ÉSA Jean a nga bo Ngaa Yéhôva memane ya mimbu 1950, mone tisone ya Gujerat, e Inde. Jean a mbe a bili bobenyañe bebaé, a bekale belal. Bese a nyia wop, be mbe Bekatôlôs, be vini’i ke ñyebe ésa wop.

Môs éziñ, ésa Jean a nga lôme nye na, a ke ve mvôé jé ya akônda kalate. Ve tyé éte, Jean a nga balé mbia aveñ ônyui, amu a mbe a kômbô’ô yoé angônga. Ve akusa bo nalé, mbôl a mbe a kômbô’ô bo ésa mewôk, nde a nga mane ka’a ônyui, a té ki a mebo na, a ke ve kalate.

Éyoñe Jean a keya kui, a nga koone minga môt a mbe kalate. Nye fe a mbe Ngaa Yéhôva. Éyoñe Jean a nga ve nye kalate, nde minga a nga yen aveñ e mbe nye ônyui, ane a nga kômbô volô nye. A nga ke nyoñe mebiañe me mbe me sili’i, ane a nga kôme mane sôp aveñ, a futi biañ, a mane fe ka’a ônyui. Mvuse ya valé, a nga bo fe Jean élaé kofi, nté ôte ôse a laane nye mbamba minlañe ya Kalate Zambe ane a laan a mvôé jé.

Nalé a nga bo na, évini Jean a mbe a vini’i Bengaa é ke ja man. Jean a nga sili nye minsili mibaé. Mam ésa a mbe a buni’i, me mbe me sela’ane mam a nga yé’é nda Zambe jé. A mbe a kômbô’ô yeme nge Yésus a ne Zambe, a nge Bekristen ba yiane ye’elane Marie. Éyoñe Ngaa ate a nga yeme na, Jean a kobô nkobô Gujarati, nde a nga lañe nye Kalate Zambe nkobô wé, a ve nye nsoé kalate, “Cette bonne nouvelle de royaume” (nkobô Énglis).

Mvuse ya valé, nté Jean a mbe a lañe’e nsoé kalate ôte, a mbe a wô’ôtane ve ane éyoñ ôsu le a taté wô’ô Benya mejôô. A nga ke yene fata wé na, a sili nye minsili mite mibaé. Fata ve zu wô’ô mbia ôlun, a lume nye Kalate Zambe, a jô nye na: “Ô nto Satan! Liti’i ma vôme Kalate Zambe a jô na, Yésus a nji bo Zambe. Liti’i ma vôm a jô na, bi nji yiane kañe Marie. Liti’i ma!” Jam ete e nga bo Jean mbia mintaé nlem, nde a nga jô fata na, “M’ aye ke beta telé mebo mam nda Zambe Bekalôlôs môs éziñ.” A nga bo fo’o aval a nga jô!

Jean a nga taté na a yé’é a Bengaa be Yéhôva, a kañese benya mejôô, a bo fe Ngaa Yéhôva. Éyoñ éte fe bôte béziñe ya nda bôte jé be nga bo avale da. Jean a ngenan a bili éfel ônyui a nga balé aveñ, den a nto mimbu bebé 60. A simesan avale Kristen é nga mvamane nye, mboon ôte ñwô ô nga bo na, a kañe Zambe nya nkañane.​—2 Bec. 6:4, 6.