Wan buk we ol woman oli yusum taem oli givhan long ol mama blong oli bonem bebi blong olgeta, i talem se: “Melek we yu pem long stoa i no save givim evri samting we bebi i stap kasem taem i titi long mama blong hem.” Wan risen from wanem i olsem, hemia se bodi blong mama i jenisim melek ya blong mekem i stret long samting we bebi i nidim.

 Tingbaot: Taem bebi i stap titi long mama blong hem, melek i stap jenis, stat long taem we bebi i stat blong titi go kasem we hem i finis. Taem hem i stat, melek ya i gat moa protin long hem, wetem ol vitamin, mo plante nara gudfala samting, mo wota. Klosap long taem we bebi i finis, i gat moa gris long melek ya, we i mekem bebi i harem se hem i fulap. Mo tu, melek blong mama i stap jenis folem yia blong bebi, mo long ol defren taem blong yia.

 Long naet, melek ya i gat plante moa homon long hem, olsem melatonin [we i mekem man i slip], be long dei, i gat plante moa long ol narafala homon. From we ol homon ya oli jenis long ol defren taem blong dei blong mekem bebi i slip gud o i wekap gud, hemia i givhan long hem blong i gat wan program blong slip mo wekap long stret taem.

 Long ol dei jes afta we mama i bonem bebi, melek blong titi blong hem i gat wan yala kala, mo oli kolem melek ya se colostrum. I isi blong bel blong bebi i tantanem colostrum, we i fulap long plante gudfala samting blong givhan bigwan long bodi blong bebi, nating se hem i dring smol nomo. Long colostrum ya, i gat fulap samting blong faet agensem sik, mo blong protektem smol bebi ya long ol gem we oli traem kam insaed long bodi blong hem. Mo tu, colostrum i klinim gud kat blong bebi we i jes bon, from i halpem hem blong i sitsit.

 Ol mama we oli bonem ol twin, oli no nid blong wari se bambae oli no gat naf melek blong fidim tufala, from we bodi blong mama i mekem moa melek taem i gat nid olsem.

 ?Wanem tingting blong yu? ?Melek we ol mama oli givim long bebi, wetem ol nambawan samting long hem, i kamaot olsem nomo? O i gat wan Man we i wokem samting ya?