Ọ keghi rhie ẹghẹ, emwa nibun ke ya emwi nọ sunu daa iran waan ne egbe. Ọmwa vberriọ ẹre I ghaa khin. E Barcelona ẹre a na biẹ mwẹ, evba ẹre I na vbe waan, ẹvbo nii keghi re ẹvbo nogieva nọ ghi kpọlọ sẹ vbe Spain. Ehe na tie ẹre Somorrostro vbe ọkpẹn ẹzẹ ẹre ima ghaa ye. Te a wa rẹn emwa ni rre Somorrostro ye emwi dan na ru kevbe ikpẹ ukhunmwu ni wegbe na loo.

 Emọ ihinrin ẹre evbibiẹ mwẹ biẹlẹ, mẹ ẹre ọre ọmọ ọdiọn. Ivbiogue ẹre ima ghaa khin, ọni ẹre ọ si ẹre ne erha mwẹ na rhie mwẹ gha rrie ehe na na gbe tennis, ne I ya gha winna vba; e tẹnnis na rhọ vbe otọ, ọre iwinna ne I ghaa ru. Na kha na, ukpo igbe ẹre I ghaa ye, ughaẹde igbe ẹre I vbe ya gha winna ẹdẹgbegbe. Rhunmwuda ọni, I ma ghi sẹtin yo owebe vbene ihua mwẹ vbe gha yo. Vbe I ghi rre ukpo 14, I na ya gha winna vbe ehe na na dọlọ e masini ughughan yi.

 Vbe ukpo 1975, I keghi deba ivbiyokuo ọghe Spain. Rhunmwuda I hoo ni rhie ẹre ma wẹẹ ọmwa nọ din ẹre I khin, I na ya deba Spanish Foreign Legion nọ rre Melilla, vbe odẹ Okuọ ọghe Africa. Zẹ vbene ẹghẹ ya khian, I na ghi do gha loo ikpẹ ukhunmwu ni wegbe, erriọ I vbe ya gha da ayọn gbe egbe.

 Vbe I ghi sẹ iwinna nii rae, I na werriegbe gha rrie Barcelona, evba nii ẹre I na mu otu dan ọkpa gbọ. Emwi ke emwi ne ima rhirhi miẹn, ẹre ima wa gha do viọ. Ma gha ghi khiẹnnẹ emwi ne ima dulo viọ nẹ, ma ghi ya dẹ ukhunmwu ni wegbe. Usun ukhunmwu ni wegbe ne I ghaa loo ọre LSD kevbe amphetamines, ẹi vbe ọni ọkpa, I na ghi do gha fuẹn vbe uwu oghẹ, I na gha da ayọn gbe egbe, erriọ I vbe ya gha fi etẹtẹ. Avbe uyinmwẹ dan na, keghi ya mwẹ khian ọmwa ne aro ẹre kpannọ ugiọnmwẹ erhẹn. Ehe ke ehe ne I rhirhi gha yo, te I wa gha rhie ovbi abẹ, ovbi ughanmwa ra agege mwẹ. Ọ gha de ọghe na loo ẹre, I i zẹdẹ ghee iyeke.

 Ọ mwẹ asẹ ọkpa ne ima na ya do imọto ọkpa mu, evba nii ẹre avbe olakpa na suẹn gha khu ima khian. U gha miẹn ẹmwi nọ sunu vbe ẹdẹrriọ, te ọ yevbe cinima. Ibiriki 20 ẹre ima fi imọto nii la, iran ghi zẹ zẹ ima khu wẹẹ, obọ iran ma vba ima, iran na ghi suẹn gha filo osisi. Zẹvbe ne ima ya fi imọto nii khian, e draiva ima na ya mu imọto nii kuan emwi, ẹre ima hia na lẹẹ fua. Erha mwẹ ghi họn emwi nọ sunu, ọ na ghi khu mwẹ hin owa rre vbe I ghi sẹ owa.

