Ebe Mak 4:1-41
-
ERRE NE JESU ZẸ VBEKPA ARRIỌBA OSANOBUA (1-34)
-
Erre ọghe ọkemwiokọ (1-9)
-
Emwi ne Jesu rhunmwuda ẹre gha zẹ erre (10-12)
-
Jesu rhan otọ erre ọghe ọkemwiokọ (13-20)
-
A i sẹtin rhu ukpa, na ya okhuae gue ẹre ginna otọ (21-23)
-
Vbene uwa ya rhie ladian, erriọ ẹre uwa khian vbe ya miẹn werriegbe (24, 25)
-
Erre ọghe ọkemwiokọ nọ ya lovbiẹ (26-29)
-
Erre ọghe ikpẹ e mọstad (30-32)
-
Erre ughughan ẹre Jesu ghaa zẹ (33, 34)
-
-
Jesu dobọ okpẹhoho yi (35-41)
4 Ọ keghi werriegbe suẹn gha ma emwa emwi vbe ọkpẹn okun, emwa nibun keghi si koko vbe eke nọ ye. Rhunmwuda ọni, ọ keghi la okọ, ọ na tota, ọ na gberra ghee uwu okun kherhe, sokpan, emwa hia ni gbẹbu na gha rre ọkpẹn okun.
2 Ọ na suẹn gha zẹ erre, nọ ya ma iran emwi nibun; vbe ọ ghi ma iran emwi, ọ na tama iran wẹẹ:
3 “Wa danmwehọ. Ọkemwiokọ ọkpa keghi ya kọ emwiokọ.
4 Zẹvbe nọ ya kọ emwiokọ nii, ikpẹ eso na kharha ku abọ odẹ, ẹre avbe ahianmwẹ na do rhọ iran re.
5 Eso na kharha ye otọ okuta, ne ekẹn i mobọ ye, iran na wa rherhe zọọ, rhunmwuda, eke ne iran kharha yi ma dinmwi gbe.
6 Sokpan, ovẹn ghi yunmwu, ọ na giẹn iran, iran na ghi luẹlua, rhunmwuda, iran i mwẹ inian vbe uwu otọ.
7 Ikpẹ eso na kharha ye uwu igban; avbe igban nii ghi waan rre, iran na khuakhua iran gbua. Rhunmwuda ọni, iran ma ghi mọ.
8 Sokpan, eso na kharha ye otọ nọ maan, iran keghi zọọ, iran na waan, iran na suẹn gha mọ; ọmọ ne iran mọ, na bun sẹ na ya kọ, ọkpa na ya ọgban (30) bun sẹ, ọvbehe na ya iyeha (60) bun sẹ, nọkpa na ya iyisẹn (100) bun sẹ.”
9 Ọ na vbe rhie te ẹre wẹẹ: “Ọmwa nọ mwẹ ehọ na ya họn ẹmwẹ, gi ẹre họn.”
10 Ọ ghi kẹ Jesu ọkpa, erhuanegbe ẹre eso kevbe avbe ukọ ne Iweva, keghi suẹn gha nọ rẹn ọta vbekpa erre nọ zẹ.
11 Ọ keghi tama iran wẹẹ: “Nọ ne uwa, a tae ma uwa nẹ, ighẹ ẹmwẹ oro nọhuanrẹn ọghe Arriọba Osanobua, sokpan, nọ ne emwa nikẹre, erre ẹre a ya gu iran guan,
12 na mieke na miẹn wẹẹ, iran gha rhan aro yotọ, iran i bẹghe emwi rhọkpa; iran gha họn ẹmwẹ, iran i rẹn emwi na yae kha. Rhunmwuda ọni, iran i khian kie werriegbe ẹdẹ, na mieke na yabọ iran.”
