IRUẸMWI 8
Vbọzẹ Ne Osanobua Na Kue Ne Emwi Dan Kevbe Usẹ Gha Rrọọ?
1. De vbene emwi dan ya suẹn hẹ?
Te Osanobua wa rhie ẹghẹ nọ taẹn ne arriọba ọghe emwa nagbọn, nọ mieke na vẹ na rẹn wẹẹ, iran i khian sẹtin sọfurre ye ọlọghọmwa ọghe emwa nagbọn
Emwi dan keghi suẹn vbe otagbọn, vbe ẹghẹ ne Setan ya ta ohoghe nokaro. Odibo nọ gbae ẹre Setan ka wa gha khin, ‘ọ ma mudia gbain ye odẹ ọghe ẹmwata.’ (Jọn 8:44) Ọ na do gha mwẹ iziro nọma khẹke, ọ na gha hoo na gha rhie ne irẹn, ugamwẹ nọ khẹke na gha rhie ne Osanobua. Setan keghi ta ohoghe ma okhuo nokaro ighẹ Ivi, ọ na muẹn rẹrẹ nẹ ghẹ kae yọ ẹmwẹ ne Osanobua tae. Ọ kegha hoo ne okhuo nii ye ẹmwẹ ọghe irẹn ru emwi. Adam na deba Ivi sọtẹ da Osanobua. Emwi ne Adam wa ru nii, keghi sie usẹ kevbe uwu.—Tie Gẹnẹsis 3:1-6, 19.
Ke obọ ne Setan wa ya tama Ivi nọ he ẹmwẹ ye Osanobua obọ, ẹre irẹn ke suẹn gha gbodan ye asẹ ọghe ọdakha nọ yo sẹ ne Osanobua mwẹ. Emwa nagbọn nibun keghi deba Setan ya hẹ yotọ ọdakha ọghe Osanobua. Rhunmwuda ọni, Setan na ghi do khian “ne ọ kha yan agbọn na.”—Tie Jọn 14:30; 1 Jọn 5:19.
2. Abemwiku rre emwi ne Osanobua yi ra?
Te emwi hia ne Osanobua yi wa gba. Emwa nagbọn kevbe avbe odibo ne Osanobua yi keghi re nọ gbae, nọ gha vbe sẹtin họn ẹmwẹ nẹ. (Diuteronomi 32:4, 5) Osanobua keghi yi ima, vbene ọ na fonbọre ne ima, nima gha zẹ ne egbe ima, deghẹ emwi esi ma gha ru, ra emwi dan. Rhunmwuda ọni, ẹkpotọ na ghi kie nima, na ya rhiẹre ma ahoẹmwọmwa nima mwẹ da e Jehova.—Tie Jems 1:13-15; 1 Jọn 5:3.
3. Vbọzẹ ne Osanobua na kue ne usẹ ye gha rrọọ do se ẹghẹ na ye na?
Ke ẹghẹ ne isọtẹ wa ya suẹn vbe ogba ọghe Idẹn, e Jehova keghi kue na gbodan ghe ọdakha ọghe irẹn. Vbọzẹ? Rhunmwuda, te irẹn hoo ne irẹn rhiẹre ma wẹẹ, odẹ ọkpa i rrọọ ne emwa nagbọn khian ya kha yan egbe iran, ne egbe rhọkhọ iran, deghẹ iran na hẹ yotọ ọdakha ọghe irẹn. (Asan-Ibo 7:29; 8:9) Ọna wa dewuarorua vbe ọwarẹ ẹghẹ nọ gberra ukpo 6,000 ne emwa nagbọn ke gha rrọọ. Arriọba emwa nagbọn gbokhuẹre, iran ma sẹtin wabọre rua okuo, uza, a gbọmwa ekueku, ra emiamwẹ.—Tie Jerimaia 10:23; Rom 9:17.
Nọ ya lughaẹn ne Arriọba ọghe emwa nagbọn, ukhamwẹ ọghe Osanobua keghi rhie afiangbe ne emwa ni miẹn ọnrẹn yi. (Aizaia 48:17, 18) Vbe nẹi khian kpẹ gbe, e Jehova gha rhie ufomwẹ ye Arriọba ọghe emwa nagbọn hia. Emwa ni zẹ ne egbe iran ọkpa, niran gha rre ototọ ọdakha ọghe Osanobua, ẹre ọ khian yin agbọn na.—Aizaia 11:9.—Tie Daniẹl 2:44.
Ghee vidio nọ mwẹ uhunmwuta nọ khare wẹẹ Vbọzẹe Ne Osanobua Na Kue Ne Emwa Gha Susẹ?
4. De ẹkpotọ nọ kie nima rhunmwuda ne Osanobua na ziengbe?
Setan tae wẹẹ, emwi nima rhunmwuda re ga e Jehova ma gberra afiangbe nima miẹn vbe obọ re. U gha hoo nu ye Setan khian ọmwa ohoghe ra? U gha sẹtin! Rhunmwuda ne Osanobua na ziengbe, ẹkpotọ keghi kie ne ima hia fẹrẹ ya rhiẹre ma deghẹ Arriọba Osanobua ẹre ima gualọ ra ọghe emwa nagbọn. Odẹ nima ya yin, ẹre ọ rhiẹre ma Arriọba nima zẹ.—Tie Job 1:8-12; Itan 27:11.
5. De vbene ima khian ya zẹ Osanobua hẹ zẹvbe nọ kha yan ima?
Azẹ ne egbọmwa ọghe ima gha rhiẹre ma adeghẹ ma hoo ne Osanobua gha kha yan ima
Ma gha sẹtin zẹ Osanobua zẹvbe nọ kha yan ima deghẹ ima na gha ruẹ vbekpae irẹn kevbe na gha mwẹ obọ vbe ugamwẹ ẹmwata nọ hẹnhẹn egbe yan ẹmwẹ ọghẹe, ne Baibol. (Jọn 4:23) Ma gha sẹtin rhiẹre ma wẹẹ, ma i rre ototọ ukhamwẹ ọghe Setan lekpae na wiobọ vbe otu azẹ kevbe okuo, zẹ vbene Jesu ruẹre.—Tie Jọn 17:14.
Setan keghi loo ẹtin nọ mwẹ ya guaekpa uyinmwẹ esakan kevbe uyinmwẹ ikuaengbe. Adeghẹ ima nai mwẹ obọ vbe egbe avbe uyinmwẹ vberriọ, avbe ọse kevbe etẹn ima eso sẹtin ye ima gha gbogiẹ. (1 Pita 4:3, 4) Rhunmwuda ọni, te ima gha zẹ ne egbe ima emwi ne ima gha ru. Ma gha gu emwa ni hoẹmwẹ Osanobua muobọ ra? Ma gha rrie owẹ lele avbe uhi ọghẹe ne ahoẹmwọmwa kevbe ẹwaẹn ye ra? Ma gha ru vberriọ, ma gha rhiẹre ma wẹẹ, ohoghe ẹre Setan tae, ne ọ na kha wẹẹ, ọmwa rhọkpa i khian sẹtin họn ẹmwẹ ne Osanobua adeghẹ ọ na miẹn ukpokpo.—Tie 1 Kọrinti 6:9, 10; 15:33.
Ahoẹmwọmwa ọghe Osanobua suigiẹ yọ wẹẹ, emwi dan kevbe usẹ gha sẹ ufomwẹ. Emwa ni rhiẹre ma wẹẹ iran mwẹ iyayi na, gha sọyẹnmwẹ arrọọ vbe agbọn na, vbe etẹbitẹ.—Tie Jọn 3:16.
