Te osi ghi wa si emwa ni bun vbe agbọn na, rhunmwuda uza ne emwa do ba mwẹ ẹmwẹ otu azẹ.

•   Vbe ukpo 2023-2024 vbe Mexico, emwa ni mwẹ obọ vbe ẹmwẹ otu azẹ ni re 39 ẹre a gbua, vbe ẹghẹ na ya gha rhie obọ ye emwa ẹkpẹti; ọna ọre oka ọghe emwa ni bun sẹ na he gbele ba mwẹ ẹmwẹ otu azẹ vbe ẹvbo na. Avbe emwi dan ni bun ọvbehe, ni vbe sunu vbe uwu ẹghẹ na, wa si ohan ye emwa egbe, ọna ẹre ọ si ne emwa ni bun na ghi wa rhie orhiọn hin ẹmwẹ otu azẹ rre vbe Mexico.

•   Emwa ni bun wa do uza vbe Europe, ba mwẹ ẹmwẹ otu azẹ. Vbe May 15, 2024 emwa eso te hia ne iran gbe prime minister ọghe Slovakia rua.

•   September 15, 2024, kegha re ẹghẹ ne ogieva ne emwa eso ya hia ne iran gbe Donald Trump nọ ka re president ọghe United States rua, sokpan ọ ma gba re ne iran; emwi nọ sunu na, keghi wa kpa emwa ni bun vbe ẹvbo ni odin.

 Vbọzẹ ne emwa na do uza ba mwẹ ẹmwẹ otu azẹ? Ọ gha fo ẹdẹ ra? De emwi ne Baibol tae?

 E Baibol ka tae yotọ wẹẹ, vbe ẹghẹ ne ima ye na, nọ re “ẹdẹ okiekie,” emwa ni bun a gha yin uyinmwẹ ọkhọ.

•   “Ẹghẹ nọ wegbe ẹre ẹdẹ okiekie khian gha khin, te emwi hia khian gha lọghọ. Rhunmwuda, . . . emwa i ghi kpọnmwẹ ẹse, emwa i ghi mwẹ ẹkoata, . . . emwa i ghi hoo ne iran ru adọlọ, . . . aro emwa ghi gha kpannọ ugiọnmwẹ erhẹn, . . . emwa ghi gha ya emwa dẹ, emwa ghi ze vbe udu, uhiomwẹ ghi rhu iran aro.”—2 Timoti 3:1-4.

 E Baibol vbe tae yotọ wẹẹ, vbe ẹdẹ okiekie emwa ghi gha gbe ollighi, iran ghi gha sọtẹ da arriọba. (Luk 21:9, futnot) Ọrheyerriọ, uza ne emwa do kevbe avbe ọlọghọmwa ne ẹmwẹ otu azẹ si i khian wa gha rrọọ vbe ẹtẹbitẹ.

 E Baibol gi ima rẹn wẹẹ, Osanobua gha ya arriọba ọghẹe nọ rre ẹrinmwi rhie ihe arriọba emwa nagbọn.

•   “Osanobua ẹrinmwi gha mu arriọba nẹi khian fo vbe otọ gbọọ . . . irẹn gha fuẹn avbe arriọba nii fẹẹrẹ, irẹn ghi gha rrọọ ẹdẹdẹmwẹdẹ.”—Daniẹl 2:44.

 Arriọba Osanobua gha ya emwa hia gha mwẹ akugbe, ọfunmwẹgbe ghi vbe gha rre ehe hia vbe uhunmwu otagbọn.

•   A keghi tie Jesu Kristi nọ re ọba ọghe arriọba ni “Okoro Ọfunmwegbe,” irẹn gha ruẹ ne “ọfunmwegbe . . . gha rrọọ vbe ẹghẹ hia.”—Aizaia 9:6, 7.

•   Uhiẹn vbe ẹghẹ ne ima ye na, emwa hia ne irẹn kha yan, wa hia ne iran gha re emwa ọfunmwegbe. E Baibol khare wẹẹ: “Iran gha ya umozo iran dunmwu emwi nọ yevbe ẹguẹ kevbe asoro iran, iran gha ya dunmwu ikhu. Avbe uhunmwu ẹvbo i ghi khọn okuo ọvbehe, iran ighi mu egbe okuo ọvbehe.”—Aizaia 2:3, 4.

 Deghẹ u hoo ne u rẹn sayọ, ya tie uhunmwuta na “What Will God’s Kingdom Accomplish?” u ghi vbe ghee vidio nọ khare wẹẹ, De Emwi Ne Arriọba Osanobua Khin?