Siga t’a la ko Bibulu kuru kalanni, o bɛ barika di i ka kanuya ma ka ɲɛsin Jehova ma. Kanuya mago bɛ labaloli la. (1 Piɛrɛ 2:⁠2) Ɲɛnamaya banbali jigiya min bɛ i la walasa k’o to i la, fo i ka taa a fɛ ka gɛrɛ Ala la i kɛtɔ k’a ka kuma kalan.—Yuhana 17:3; Jude 21 kalan.

Ka kɔgɔ Ala dɔnniya kɔnɔ, o bɛna i ka dannaya kɔgɔ. Dannaya bɛna i dɛmɛ k’i kodiya Ala ye. (Heburuw 11:1, 6) A b’i bila ka segin i kɔ ka nimisa ani ka yɛlɛma nafamaw kɛ i ka ɲɛnamaya kɛcogo la.—Kɛwalew 3:19 kalan.

Tuma caman, i ye min kalan, i b’a fɛ k’o jira mɔgɔ wɛrɛ la—a kadi an bɛɛ ye ka kuma kibaru duman kan. Ni i taara fɛ ka Bibulu kalan i bɛn’a dɔn i kan ka baara kɛ ni Bibulu ye cogo min na walasa ka i ka dannaya ɲɛfɔ Jehova ani kibaru duman kan.—Romɛkaw 10:13-15 kalan.

Mɔgɔ caman b’a daminɛ ka kibaru duman in fɔ u teriw walima u dɔnbagaw de ye. O bɛ kɛ ni fɛɛrɛ de ye. Yanni i k’a fɔ u ye ko u ka diinɛ bɛ fili la, kuma u ye Ala ka layiduw kan. A to i hakili la ko i ka kɛcogoya ɲuman, o bɛ nɔ bila mɔgɔw la ka tɛmɛ i ka kuma fɔtaw kan.—2 Timote 2:24, 25 kalan.

Ala ka kuma kalanni o bɛ i dɛmɛ k’i ka alako bonya. O bɛ kɛ sababu ye, i bɛna jɛɲɔgɔnya kɛrɛnkɛrɛnnen sɔrɔ ni Jehova ye. Bi bi in na, i bɛ se ka Ala kɛ i teri ye i kɛtɔ ka kɛ a ka denbaya mɔgɔ dɔ ye.—2 Kɔrɛntekaw 6:18 kalan.

I bɛ se ka taa ɲɛ sɔrɔ alako ta fan fɛ n’i bɛ taa a fɛ ka Ala ka kuma kalan. (Heburuw 5:13, 14) A ɲini Jehova Seere dɔ fɛ a ka Bibulu kalan ni i ye, a kɛtɔ ka o kɛ ni Bibulu bɛ mun de fɔ tigitigi? Gafe ye, ni i bɛ dɔnniya caman sɔrɔ Ala ka kuma kan, i ka ɲɛnamaya bɛ ɲɛ ka taa fɛ.—Zaburuw 1:1-3; 73:27, 28 kalan.

Kibaru duman bɛ bɔ Jehova nisɔndiya Ala yɔrɔ. I bɛ se ka gɛrɛ a la i kɛtɔ ka gɛrɛ a ka jamakulu la. (Heburuw 10:24, 25) Ka taa a fɛ ka cɛsiri kɛ min bɛ i kodiya Jehova ye, i na ɲɛnamaya lakika sɔrɔ ni o ye—ɲɛnamaya banbali ye. Ka gɛrɛ Ala la, o ye ko bɛɛ la fisama ye i bɛ se ka min kɛ.—1 Timote 1:11, MN; 6:19 kalan.