U GHA KHIAN SUẸN GHA GU EMWA GUAN
IRUẸMWI 5
Mu Ẹmwẹ Ye Owa Ẹse
Ilele: “Wa gi ẹmwẹ uwa gha re nọ rhiẹnrhiẹn vbe ehọ vbe ẹghẹ hia.”—Kọl 4:6.
Emwi Ne Pọl Ru
1. Ghee VIDIO na, ra u ghi tie Iwinna 17:22, 23. Iyeke ọni, u ghi mu avbe inọta na roro:
-
De vbene ọ ghaa ye Pọl hẹ vbe ọ bẹghe ẹre wẹẹ, ẹbọ ẹbọ ẹre ọ gba Atẹns?—Ya ghee Iwinna 17:16.
-
De vbene Pọl ya fẹko loo emwi ne Ivbi Atẹns yayi ya kporhu ma iran, nọ gha te ya ya unu kpamisikan ku iran?
Vbe Ima Miẹn Ruẹ Vbe Obọ E Pọl?
2. Adeghẹ ima na gha re emwa ni gua mu ẹmwẹ ye owa, ma na vbe gha guan vbe ẹghẹ nọ khẹke, ẹ i mwẹ ne emwa ghẹ danmwehọ ima.
Ya Egbe Taa E Pọl
3. Gha kọn ẹmwẹ ta. Vbe igiemwi, u gha khian kporhu ma avbe ikeferi, u na gha hoo ne u ya unu kaan ẹmwẹ nọ rre Baibol ra ne u guan kaan e Jesu, u ghi fẹko ya ẹwaẹn lae.
4. Ghẹ wa rherhe gha tama ọmwa wẹẹ, ẹmwẹ nọ ta ma deyọ. Rhie ẹghẹ nẹẹn ya ta emwi nọ rre ọre ekhọe. Adeghẹ ọ na ta ẹmwẹ nọ ma gua emwi nọ rre Baibol ro, hia ne u ghẹ gu ẹre muan ẹmwẹ. (Jems 1:19) U gha gbehọkotọ danmwehọ ọre vbe ọ ghaa guan, u gha rẹn emwi nọ yayi kevbe evbọzẹe nọ na yaeyi.—Itan 20:5.
5. Ọ gha ta ẹmwẹ nọ deyọ, gi ẹre rẹn wẹẹ, ẹmwẹ nọ tae gbae, u ghi vbe tian rẹn yọ. Ọmwa nii sẹtin wa ya ekhọe hia yayi wẹẹ, te emwi na ma iran ẹre vbe ugamwẹ ne irẹn ye wa gba. U gha khian kporhu ma ọmwa vberriọ, u ghi ya emwi ne u rẹnrẹn wẹẹ, ọ yayi, ne Baibol vbe kue yi ya suẹn gha gu ẹre zẹ iro. Kherhe kherhe, u ghi fẹko ru iyobọ nẹẹn ya rẹn otọ emwi nọ rre uwu e Baibol.
VBE YA GHEE
Itan 25:15; 2Tim 2:23-26; 1 Pit 3:15
