Ol sel ya barnacle mo ol narafala laef samting blong solwota we oli stap fas aninit long sip, oli mekem bigfala problem long ol man blong sip. Ol samting ya we oli kolem se biofouling, oli mekem se sip i no save ron spid, i kakae plante fuel, mo oli mas tekem i go long seves evri tu yia blong oli klin. From samting ya, ol saentis oli lukluk i go long ol samting we God i wokem blong faenem wan rod.

 Tingbaot: Ol saentis oli faenemaot se skin blong paelot welfis (Globicephala melas) i save klin hem wan. Long skin blong welfis ya i gat sam smosmol samting long hem we oli kolem se nanoridges. From we ol nanoridges ya oli smol we oli smol, hemia i mekem se ol eg blong ol sel ya barnacle oli no save stak long olgeta. Long ol spes bitwin ol nanoridges ya, i gat wan jel long hem we i kilim ded ol nalumlum mo ol bakteria. Welfis ya i wokem ol niufala jel taem olfala skin blong hem i folfoldaon.

 Ol saentis oli gat plan blong wokem bodi blong ol sip folem fasin blong skin blong paelot welfis blong klin hem wan. Bifo oli stap yusum wan spesel pent (antifouling paints). Be, i no longtaem i pas, oli blokem ol man blong oli no moa yusum ol pent ya, from we i posenem ol laef samting long solwota. Ol man blong mekem risej oli faenemaot se oli mas kavremap ful bodi blong sip wetem wan aean we i gat smosmol hol long hem blong wan kemikol we i sef moa blong yusum, i save kamaot long ol hol ya. Nao taem kemikol ya i joen wetem solwota, bambae i kam strong lelebet olsem jel mo i kavremap ful bodi blong sip. Afta we taem i pas, gel ya we i tik olsem 0.7 milimita bae i kamaot, wetem ol sel we i hang long hem. Nao bae sip ya i wokem ol niufala gel blong i kavremap ful bodi blong hem bakegen.

 Tes we oli mekem i soemaot se sipos oli folem niufala rod ya, bambae namba blong ol sip we oli stap tekem i go soa blong klin bae i kamdaon bigwan. Mo hemia i wan gudfala samting, from i sas tumas blong tekem wan sip i go soa blong klin.

 ?Wanem tingting blong yu? ?Skin blong paelot welfis i kamaot olsem nomo? ?O i gat wan man we i wokem?