Ol man blong stadi oli talem se ol dog oli save smelem samting blong faenemaot yia, man o woman dog, mo filing we ol narafala dog oli gat. Mo tu ol dog oli save kasem trening blong faenem ol bom mo ol drag. Ol man oli yusum ae blong lukluk samting mo blong save samting we i stap raonabaot long olgeta, be ol dog oli yusum nus blong olgeta blong smelem samting. Oli “ridim” samting wetem nus blong olgeta.

 Tingbaot: Fasin blong wan dog blong smelem samting i nambawan moa i bitim yumi ol man. U.S. National Institute of Standards and Technology i talem se wan dog “i save faenem smel blong sam samting insaed long plante milian samting. Oli naf blong smelem save wan kwota blong tispun suga we man i sakem long wan bigfala swiming pul blong Olimpik, mo hemia i wan pruf blong samting ya.”

 ?From wanem fasin blong dog blong smelem samting i gud moa i bitim blong yumi?

•   Nus blong wan dog i wetwet mo i mekem i isi moa blong hem i kasem smel blong ol samting.

•   Nus blong wan dog i gat tu rod blong win i pas long hem—wan i blong pulum win mo narawan i blong smelem samting. Taem wan dog i smelem samting, win i go stret long nus blong hem we i gat scent receptors.

•   Saes blong eria blong nus blong dog we i gat wok ya blong smelem samting, i save kasem 130 skwea sentimeta o moa, be blong ol man, saes blong hem i kasem 5 skwea sentimeta nomo.

•   Ol dog oli gat bitim 50 o moa scent receptors i bitim blong yumi ol man.

 Olgeta samting ya oli mekem se wan dog i save smelem save ol defdefren samting, nating se oli plante we plante. Eksampol, sam man blong stadi oli talem se, yumi save smelem wan sup, be wan dog i save faenemaot evri samting we oli yusum blong kukum sup ya.

 Ol man blong stadi long Pine Street Foundation, we i wan skul we oli stap stadi long kansa, oli talem se bren blong dog mo nus blong hem we i wok tugeta, i “wan long ol beswan masin long planet blong yumi we i save faenemaot smel blong ol samting.” Ol saentis oli stap wokem “ol nus,” hemia ol masin, blong faenem ol bom mo masket, ol samting we wan kantri i blokem blong man i no tekem i kam insaed long kantri blong hem mo ol sik, olsem kansa

 ?Wanem tingting blong yu? ?Fasin blong dog blong smelem samting i kamaot olsem nomo? ?O i gat wan man we i wokem samting ya?