Ékôan éfula meyoñ ba loene na be Nations Unies, ja tindi bôte na be su’an, be semé binyiñe bi bôt, a na, be yeme ba’ale si mfuban. Amu jé? Ntili bekalate ba loene na Maher Nasser, a nga tili e UN Chronicle na: “Biyoñ bia tyendé, mewôé me bôt me nembaneya, ékotekot é jaéya si, bita bi ne vôm ase, abui bôte da kôlô mesi map, akon é jaéya fe si ne lut.”

Bevo’o ba simesane na, bijôé bia yiane fulane ngul a saé nsamba asu na mam me kômban. Beta beyeme mam ba loene na, Dante (1265-1321) ba Albert Einstein (1879-1955) be mbe fe be simesa’an avale da. Dante a mbe a buni’i na, mvo’é é vo’o bo nge émo é ne nkandane mengam mengam. A nga ba’alane mejô me Yésus ma: “Ayoñ ese de akandane zañ a siñ ebien de aye jañ.”​—Luc 11:17.

Mvuse Beta Bita II, éyoñe be nga belane bebombe atomique bebaé, Albert Einstein a nga tili Assemblée Générale ya be Nations Unies kalate a jô’ô na: “Asu na mvo’é é bo, da sili na be Nations Unies be ji’a telé ngum éjôé wo ye wulu mam mese ya si.”

Ve, ye bi ne fo’o tabe ndi na, betebe ôsu ya éjôé te ba ye bo zôsôô, ba ye yeme bo ésaé jap, a na ba ye ke bo njet? Ye ke na, ba ye los ane bijôé bise bivok? Minsili mite mia bo na, bi simesan jam ñyeme mam éziñ ya si Énglis, Lord Acton a nga jô, na: “Éjôé ja tindi môte na, a bi mbia mefulu, a éyoñ éjôé é dañeya abui, ja tu’a ndamane môt a bili je.”

Asu na bone be bôt be nyiñe mvo’é été, ba yiane bo nlatan. Ve aval avé be ne tôé nsôñan ôte? Ye jam ete e ne fo’o boban? Kalate Zambe a yalane na, ôwé. Jam ete e ne boban a zene fé? Sa ke a ne zene ya bijôé bi pôlitik y’émo ji bi ne njalan a ékotekot, ve a zene ya éjôé Zambe émien a teléya. A zene ya éjôé éte, Zambe a ye liti na nnye étam a yiane jôé si ése, sa ke bone bôt. Éjôé éte é ne jé? Kalate Zambe a loene je na, “Éjôé Zambe.”​—Luc 4:43, Mfefé Nkôñelan.

Yésus a mbe a kobô’ô ajô Éjôé Zambe éyoñ a nga ye’elan a jô’ô na: “Éjôé jôé é za’ak, nkômbane wôé ô boba’ane si nyô.” (Matthieu 6:9, 10, Mfefé Nkôñelan) Ôwé, Éjôé Zambe ja ye bo na nkômbane Zambe ô bobane si va, sa wu bone be bôt be ne ôkôlôt a ba jeñe ve mfi wop.

Kalate Zambe a loene fe Éjôé Zambe na, “Éjôé ya yôp.” (Matthieu 5:3, Mfefé Nkôñelan) Amu jé? Amu Éjôé éte ja ye jôô si ése é tele yôp. Tame ve’ele simesan jé nalé a tinan. Éjôé éte ja ye ke sili bôte moné, ane e ya’ane toya. Ngo’o avale mbamba jam ete asu bôte ba ye tabe éjôé te si!

Aval éfia “éjôé” ja liti, Éjôé Zambe é bili njôô. Yésus Krist nnye a ne Njôô Zambe émien a nga telé. Kalate Zambe a kobô ajô Yésus a jô’ô na:

• “Ngule ya jôô bôt j’aye bebe nye étule yôp . . . Njôan a jôô bôt a mvo’é bi aye nen te nné.”​—Ésaïe 9:6, 7.

• “Ane a nga veban ngule ya jôô, a étôtok, a [éjôé], ajô te nde bôte bese, a meyoñe  mese, a minkobô mise b’aye bo nye bisaé: njôane wé . . . w’aye bo te lôt.”​—Daniel 7:14.

• “[Éjôé] ya si e nto ji ya Tate wongan, a ji Krist wé.”​—Nlitan 11:15.

Éjôé Zambe ja ye fo’o bo na, nkômbane Zambe ô bobane si va, fo’o ve avale Yésus a nga jô meye’elane mé. Éjôé te si, bone be bôt bese ba ye yé’é avale be ne yeme nyoñe ngap a si asu na é beta bo mbamba vôme ya tabe.

Jame da dañ é ne na, bôte ba ye tabe éjôé te si ba ye bi mbamba ñye’elan. Bese ba ye bi ve ñye’elane wua. Nkandane mengam a jo’ojo’o bia ye fe bo. Ésaïe 11:9 a jô na: “B’aye bo te ndaman nge jian . . . Amu si j’aye jaé ne lut a ñyemane Yéhôva, aval ane mendim m’abuti mañ.”

Bone be bôt bese ba ye bo nlatan a ba ye nyiñe mvo’é été, nsôñane be Nations Unies ba jeñe na be tôé. Besam 37:11 a jô na, “b’aye yen mvaé jap amu abui mvo’é.” Biyoñe bite, bia ye ke beta wô’ô be kobô’ ajô “mewôé me bôt,” “ndamane si,” “azoé” a “bita.” Ve mam mete ma ye tôéban éyoñ évé? Éjôé Zambe ja ye jôé si ése éyoñ évé? Jé Éjôé Zambe ja ye bo? Aval avé ô ne bu’ubane bibotan éjôé éte ja ye so bie? Nlô ajô wo tôñe le wo zu yalane minsili mite.