Beyôm a beyal ba te tyi’i na ba ba’ale alu’u dap ba yene de ane élat é nji yiane tyamban, nalé a bo na môt ase a tabe ndi a nyô mbok. Nlu’u ase a to mebune na, nyô mbok a ye ke ôsu a semé élate jap ja’a éyoñe minju’u mi né.

Belu’u béziñ be wô’ô simesane na be ne ntindane ya tabe nsamba amu bemvôé bap, nge bôte ba be be ba saé, nge nda bôte jap ba tindi be na be bo teke tyam aluk. Ve nya ajôô a ne na, nye’an a ésemé bi ne zañe beluk mbie bia yiane tindi be na be ba’ale aluk.

ÑYE’ELANE YA BIBLE: “Nnôm a bo’o te kôlô be ngale wé.”​—1 Becorinthien 7:11.

“Nge ô saneya na wo luk, nalé a tinane na wo kañese na wo ye ji’a wô’ô ôlun. Ô ne avôle ya jamé a avôle ya sili njaman. Wo yene mejô ane meve’ele, sa ke ane mame me vo’o kômban nge bo na mi tyam aluk.”​—Micah.

Éyoñe ba tôbane minjuk, belu’u be nji bi ntyi’ane ya ba’ale élate jap be wô’ô ji’a jô na, ‘Metyi mangan me nji tôban’ a be wô’ô jeñ avale be ne kandan.

“Abui bôte da luk é bili ôsimesane na nge alu’u ete é wulu abé be ne ngule ya tyame de. Éyoñe bôte ba luk a aval ôsimesan ôte, élate jap é ne teke mbôka’a éziñ metata’a.”​—Jean.

FASE’ WOMIEN

Éyoñe mia sañetan . . .

• Ye é wô’ô kui na ô jôban amu ô nga lu’u nye?

• Ye wo yeme biyeyem mia môte mfe mi too?

• Ye avale bifia di da kui wo anyu, “Me kôlôya jôme te” nge na, “Ma zu jeñe môte mfe é yeme ba’ale ma”?

Nge ô yalane na ôwé nsili wua ya été nge ke abui ya minsili mite, yeme na éyoñe ya yemete ntyi’an ô nga nyoñe nje ji.

LAAN A MÔTE MIA NYE MI NE NLU’AN

• Ye ntyi’ane bi nga nyoñe na bia ba’ale alu’u dangan ô se’ebaneya? Nge nalé, amu jé?

• Jé bi ne bo éyoñe ji asu na bi yemete élate jangan?

MELEP

• Biyoñe biziñ, tili’i môte mia nye mi ne nlu’an mone kalate a liti na wo nye’e nye

• Liti’i na wo nyan élate jôé éyoñe wo futi befôtô be nyo nnôm nge nyo ngale wofise wôé e nda bisaé

• Loene nye môs ôse éyoñ ô ne ésaé nge ke vôme mfe

ÑYE’ELANE YA BIBLE: “Jôme Zambe a lateya, môt a nji yiane kandé je.”​—Matthieu 19:6, Mfefé Nkôñelan.