Emwi Ne Emwa Ta Nọ Ma Gba: Avbe Osẹe Jehova i ru emwi ukpo, rhunmwuda, iran ma ya e Jesu yi.

 Ẹmwata Nọ Rrọọ: Ivbiotu e Kristi ẹre ima khin. Ma vbe yayi wẹẹ, obọ e Jesu Kristi ọkpa, ẹre ọmwa khian na sẹtin miẹn imiẹnfan.—Iwinna 4:12.

Emwi Ne Emwa Ta Nọ Ma Gba: Uwa keghi si ighaegbe ye uwu ẹgbẹe, rhunmwuda ne uwa na maa emwa re wẹẹ, ọ ma khẹke ne iran gha ru Emwi Ukpo.

 Ẹmwata Nọ Rrọọ: Ma hoẹmwẹ emwa hia ni rre uwu ẹgbẹe kevbe wẹẹ, ma loo e Baibol ya ru iyobọ ne ẹgbẹe ne iran mieke na gha mwẹ oghọghọ kevbe akugbe.

Emwi Ne Emwa Ta Nọ Ma Gba: Te emwi nibun wa la uwa ban vbe ẹghẹ Emwi Ukpo. Vbe igiemwi, uwa i mwẹ ọghae vbe ọfunmwegbe na sọyẹnmwẹ ọnrẹn vbe ẹghẹ Emwi Ukpo, wa i vbe ru ẹse ne emwa ọvbehe.

 Ẹmwata Nọ Rrọọ: Ẹdẹgbegbe ẹre ima ya zẹ emwi obọ, ma vbe gu emwa hia rrọọ vbe ọfunmwegbe. (Itan 11:25; Rom 12:18) Vbe igiemwi, odẹ ne ima ya do iko kevbe odẹ ne ima ya kporhu keghi guae ro adia ọghe Jesu nọ khare wẹẹ: “Te a rhie ne uwa ọghe ọhẹ, ọhẹ ẹre uwa vbe rhie ẹre ne emwa ọvbehe.” (Matiu 10:8) Deba ọni, ma vbe gi emwa rẹn wẹẹ, Arriọba Osanobua ọkpa ẹre ọ khian sẹtin ru ẹre ne ọfunmwegbe gha rre uhunmwu otagbọn na.—Matiu 10:7.

•   Jesu wẹẹ ne ima gha ye uwu ọghe irẹn rre, ẹre ẹdẹ ubiẹmwẹ ọghe irẹn.—Luk 22:19, 20.

•   Avbe ukọ kevbe erhuanegbe Jesu ma gha do ugie Emwi Ukpo. Ebe na tiẹre New Catholic Encyclopedia keghi kha wẹẹ, “a ma gha ru idugie ọghe ẹdẹ ubiẹmwẹ ọghe Jesu vbene ọ te sẹ ukpo 243 [C.E.],” ẹghẹ na kha na, ọ gberra ukpo iyisẹn nẹ, ne ukọ nokiekie ghi ya wu.

•   Osẹ rhọkpa i rrọọ nọ rhiẹre ma wẹẹ, ikpẹdẹ nogie 25 vbe uki e December, ẹre a biẹ e Jesu, e Baibol ma vbe sunu ye ẹdẹ na biẹ e Jesu.

•   Ma yayi wẹẹ, Osanobua ma kpasẹ yọ ne ima gha do ugie Emwi Ukpo, rhunmwuda, uwu idugie kevbe ilele ọghe igẹbọ ẹre Emwi Ukpo ke zọ ladian.—2 Kọrinti 6:17.

 Te emwa eso ye do ugie Emwi Ukpo, agharhemiẹn wee iran rẹnrẹn wẹẹ, idugie ẹbọ ọre ẹzi ọghe Emwi Ukpo na ru kevbe wẹẹ, e Baibol ma kpasẹ yọ. Emwa vbenian sẹtin gha nọ wẹẹ: Vbọzẹe ne Ivbiotu e Kristi eso i na do ugie Emwi Ukpo agharhemiẹn wẹẹ, emwa nibun mwẹ obọ vbe idugie na? Vbọzẹe ne emwa eso na mu ẹmwẹ na gogogo?

 E Baibol rhie igiọdu ne ima, ne ima gha mu emwi roro, ọni ọre wẹẹ, ma ghi gha loo “ẹwaẹn ne a ya sẹtin roro ẹmwi.” (Rom 12:1, 2, NW ) E Baibol vbe maa ima re wẹẹ, ọ khẹke ne ẹmwata gha yẹẹ ima. (Jọn 4:23, 24) Ẹmwata nọ wẹẹ, ima ma hoo ne emwa gha ye aro dan ghee ima, sokpan te ima khian ye rhie owẹ lele ilele ni rre Baibol, ọ gha khọnrẹn wẹẹ, ọ gha ya ima lughaẹn ne emwa ọvbehe.

 Ẹmwata nọ wẹẹ, ma i do ugie Emwi Ukpo, sokpan ma i gbagba iyayi ọghe ima ye emwa ọvbehe egbe. Emwa ọvbehe ghaa do ugie Emwi Ukpo, ma i vbe fi ukpẹ yọ.