13 Yevbesọni, ọ na nọ iran wẹẹ: “Ugbẹnvbe uwa ma rẹn otọ erre na, de vbene uwa khian ghi ya rẹn otọ erre nikẹre hẹ?
14 “Ọkemwiokọ nii ọre ọmwa nọ kọ ẹmwẹ nii.*
15 Ikpẹ ni kharha ku abọ odẹ, keghi re emwa na kọ ẹmwẹ nii ye ọre ekhọe; sokpan, vbe iran ghi wa họn ẹmwẹ nii, Setan keghi rre do rhie ẹmwẹ nii hin iran ekhọe rre.
16 Erriọ vbe ye, ikpẹ ni kharha ye otọ okuta, ọre emwa na miẹn wẹẹ, iran ghi wa họn ẹmwẹ nii, iran na wa ya oghọghọ miẹn ọnrẹn yi vbobọvbobọ.
17 Ọrheyerriọ, ẹmwẹ nii ma gbọzinian vbe ekhọe iran, sokpan, iran na fẹko yae gha gaga khian vbe ovbi ẹghẹ kherhe; ẹghẹ ne orueghe ra ukpokpo ghi ya rre rhunmwuda ẹmwẹ nii, iran na dele kua.
18 Eso vbe rrọọ ni kharha ku uwu igban. Ena ọre emwa ni họn ẹmwẹ nii,
19 sokpan, osi ẹmwẹ agbọn na kevbe erẹrẹ nọ lele ẹfe khian,* kevbe emwi ughughan ne aro iran ghi wu yi nẹ, keghi rẹnrẹn la iran ekhọe, ọ na ya khuakhua ẹmwẹ nii gbua, ọ ma ghi mọ.
20 Nokiekie ọre ikpẹ ni kharha ye otọ nọ maan; ena ọre emwa ni họn ẹmwẹ nii, iran na ya ekhọe hia miẹn ọnrẹn yi, iran na suẹn gha mọ. Ọmọ ne iran mọ, na bun sẹ na ya kọ; eso ya ọgban (30) bun sẹ, eso ya iyeha (60) bun sẹ, eso na ya iyisẹn (100) bun sẹ.”
21 Ọ na vbe tama iran wẹẹ: “Wa he miẹn eke ne ọmwa na rhu ukpa, ọ ghi ya okhuae* gue ẹre ginna otọ ra, ra ọ ghi ya muẹn ye ototọ ebẹdi ra? Ẹ i re erhan ọmukpa, ẹre ọ khian muẹn yan ra?
22 Emwi ọkpa i rrọọ nọ rre ẹkhokho, nẹi khian vẹ vbe okiekie; emwi ọkpa i vbe rrọọ na guere ẹsẹsẹmwẹse, nai khian wee rua vbe okiekie.
23 Ọmwa nọ mwẹ ehọ na ya họn ẹmwẹ, gi ẹre họn.”
24 Ọ na ye vbe tama iran wẹẹ: “Wa yẹrẹro ighẹ ẹmwẹ ne I tama uwa na. Vbene uwa ya rhie ladian, erriọ ẹre uwa khian vbe ya miẹn werriegbe, uhiẹn, wa ghi kue miẹn nọ sẹ ọni.
25 Rhunmwuda, ọmwaikọmwa nọ ka mwẹ, a ghi viọ ba ẹre nẹẹn, sokpan, ọmwaikọmwa nẹi ka mwẹ, uhiẹn, ekherhe nọ te mwẹ, a ghi miẹn ọnrẹn ẹre.”
26 Ọ na vbe kha wẹẹ: “A gha sẹtin ya Arriọba Osanobua gie okpia ọkpa nọ ya kọ ikpẹ emwiokọ ye ugbo.
27 Asọn gha rre, ọ ghi lovbiẹ; ẹdẹ gha gbe, ọ ghi rhiọrre. Emwiokọ nii ghi zọọ, ọ ghi waan. Sokpan, vbene ọ ya sunu hẹ, ọ ma rẹn.
28 Emwiokọ nii ẹre ọ fẹko tobọre zọọ ladian vbe otọ, ọ ke do mọ; vbe okaro, ọ ghi ka gbe ukhu ladian, iyeke ọni, ọ ghi gbe ihiagha, vbe okiekie, ọmọ rẹn ghi do ladian.
