•  ?Yu stap kam kros oltaem o samtaem nomo?

  •  klosap neva

  •  sam samtaem

  •  evri dei

•  ?Kros blong yu i nogud olsem wanem?

  •  wom

  •  hot

  •  boel

•  ?Yu stap kam kros long hu?

  •  papa o mama

  •  brata o sista blong yu

  •  wan fren

 !Sipos yu luksave se yu mas kontrolem kros blong yu, haf ya i save givhan! Fastaem, tingbaot sam risen from wanem i impoten blong stap kwaet taem narafala i mekem yu yu kros.

 Helt blong yu. Ol Proveb 14:30 i talem se: “Hat we i kwaet, i givim laef long bodi.” Mo buk ya Journal of Medicine and Life i talem se “kros i joen fulwan wetem ol sik blong hat.”

 Ol fren blong yu. Baebol i talem se: “Yu no mas kampani wetem ol man we oli stap kros bitim mak, mo yu no mas go joen wetem man we i save kros kwik.” (Ol Proveb 22:24) Taswe sipos yu stap kam kros oltaem, yu no mas sapraes se ol narafala bambae oli no wantem joen wetem yu. Gel ya Jasmin i talem se: “Sipos yu no lanem blong kontrolem kros blong yu, bambae yu no gat plante gudfala fren.”

 Gudnem blong yu. Etan we i gat 17 yia, i talem se: “Sipos yu stap kam kros oltaem, ol narafala bambae oli luksave samting ya mo bambae oli gat nogud tingting long yu.” I gud blong askem se: ‘?Mi wantem se ol narafala oli tingbaot mi olsem wanem, olsem wan kwaet man we i mekem pis, o olsem wan bom we i rere blong bosta?’ Baebol i talem se: “Man we i no save kros kwik, hem i gat fasin luksave, be man we i no gat longfala tingting, i stap soemaot ol krangke fasin blong hem.”—Ol Proveb 14:29.

 Tingting long ol vas ya mo ol toktok biaen, mo traem ansarem ol kwestin.

•   Ol Proveb 29:22: “Wan man we i stap kros kwik, hem i stap statem trabol, mo man we taem i kros, i laekem tumas blong faerap, hem i stap mekem plante sin.”

   “Taem mi kam tineja, i had blong mi kontrolem kros blong mi. Ol famle long saed blong papa blong mi, olgeta tu oli gat sem problem. Mifala i stap talem se hemia samting we mifala i bon wetem. !I had tumas blong kontrolem kros blong mifala!”—Keri.

   ?Olsem wanem? ?Mi mi stap kam kros kwiktaem? Mi glad taem narafala i presem mi from ol gudfala fasin. Taswe long saed blong ol nogud fasin, ?i stret blong talem se mi bon wetem?

•   Ol Proveb 15:1: “Wan ansa we i kaen, i mekem man i no moa kros, be toktok we i no kaen, i mekem man i kros moa.”

   “Bigfala samting se yu mas lanem blong kontrolem ol filing blong yu. Sipos yu lanem blong stap kwaet mo yu tingting long positif saed blong ol samting, bambae kros i no wan fasin blong yu.”—Daril.

   ?Taem narafala i mekem mi mi kros, from wanem fas samting we mi mekem i impoten?

•   Ol Proveb 26:20: “Taem i no gat faeawud, faea i ded.”

   “Taem mi ansa long kaen fasin, klosap oltaem narafala i kam kwaet, nao mitufala i save toktok gud tugeta we ol filing blong kros oli no pulum mitufala.”—Jasmin.

   ?Olsem wanem ol toktok mo aksen blong mi oli save putum faeawud long faea?

•   Ol Proveb 22:3: “Man we i tingting gud i luksave we trabol i stap kam, nao i go haed, be man we i no gat ekspiriens, hem i gohed nomo, i no wantem save, mo biaen i safa from.”

   “Samtaem mi nidim nomo blong go wokbaot mo tektaem blong tingting gud long samting we i hapen, nao taem tingting blong mi i kam kwaet mi save stretem problem ya.”—Gari.

   ?From wanem i gud blong go wokbaot, be yu no givim tingting long narafala se yu tanem baksaed long hem?

•   Jemes 3:2: “Yumi evriwan i stambol plante taem.”

   “Yumi sore taem yumi mestem, be yumi mas lanem samting from ol mastik blong yumi. Taem yumi foldaon, yumi mas girap bakegen mo traehad blong kamgud moa nekis taem.”—Keri.

 Traem hemia: I gud blong putum wan mak we yu traehad blong no kam kros blong wan manis. Yu raetemdaon ol samting we i hapen, mo yu luk sipos yu stap kamgud moa.