 Ukpo isẹn ẹre I ya gha lomi yo lomi rre vbe orere, I ma ghi gha mwẹ owa mwẹ odẹ. Ugbẹnso I ghi vbiẹ onurho emwa, uwu imọtọ, aga ne I rhirhi miẹn vbe idunmwu, uhiẹn ya sẹ eke ne itẹ ye; ọ mwẹ asẹ ọkpa ne I vbe ya ya uvun okuta khian owa. I ma ghi rẹn ne I ghi gu agbọn ye, I na gha ghee egbe mwẹ wẹẹ, I wu ẹre ọ maan sẹ ighẹ I ye rre agbọn. I ye yerre wẹẹ, ẹghẹ ke ẹghẹ ne I ya loo ukhunmwu ni wegbe, I i ghi rẹn ẹghẹ ne I ya ya abẹ valọ egbe mwẹ. Avbe ama nii, wa ye rrọọ mwẹ egbe do sẹ ẹdẹnẹrẹ.

 Vbe I rre ukpo 28, iye mwẹ na gha gualọ mwẹ khian, ọ ghi miẹn mwẹ, ọ na wẹẹ ne I werriegbe gha die owa. I ghi sẹ owa, I na yan ma rẹn wẹẹ, I gha fi uyinmwẹ werriẹ, sokpan ọ wa rhie ẹghẹ I ke do sẹtin mu uyinmwẹ dan ne I guẹ fua.

 Ẹdẹ ọkpa, Osẹe Jehova eva na do kporhu vbe owa ima. Vbe I ghi danmwehọ iran, erha mwẹ na wa ke ughugha davan wẹẹ, ne I bie ẹkhu gbe iran. I ma zẹdẹ zẹyọ ẹre re, rhunmwuda ọmwa nọ wa ze utun vbe ehọ I ghaa khin. Iran na ghi viọ ebe eha mẹ; ẹre I na ghi nọ iran ehe ne iran do iko. Ọ ghi rre ikpẹdẹ eso, I na gha rrie Ọgua Arriọba ọghe iran.

 Emwi okaro ne I bẹghe vbe I sẹ evba, ọre odẹ ne iran hia ya mu egbe, te ehia wa mu egbe ẹse. Sokpan nọ ne imẹ, te eto nọ rrọọ mwẹ uhunmwu wa tan, I ba ẹtu, ukpọn ni yọ vbe yanghan. Ọ na wa dewuarorua wẹẹ, ẹre ọmwa vbene imẹ ye, ẹre a gualọ mwa, rhunmwuda ọni, ekhue ma ghi gu mwẹ la owa. Emwi ghi wa ru aro, I na wa bẹghe ọse mwẹ ọkpa na tie ẹre Juan, otu ọkpa ma gba gha ye, ọ na wa mu egbe ẹse. Okiekie ẹre I ghi ya rẹn wẹẹ, ukpo nọ gberra ẹre ọ khian Osẹe Jehova. Ọna ẹre ọ ghi ya mwẹ la uwu iko nii. Ẹdẹrriọ, ẹre emwi suẹn gha fi werriẹ vbe arrọọ mwẹ.

 I na wẹẹ ne iran do gha ya e Baibol maa mwẹ emwi. I na do bẹghe ẹre wẹẹ, deghẹ I hoo ne I gha re ọse Osanobua, te ọ khẹke ne I ban uyinmwẹ dan nọ gua mwẹ obọ ro. Ọ ma zẹdẹ gha khuẹrhẹ mẹ ne I mu avbe uyinmwẹ dan nii fua. Sokpan I rẹnrẹn wẹẹ, deghẹ I hoo ne I ya ẹko rhiẹnrhiẹn Osanobua, te ọ khẹke ne I ‘gie Osanobua fi [mwẹ] ekhọe werriẹ.’ (Rom 12:2) I keghi wa gbọyẹmwẹ ye itohan ne Osanobua mwẹ ghee mwẹ. Agharhemiẹn wẹẹ I ghaa ru emwi dan nibun, ọ na ye kie ẹkpotọ mẹ ne I ya fi werriẹ. Emwi ne I ruẹ re vbekpae Jehova na wa mu mwẹ orhiọn. Ọ na do ya mwẹ rẹn wẹẹ, Ayi rrọọ nọ gele hoẹmwẹ mwẹ.​—1 Pita 5:​6, 7.