29 Sokpan, emwiokọ nii gha ghi wo nẹ, okpia nii ghi ya emwi na ya rhọ emwiokọ rhọ ẹre, rhunmwuda, ẹghẹ na ya rhọ emwiokọ sẹ nẹ.”
30 Ọ na vbe kha wẹẹ: “De emwi na gha ya sẹtin gie Arriọba Osanobua, ra, de erre na gha zẹ, na khian ya rhan otọ re?
31 Te ọ yevbe ikpẹ e mọstad; vbe ẹghẹ na ya kọe, irẹn ẹre ọ ghi tuẹin sẹ vbe uwu avbe ikpẹ emwiokọ hia na ghi miẹn nẹ vbe agbọn na.
32 Sokpan, a gha ghi kọe nẹ, ọ ghi do khian emwiokọ nọ ghi kpọlọ sẹ vbe uwu avbe emwiokọ hia ni ghi mwẹ ebe na re nẹ, ọ ghi vbe zẹlẹ abọ ni kọnkọn. Ẹghẹ nii, avbe ahianmwẹ ni tin vbe orere iso ghi rre do gha bọlọ oko ye ototọ irhu ọghẹe.”
33 Erre nibun vbenian, ẹre Jesu ghaa zẹ vbe ọ gha khian gu iran guan, ọ keghi zẹ erre ma iran, zẹvbe ne iran gha sẹtin rẹn otọ re.
34 Vbene ẹmwata, ẹ i ta ẹmwẹ ọkpa ma iran, vbene ọ ma na zẹ erre, sokpan, ọ gha ghi kẹ irẹn vbe erhuanegbe ẹre ọkpa, ọ ghi rhan otọ emwi hia ma iran.
35 Ọ ghi sẹ ẹghẹ ota nẹ vbe ẹdẹrriọ, Jesu na tama iran wẹẹ: “Wa gi ima fian okun rra gha rrie obọ nọkpa.”
36 Iran ghi gi emwa ni gbẹbu kpa nẹ, iran keghi ya okọ mu e Jesu kpa vbene ọ wa ya gha rre evba. Okọ eso na vbe lele iran.
37 Ẹre okpẹhoho na wa suẹn gha la, amẹ na gha vẹ la uwu okọ, sẹrriọ wẹẹ, kherhe ẹre ọ ghi te kẹ, ne amẹ vuọn uwu okọ nii.
38 Sokpan, Jesu kegha rre odẹ iyeke vbe nene okọ, ọ na lovbiẹ yan ukohunmwu, ọ na gha vbiẹ.* Ẹre iran na ghi ya huẹn ọnrẹn, iran na tama rẹn wẹẹ: “Ọmamwaemwi, wẹ ma bẹghe ẹre wẹẹ, te ima khian ghi wulo na ra?”
39 Ẹre ọ na ghi kpaegbe, ọ na we ne ẹhoho nii wa dobọ yi. Ọ na vbe tama okun nii wẹẹ: “Dobọ yi, ne u hunwan hii!” Ẹhoho nii keghi dobọ yi, ehe hia na do ye hii.
40 Ọ na ghi nọ iran wẹẹ: “Vbọzẹ ne ohan na mu uwa vbenian yi? Wa i he ye mwẹ amuẹtinyan?”
41 Sokpan, orrirri keghi gbe ku iran, ẹre iran na gha gu egbe guan wẹẹ: “De ọmwa ne ọna gele khin, ne ẹhoho kevbe okun wa họn ẹmwẹ na?”
Avbe Futnot
^ Ra “ọmwa nọ kporhu ẹmwẹ Osanobua.”
^ Ra “ẹtin ne ẹfe ya rẹrẹ emwa.”
^ Ra “okhuae na ya mwa emwi.”
^ Ra “ọ na mu uhunmwu yan ukohunmwu gha vbiẹ.”
