Lukluk ol tok ya, nao ansa long ol kwestin biaen.

1.   ?Weswan long ol tok ya i soemaot fasin blong ol gel long ol muvi, long TV, mo long ol magasin?

2.   ?Weswan long ol tok ya i soemaot fasin we yu yu wantem gat?

 Ating ol ansa blong yu long fas kwestin oli kamaot long Lis 1 mo ol ansa long seken kwestin oli kamaot long Lis 2. Sipos i olsem, yu yu stap soemaot se yu wantem gat fasin we i moa gud i bitim ol yangfala long ol muvi. Be i no yu nomo we i wantem olsem. Tingbaot from wanem yumi talem olsem.

 “Klosap oltaem long ol muvi, gel we i tineja i stronghed mo i gat nogud tingting. I luk olsem se ol narafala oli no save trastem mifala, mo mifala i stap wantem nomo blong pulum ae blong ol narafala mo mekem sinema.”—Erin.

 “Ol gel long muvi mo long TV oli wantem nomo se ol man oli luk olgeta, mo oli tingbaot nomo blong flasem olgeta, ol klos, ol boe, mo blong oli popiula.”—Natali.

 “Long ol muvi, klosap yu no luk wan gel we i laekem blong gat gudtaem, be i no dring, i no slip wetem ol boe, mo i no rebel agensem papa mo mama blong hem. Wan gel we i no mekem ol fasin ya, oli soemaot hem olsem wan gel we i krangke long jos mo i no intres long seks.”—Maria.

 Askem se: ‘?Ol klos, ol aksen, mo ol toktok blong mi, oli rili soemaot prapa fasin blong mi, o mi stap kopi nomo long ol gel long muvi?’

•   Plante yangfala we oli ting se oli stap wokem prapa fasin blong olgeta, oli stap folem nomo fasin we oli luk long ol muvi. Wan yangfala we nem blong hem Karen, i talem se: “Mi stap luk samting ya long smol sista blong mi. Hem i mekem olsem se i stap tingbaot klos mo ol boe nomo. Be hem i gat hed, mo mi save se hem i intres long plante samting. Hem i mekem olsem se i sathed from we long rod ya bambae ol narafala gel oli laekem hem. !Mo hem i gat 12 yia nomo!”

   Baebol i talem se: “Yufala i stop blong letem sistem blong wol ya i jenisim fasin blong yufala.”—Rom 12:2.

•   I no evri gel we i wantem folem fasin we ol muvi oli soemaot. Alexis we i gat 15 yia, i talem se: “Ol muvi oli soemaot ol gel olsem we oli tingbaot olgeta nomo, oli no gat hed, mo oli mekem fasin blong pikinini, be mi ting se bighaf blong mifala i gat hed mo mifala i naf blong luksave samting we i stret mo i no stret. Mifala i no stap drim nomo long wan boe we i taf, be mifala i intres long plante narafala samting.”

   Baebol i talem se: “Olgeta we oli kam bigman finis . . . oli trenem tingting blong olgeta blong luksave samting we i stret mo samting we i rong.”—Hibru 5:14.

•   Ol muvi oli givhan long ol bisnesman, be i no long ol yangfala. Ol big bisnes we oli intres nomo blong mekem mane, olsem ol kampani we oli printim ol buk, mekem ol samting we yangfala i werem, wokem teknoloji mo ol pleplei, oli stat blong pulum ol yangfala bifo we oli tineja. Buk ya 12 Going on 29 i talem se: “Ol bisnesman oli givim tingting se ol tween oli mas werem ol laswan stael, ol jen mo iaring, pentem fes blong olgeta, mo gat ol niufala teknoloji, sipos no, bambae oli no popiula. Ol tween oli stap luk ol advetaesmen we oli pulum tingting blong olgeta long saed blong seks, bifo we oli gat naf yia blong kasem save long samting ya.”

   Baebol i talem se: “Evri samting we oli stap long wol, olsem ol samting we bodi i wantem, mo ol samting we ae i wantem, mo fasin ya we man i flas from ol samting we hem i gat mo i soemaot, oli no kamaot long Papa, be oli kamaot long wol.”—1 Jon 2:16.

 Blong tingbaot: ?Yu stap givhan long hu taem yu tingting tumas long ol sas klos we ol yangfala oli stap pem? ?Hu i rili win sipos yu mas gat laswan mobaelfon, blong yu popiula wetem ol nara yangfala? ?Ol bisnesman oli tingbaot wanem—samting we i gud long yu o samting we i gud long olgeta?

•   Lanem blong kwestinim fasin we ol muvi oli soemaot. Taem yu stap kam bigwan, yu no luk ol samting wetem ae blong yu nomo, be yu lanem blong luksave samting tu. Traem luksave samting we fasin blong olgeta long ol muvi i save mekem long yu. Alana we i gat 14 yia, i talem se: “Ol muvi oli soemaot ol tineja olsem we oli putum moa krim long fes blong olgeta, i bitim klos we oli putum long bodi blong olgeta. Plante tineja oli no luksave se ol krim ya i soemaot nomo se oli wantem blong pulum ae blong ol narafala, be i no mekem olgeta oli luk naes.”

•   Putum prapa mak blong yu long saed blong ol fasin we yu wantem wokem. Traem tingting bak long ol fasin we yu makem long stat blong atikol mo weswan we yu wantem gat. I gud yu stat naoia blong traem wokem ol fasin ya o kam gud moa long olgeta. Baebol i talem se: “Yufala i mas werem niufala fasin we God i givim long yumi. Niufala fasin ya i olsem fasin blong God,” be i no fasin we ol muvi oli soemaot. Baebol i gohed se: “Taswe taem yufala i gat stret save long God, yufala i stap mekem fasin blong yufala i kam niuwan.”—Kolosi 3:10.

•   Jusum ol gudfala eksampol blong folem. Maet yu jusum blong folem wan famle blong yu, olsem mama o anti blong yu. Sipos no, maet yu folem eksampol blong wan woman we yu fren gud wetem hem mo i gat ol gudfala fasin. I gat ol gudfala woman long Kristin kongregesen we ol nara Witnes blong Jehova oli save folem eksampol blong olgeta.—Taetas 2:3-5.

 Wan tingting: Yu save yusum Inglis buk ya Imitate Their Faith blong faenemaot sam nambawan eksampol blong ol woman long Baebol, olsem Rut, Hana, Abigel, Esta, Meri, mo Mata. Ol Witnes blong Jehova oli printim Imitate Their Faith mo yu save faenem long www.isa4310.com.