IRUẸMWI 22

Vbua Khian Ya Sẹtin Gha Kporhu Iyẹn Nọ Maan Hẹ?

KPẸRE

Zẹvbe ne u ya ruẹ e Baibol, ẹi mwẹ u ma gha roro ẹre wẹẹ, ‘Te ọ khẹke ne emwa hia rẹn emwi ne imẹ ruẹ na!’ Ọ gele khẹke ne emwa hia rẹn ọnrẹn! Sokpan, vbene u gha ya tama emwa ọvbehe hẹ vbekpa emwi ne u ruẹ, sẹtin ya ohan gha mu ruẹ. Gia ziro yan evbọ gha ru iyobọ nuẹn, ne u mieke na gha sọyẹnmwẹ iwinna ikporhu iyẹn nọ maan.

1. De vbene u khian ya gha tama emwa ni sikẹ ruẹ vbekpa emwi ne u ruẹ?

Erhuanegbe Jesu khare wẹẹ: “Ẹi gi ima ru wẹẹ, emwi ne aro ima sẹ nẹ, ehọ mwa vbe họẹn nẹ, ne a ghẹ ghi tae ladian.” (Iwinna 4:20) Iran wa gbọyẹmwẹ ye ẹmwata ne iran ruẹ re, ọni ẹre ọ zẹe ne iran na gha hoo ne iran tama emwa nibun vbekpa re. Deghẹ ọ vbe yerriọ vbe ekhọe ruẹ, loo ẹkpotọ nọ rhirhi kie nuẹn ya gha tama avbe ọse kevbe ẹgbẹe ruẹ vbekpa emwi ne u ruẹ. Gha ya ọghọ vbe ute ru ọna.—Tie Kọlose 4:6.

Odẹ eso ne u gha ya suẹn ikporhu

Uwẹ vbe ọmwa vbe uwu ẹgbẹe ruẹ ghaa guan, u ghi kporhu ma rẹn vbenian: “Ọ mwẹ emwi ne I ruẹ re vbe uzọla na, nọ wa mu mwẹ ekhọe.”
Ya ako ọghe Baibol ọkpa rhie igiọdu ne ọse ruẹ nọ khuọnmwi, ra nọ si osi.
Ọmwa vbe isiwinna gha nọ ruẹ vbene emwi hia ghi vbe ye hẹ, u ghi tama rẹn emwi ne u ruẹ re vbe iruẹmwi e Baibol ruẹ, ra vbe iko.
Gie wẹbsait ọghomwa nọ re jw.org ma avbe ọse ruẹ.
Tama emwa ọvbehe ne iran deba ruẹ vbe u ghaa ruẹ e Baibol, ra u ghi gie ẹre ma iran, ako ne a na nọ na do gha gu ọmwa ruẹ e Baibol vbe jw.org.

2. Vbọzẹ nọ na khẹke ne u hia ne u gha lele etẹn ni rre iko yo ikporhu?

Erhuanegbe Jesu ma gha kporhu ma emwa ne iran rẹnrẹn ọkpa. Jesu “keghi gie iran eveva ke odaro gha rrie” ẹvbo ughughan, ne iran ya gha kporhu. (Luk 10:1) Emwamwa ne Jesu ru na, ẹre ọ ya emwa nibun họn iyẹn nọ maan. Ọ vbe gha sẹ erhuanegbe Jesu ọyẹnmwẹ, ne iran na koko gha kporhu. (Luk 10:17) Uwẹ gha sẹtin hia, ne u suẹn gha lele etẹn ni rre iko yo ikporhu ra?

GUALỌ OTỌ RE SAYỌ

Gia ziro yan evbọ gha ru iyobọ nuẹn, ne ohan ghẹ ghi mu ruẹ, ne u mieke na gha sọyẹnmwẹ iwinna ikporhu iyẹn nọ maan.

3. E Jehova gu ruẹ rrọọ

Ohan sẹtin gha mu emwa eso ni te hoo ne iran gha kporhu, rhunmwuda, iran ma rẹn aro ne emwa khian ya gha ghee iran, ra obọ ne emwa khian ya gha mu iran.

Vbene u gha ya tama emwa ọvbehe vbekpa emwi ne u ruẹ, ya ohan mu ruẹ ra? Vbua gu kha vberriọ?

