Jehova a Ala de ye furu fɔlɔ siri. Bibulu b’a fɔ an ye ko a kɛlen ka muso fɔlɔ da, a nana “n’a ye cɛ yɔrɔ la.” Hadama nisɔndiyara kosɛbɛ fo a y’a fɔ ko: “Nin ye ne kolow la kelen de ye, ne farisogo dɔ don.” (Jenɛse 2:22, 23) ­Halisa Jehova b’a fɛ furuɲɔgɔnmaw ka kɛ hɛrɛ la.

Ni i b’a fɛ ka furu kɛ tuma min na, a bɛ se ka kɛ i kɔnɔ ko ko bɛɛ bɛna ɲɛ furu kɔnɔ. Nka tiɲɛ yɛrɛ la, hali cɛ ni muso minnu bɛ ɲɔgɔn fɛ kosɛbɛ olu bɛna gɛlɛya dɔw sɔrɔ. (1 Kɔrɛntekaw 7:28) Nin gafenin kɔnɔ, i bɛna Bibulu sariyakolow sɔrɔ, ni i ye u waleya, o bɛ se ka kɛ sababu ye i ka furu ani i ka denbaya ka hɛrɛ sɔrɔ.—Zaburu 19:9-12.

BIBULU BƐ NIN DE FƆ: Cɛ de ye denbaya kuntigi ye.—Efesekaw 5:23.

Ni i ye furucɛ ye, Jehova jigi bɛ a kan ko i bɛna i janto i muso la koɲuman. (1 Piɛrɛ 3:7) A ye muso da k’a kɛ i dafalan ye ani a b’a fɛ i k’a minɛ ni bonya ani kanuya ye. (Jenɛse 2:18) I ka kan ka kɛ i muso fɛ kosɛbɛ fo a bɛ diya i ye ka a ka nafa sɔrɔli bila i ta ɲɛ.—Efesekaw 5:25-29.

Ni i ye furu muso ye, Jehova jigi bɛ a kan ko i bɛna ­bonyaba da i cɛ kan ani ko i bɛna a dɛmɛ walasa a ka se ka a ka furucɛ jɔyɔrɔw dafa. (1 Kɔrɛntekaw 11:3; Efesekaw 5:33) I ka son a ka kolatigɛlenw ma ani ka baara kɛ ni a ye ni i dusukun bɛɛ ye. (Kolosekaw 3:18) Ni i bɛ o kɛ, i bɛna cɛɲa i ­cɛ ani Jehova ɲɛkɔrɔ.—1 Piɛrɛ 3:1-6.

I BƐ SE KA MIN KƐ:

• I furuɲɔgɔn ɲininka i bɛ se ka kɛ furucɛ ɲuman walima furumuso ɲuman ye cogo jumɛn na. A lamɛn ka ɲɛ, ani i ka kan ka min kɛ i ka o kɛ

• Kɛ muɲubaga ye. Ka se k’a dɔn aw bɛ se ka ɲɔgɔn nisɔndiya cogo min na, o bɛ se ka waati ta

BIBULU BƐ NIN DE FƆ: I mago bɛ a la ka i furuɲɔgɔn ka nafaw de ɲini. (Filipekaw 2:3, 4) I furuɲɔgɔn minɛ iko fɛn nafamaba, i hakili to a la ko Jehova b’a ɲini a batobagaw fɛ u ka kɛ ‘dusu sumalenw ye mɔgɔw bɛɛ ye.’ (2 Timote 2:24) “Mɔgɔ dalafiɲɛ ka kuma bɛ joginni kɛ i ko tɛlɛ da duman, nka hakilitigi da bɛ kɛnɛyali kɛ.” O la, i janto i ka kumafɔtaw la. (Ntalenw 12:18) Jehova ka hakili senu bɛna i dɛmɛ ka kuma i furuɲɔgɔn fɛ ni ɲumanya ani kanuya ye. —Galasikaw 5:22, 23; Kolosekaw 4:6.

I BƐ SE KA MIN KƐ:

• Delili kɛ walasa i sumalen ka to ani i labɛnnen ka kɛ lamɛnni kama sani i n’i furuɲɔgɔn ka kuma ko sɛbɛlamaw kan

• I janto i ka kumafɔta la ani i bɛna o fɔ cogo min na

BIBULU BƐ NIN DE FƆ: Ni i furu la, i n’i furuɲɔgɔn ­bɛ ‘kɛ farisogo kelen de ye.’ (Matiyu 19:5) Nka o n’a ta bɛɛ aw bɛɛ ye aw damana mɔgɔ de ye ani a bɛ se ka kɛ aw hakilinataw tɛ kelen ye. O de la aw mago bɛ a la ka aw yɛrɛ dege ka aw miirinantaw ani aw dusukunnataw kɛ kelen ye. (Filipekaw 2:2) Ka kɛ kelen ye o nafa ka bon ni aw bɛna kow latigɛ. Bibulu b’a fɔ ko: “Ɲɔgɔn ye bɛ ko latigɛlen bɛɛ sabati.” (Ntalenw 20:18) A’y’a to Bibulu sariyakolow ka aw ɲɛminɛ ni aw bɛna latigɛli nafamabaw kɛ ɲɔgɔn fɛ.— Ntalenw 8:32, 33.

I BƐ SE KA MIN KƐ:

• I dusukunnataw falen ni i furuɲɔgɔn ye, kana dan kunnafoni walima i hakilinataw dɔrɔn fɔli ma

• Kuma ni i furuɲɔgɔn ye sani i k’i sen don ko dɔ la