éziñ, me nga yeme na me nji bo ntindane ya tyii biji.

Me nga taté na ma yé’é Bible a Bangaa mban. Me nga su’ulane fe tyi’i meyabe bisil me mbe me be’e nlô a taté na ma tabe bisulan bise Aba Éjôé ya vôm me be me too. Aval abeñ bôte be nga nyoñe ma é nga bo na me tua yeme na me yene ya benya mejôô.

E ne fo’o été na, asu na me wulu ane mam ma yé’é ma jô, me nga yane bo beta mintyendan ényiñe jam. Di ôsu, me mbe me yiane telé nyuane banga a mvine ényiñe bisok. Di baa, me be me yiane telé éguñ a jeñe na me dañe fombô ajô ya bôte bevok. Mbôle me mbe me yale’e bone bame bebaé étam, me mbe me yane jalé miyiane iap mifa’a mise. Ane me telé ényiñe mbôme mezik, a kañese ke bo mon ésaé a mbe teke a abui moné.

É nji be tyi’ibi ya bo mintyéndane mite. Dume me be me bo’o a banga é mbe ma étua ayé, me nga ke ôsu a yitane a nkômbane ya beta nyu banga, biyoéne biziñ é nga kui na me beta jt nyu. (Beromain 7:​19, 21-​24) E jô’é mvine ényiñe ya bisôk a be fo’o ayaé ajô. Me mbe me bili atek amu me mbe me saé abui, teke ki bi abui moné. Me mbe me yane saé gon élaé asu na me bi abime moné me mbe me bii éyoñ ma bôme mezik tañe mewolo mebaé.

Meye’elan me nga volo ma na me yeme ngul akusa bo mijuk. Me nga yene fe na a ne angôndô ya mfi ya lañe Bible éyoñ ése. Bifuse biziñ ya Kalate Zambe bi nga ve ma ngule nyul. Aval ane 2 Becorinthien 7:1, a jô Bekristene na be bo bebien “mfuban mfa’a ya mvin ése ya minsôn a nsisim.” Éfuse évok é nga volô ma na me yeme na, me ne dañe mbia mimboone é mbe Bephilippien 4:​13, ja jô na: “Me ne ngule ya bo mam mese be nyô a ve ma ngu.” Yéhôva Zambe a nga yalane meye’elane mam, a ve ma ngule ya wôk a tôñe minye’elane ya Bible. Nalé a nga ve ma ngule ya ve mamiene ngumba be Yéhôva. (1 Pierre 4:​1, 2) Me nga dubane a bo Ngaa Yéhôva mbu 1997.

Me too a nji na nge me nga ye ke ôsu a nyiñe mbia ényiñe wom, nge me wuya kôa. Den me ne benya meva’a! Abeñe minga dam, Elvie, a ne ma nya nya ébotan. Bia nye bese bi ne bekpwa’a mefan, bia nye’e bi ye’ele bôte bevo’o Bible. Nalé a soo ma abui meva’a a me ne teke jembane jôm. Ma ve Yéhôva akiba abui amu a nga dutu ma be nye.​—Jean 6:​44.