Kpee VIDIO na, iyeke ọni, uwa ghi ziro yan inọta nọ lelẹe.

E VIDIO: I Keghi Rinmwian E Jehova Nọ Rhie Udinmwẹ Mẹ (4:05)

Vbọ ru iyobọ ne avbe igbama na ya do gha mwẹ udinmwẹ?

Tie Aizaia 41:10, iyeke ọni, uwa ghi ziro yan inọta na:

Vbọzẹ nọ na khẹke ne u na erhunmwu deghẹ ohan ma gu ruẹ kporhu?

U ka rẹn ra?

Avbe Osẹe Jehova nibun ma te ka roro ẹre wẹẹ iran gha sẹtin kporhu ma emwa ọvbehe. Vbe igiemwi, ọmwa nọ roro ẹre wẹẹ irẹn i mwẹ esa ne irẹn ye, ẹre Sergey ghaa khin; ọ lọghọ, ọ ke sẹtin gu emwa guan. Ọ na ghi suẹn gha ruẹ e Baibol. Ẹghẹ eso ghi gberra nẹ, ọ na kha wẹẹ: “Agharhemiẹn wẹẹ ohan ghaa mu mwẹ, I na ye sẹtin suẹn gha tama emwa ọvbehe vbekpa emwi ne I ruẹ. Ọ wa kpa mwẹ odin wẹẹ, zẹvbe ne I ya tama emwa vbekpa ẹmwata ni rre Baibol, erriọ I ya gha mwẹ udinmwẹ sayọ, amuẹtinyan mwẹ na vbe gha wegbe sayọ.”

4. Gha mwẹ ọghọ

U ghaa kporhu iyẹn nọ maan, ọ khẹke ne u gha kọn ẹmwẹ ta. Tie 2 Timoti 2:24 kevbe 1 Pita 3:15, NW, iyeke ọni, uwa ghi ziro yan avbe inọta na:

Vbua khian ya lele adia ni rre avbe ako ọghe Baibol na hẹ vbe u ghaa kporhu?
Deghẹ emwa eso vbe uwu ẹgbẹe ruẹ ra avbe ọse ruẹ ma ya ẹmwẹ ne u ta yi, vbọ khẹke ne u ru? De emwi nọ ma khẹke ne u ru?
Vbọzẹ nọ na khẹke ne u gha ya ọghọ nọ ọta? Vbọzẹ nọ ma na khẹke ne u gha gbagba iyayi ruẹ ye emwa egbe?

5. Ikporhu iyẹn nọ maan keghi ya ọmwa sọyẹnmwẹ

E Jehova keghi waa iwinna ikporhu iyẹn nọ maan ne Jesu. De aro ne Jesu ya gha ghee iwinna na? Tie Jọn 4:34, iyeke ọni, uwa ghi ziro yan avbe inọta na:

Evbare esi na re keghi maan vbe egbe, ọ vbe ya ima sọyẹnmwẹ. Jesu wẹẹ te ahoo ọghe Erhae na ru, yevbe evbare na re. Ahoo ọghe Erhae, ẹre iwinna ikporhu vbe khin. Vbọzẹ ne Jesu na ya evbare na re gie ahoo ọghe Erhae na ru?
De afiangbe ne uwẹ yayi wẹẹ u gha miẹn vbe u ghaa kporhu iyẹn nọ maan?

Emwi eso ne u gha sẹtin ru

U gha yo iko na do vbe uwu uzọla, hia ne u ruẹ vbene a ya mu ẹmwẹ so hẹ vbe u gha khian kporhu.
Tama ọmwa nọ maa ruẹ emwi wẹẹ, u hoo ne u gha mwẹ obọ vbe abọ ọghe owebe, vbe iko na do vbe uwu uzọla. Owebe na gha mu ruẹ egbe khẹ iwinna ikporhu.
Loo abọ ọghe “Emwa Eso Keghi Kha Wẹẹ” ra “Ọmwa Sẹtin Nọ Wẹẹ” nọ rre ebe na, ya ruẹ ọre yotọ, vbene u gha ya rhie ewanniẹn ne ọmwa nọ nọ ọta, ra nọ gbodan ghee emwi ne u yayi.

ỌMWA SẸTIN NỌ WẸẸ: “Vbe emwi hia ghi vbe ye hẹ na?”