 Ọna ẹre ọ ghi ya mwẹ suẹn gha fi uyimwẹ mwẹ werriẹ. Vbe igiemwi, ma ghi sẹ uhunmwuta ọkpa nọ guan kaẹn itaba vbe iruẹmwi e Baibol ọghomwa, I na ghi tama egbe mwẹ wẹẹ, ‘Adeghẹ Jehova hoo ne I gha re ọmwa nọ huan rẹn vbe emwi hia ne I ru, ọna rhie ma wẹẹ, te I gha ban e ciga na si!’ (2 Kọrinti 7:1) I keghi ya hẹ ehia kua!

 Ọ vbe khẹke ne I dobọ ikpẹ ukhunmwu na loo kevbe na vbe khiẹn yi. Ọna wa vbe rhie ẹghẹ. I ke sẹtin ru ọna, te I gha ban avbe ọse dan ne I gu mu obọ, rhunmwuda, uyinmwẹ iran ma zẹdẹ gha ru iyobọ mẹ ya gha mwẹ alaghodaro vbe odẹ ọghe orhiọn. Zẹvbe ne ẹghẹ ya khian, I na do gha mu ẹtin yan e Jehova, erriọ I vbe gha miẹn ọnrẹn yi iyobọ ọghe avbe ọse ni mwẹ vbe uwu iko. Odẹ ne iran ya hoẹmwẹ mwẹ kevbe obọ ne iran ya gha mu mwẹ keghi re emwi ni ma he miẹn egbọre ẹdẹ. Zẹvbe ne ẹghẹ ya khian, I na ghi do mu uyinmwẹ dan ni gua mwẹ obọ ro fua, I na do gha mwẹ uyinmwẹ esi, ena hia ẹre ọ ghi ya mwẹ do khian ọse ọghe Osanobua. (Ẹfis 4:​24) Ọ ghi rre August 1985, I na ghi dinmwiamẹ zẹvbe ọkpa vbe Osẹe Jehova.

 E Baibol keghi ya mwẹ khian ọmwa nọ rẹn enegbe. Ọ keghi ru iyobọ mẹ ya ban uyinmwẹ dan ne I ghaa mwẹ, nọ te mu mwẹ agbọn rhia. Vbene I gu uwa guan na, ọ gberra iran 30 vbe uwu avbe ọse mwẹ ne emianmwẹ AIDS kevbe ikpẹ ukhunmwu ni wegbe he gbele vbe iran ye rre igbama. I kpọnmwẹ e Jehova nọ na ru iyobọ mẹ ya ya ilele ni rre Baibol ru emwi, ọna ẹre ọ zẹe ne ọkhọọ nọ rhuan iran ma na rhuan mwẹ.

 Abẹ kevbe ovbi ughanmwa ne I ghaa viọ lele egbe ya gbinna, khian okha nẹdẹ nẹ. I ma te rẹn hiehie wẹẹ, ẹdẹ dee ne I khian ya gha ya e Baibol ru iyobọ ne emwa. Nian, iwinna ugamwẹ ẹghẹ hia ọghe Avbe Osẹe Jehova ẹre imẹ vbe ọvbokhan ghi ye.

 Evbibiẹ mwẹ ma khian Osẹe Jehova, sokpan iran wa gbọyẹmwẹ ye odẹ ne Baibol ya fi arrọọ mwẹ werriẹ. Ẹghẹ ke ẹghẹ ne emwa ya ta ẹmwẹ dan vbekpae Avbe Osẹe Jehova, te erha mwẹ ghi sinmwi oseghe ne iran. Ọ keghi vẹẹ ne erha mwẹ rẹn wẹẹ, iyayi ọgbọn ne I mwẹ na, ẹre ọ fi mwẹ werriẹ. Ẹghẹ hia ẹre iye mwẹ ya gha tama mwẹ wẹẹ, ovbimwẹ u kpa rẹn, u gha te rherhe suẹn gha ruẹ e Baibol. Ẹmwata ẹre iye mwẹ wa taa!

 Emwi ne I miẹn vbe agbọn ya mwẹ rẹn nẹ wẹẹ, emwi dan na ru kevbe ikpẹ ukhunmwu ni wegbe na loo, i khian sẹtin ya ọmwa gha mwẹ ọyẹnmwẹ nọ sẹ otọ ẹko. Eban ẹre I ghi mwẹ ọyẹnmwẹ nọ sẹ otọ ẹko, zẹvbe ne I ya ya e Baibol maa emwa emwi. Avbe imamwaemwi na, ẹre ọ zẹe ighẹ I ye rre agbọn.