INỌTA 2
Vbua Khian Ya Sẹtin Ruẹ Vbekpa Osanobua Hẹ?
“Gia gha họn ẹmwẹ emwi nọ rre ebe Uhi na vbe unu ruẹ vbe ẹghẹ hia, u ghi vbe gha tie ẹre asọn kevbe avan, u ghi vbe gha muẹn roro, ne u mieke na sẹtin ya emwi hia na gbẹnnẹ yọ gha ru emwi; ẹghẹ nii, agbọn gha maan ruẹ, u ghi vbe gha ya ẹwaẹn ru emwi.”
Jọsua 1:8
“Iran na ye gha ya urhu nọ la tie ebe nii, ọni ọre ebe Uhi ọghe Osa ọghe ẹmwata, iran na gha rhan otọ re ẹse, iran na vbe gi emwa rẹn emwi na yae kha; iran keghi ru iyobọ ne emwa nii ya rẹn otọ emwi na ghaa tie.”
Nehimaia 8:8
“Oghọghọ nọ ne ọmwa nọ ma rhie ude emwa dan . . . , sokpan, te uhi e Jehova yẹẹ ọre, ọ ghi gha tie ẹre, ọ ghi vbe gha muẹn roro, asọn kevbe avan. . . . Emwi hia nọ ru ghi gha dinnodẹ.”
Psalm 1:1-3
“E Filip keghi rhulẹ sikẹ ọre, ọ na họn vbe ọ tie ẹmwẹ ne Aizaia ne akhasẹ gbẹnnẹ yotọ, ọ na ghi nọ rẹn wẹẹ: ‘Wẹ gele rẹn otọ emwi ne uwẹ tie na ra?’ Okpia nii na tama rẹn wẹẹ: ‘Vbia khian ya rẹn otọ re hẹ, vbe ẹ i re te ọmwa rhan otọ re ma mwẹ?’”
“Agharhemiẹn wẹẹ a i bẹghe Osanobua, a gha ghee emwi nọ yi ke na ya bu agbọn gha dee, a gha sẹtin rẹn aro ọmwa nọ khin, rhunmwuda, te aro ọmwa nọ khin wa rhiegbe ma vbe emwi hia nọ yi. Ena hia rhie ẹtin etẹbitẹ nọ mwẹ ma, ọ vbe rhie ẹre ma wẹẹ irẹn ọre Osanobua. Nọnaghiyerriọ, iran i miẹn emwi mu na wẹẹ, ẹre ọ si ẹre ne iran ma na rẹn Osanobua.”
“Gha mu avbe emwi na roro; gi ẹre rọn la ruẹ egbe, ne alaghodaro ne u mwẹ mieke na gha re ne aro emwa hia dae.”
“Wa gi ima vbe gha mu ẹmwẹ egbe roro, ne ima mieke na gua egbe kpa ya gha mwẹ ahoẹmwọmwa, kevbe na vbe gha winna iwinna esi. Wa ghẹ gi ima dobọ iko ne ima koko do yi.”
“Adeghẹ ọmwa rhọkpa vbe uwu uwa gualọ ẹwaẹn, we nọ ye gha nọ Osanobua, Osanobua gha rhie nẹẹn; rhunmwuda, irẹn keghi viọ emwi ne emwa hia wọrhọwọrhọ, ẹ i vbe yae gbe ọmwa okan.”
