•  ?From wanem oli wantem wan tatu?

•  ?Wanem sam kwestin we i gud blong askem?

•  ?Wanem advaes blong Baebol we i stret long ol tatu?

 Yangfala Ryan i talem se: “Sam tatu oli olsem ol naes droing.”

 Maet yu harem se yu gat wan gudfala risen blong kasem wan tatu. Olsem yangfala Jillian, we hem i talem se: “Wan gel long skul, taem hem i smol, mama blong hem i ded. Taswe taem hem i kam bigwan, hem i mekem wan tatu blong nem blong mama blong hem long bak blong nek blong hem. Mi ting se wan tatu olsem i naes.”

 Nomata wanem tingting i pulum yu blong wantem wan tatu, tingting gud bifo we yu katem mo putum ink long skin blong yu we i blong stap olwe. ?Wanem sam kwestin we i gud blong askem? ?Mo wanem advaes blong Baebol we i save givhan long yu blong mekem wan gudfala desisen?

 ?Ol tatu oli denja long helt blong mi? Websaet blong Mayo Clinic i talem se: “Taem oli mekem tatu long yu, oli brekem skin blong yu. Sipos wan doti i go insaed, hem i save solap o yu save kasem wan soa long ples ya. Samtaem ol smosmol lam oli kamkamaot raonabaot long ink we oli putum long tatu. Mo taem skin we i brok i kam gud bakegen, samtaem hem i no moa smut.” Websaet ya i talem tu se: “Sipos i gat sam blad blong narafala i stap long ol tul we oli yusum, yu save kasem wan sik.”

 ?Bambae ol narafala oli tingting olsem wanem long mi? Taem ol narafala oli luk yu, oli kasem wan tingting long saed blong yu. Maet oli kasem se yu bigman long tingting blong yu o yu pikinini yet, oli save trastem yu o nogat. Yangfala Samantha i talem se: “Taem mi luk wan man we i gat tatu, wantaem nomo mi tingbaot hem olsem wan man we i dring tumas mo i lafet bitim mak.”

 Melanie we i gat 18 yia, i gat wan narafala tingting, i se: “Long tingting blong mi, ol tatu oli haedem ol gudfala fasin blong man. I olsem se man i kavremap trufala fasin blong hem wetem ol tatu, blong narafala i no save luk.”

 ?Bambae mi laekem tatu ya olwe? Taem ol yia oli stap pas, wan tatu i save jenis nao i no moa luk naes, maet from we man i kam fatfat o i kam olfala. Yangfala Josef i talem se: “Mi luk tatu we samfala oli mekem 20 0 30 yia bifo, mo naoia oli no moa luk naes nating.”

 Allen we i gat 21 yia, i talem se: “Taem ol yia oli pas, plante tatu oli no moa gat mining. Taem man i kasem wan tatu, samting we tatu ya i soemaot i impoten long hem, be plante yia biaen i no moa impoten.”

 Tingting blong Allen i stret. Ol man oli kam olfala, tingting blong olgeta i jenis, ol samting we oli laekem mo tinghae long olgeta i jenis, be ol tatu oli stap sem mak. Yangfala Teresa i talem se: “I nogud mi kasem wan tatu from wan krangke filing blong mi blong smoltaem, we plante yia biaen mi save harem nogud from. Mi gat wan lis finis blong ol samting we mi sore se mi bin mekem, i nogud mi ademap moa.”

 Man we i bigman long tingting blong hem i tekem taem blong tingting gud bifo we hem i mekem wan desisen. (Ol Proveb 21:5; Hibru 5:14) Tingbaot ol advaes ya blong Baebol we i stret long ol tatu.

•  Kolosi 3:20: “Yufala ol pikinini, yufala i mas obei long papa mo mama blong yufala long evri samting, from we Masta i glad long fasin ya.”

    ?Wanem i save hapen sipos yu stap yet wetem papa mo mama blong yu be yu no respektem advaes we tufala i givim blong lidim yu?

•  1 Pita 3:3, 4: “I nogud yufala i flasem bodi nomo blong i luk naes, olsem yufala i tanem hea blong yufala mo yufala i putum ol flas samting we oli wokem long gol, no ol flas klos. Be i gud ol samting we oli stap long hat blong yufala oli flasem yufala, hemia se yufala i gat pis long laef blong yufala, mo yufala i kwaet woman . . . hemia i no save kam nogud samtaem.”

    Long tingting blong yu, ?from wanem Baebol i makem “ol samting we oli stap long hat” blong yumi?

•  1 Timoti 2: 9: “Taem ol woman oli flasem olgeta, oli mas putum ol klos we i . . . soemaot se oli gat respek mo stret tingting.”

    ?‘Ol klos we i soemaot se oli gat respek’ i minim wanem? ?From wanem oli naes moa i bitim ol tatu?

•  Rom 12:1: “Yufala i givim bodi blong yufala i go long God olsem wan sakrefaes we i laef mo i tabu, mo we God i glad long hem. Hemia wan tabu wok we yufala i mas yusum gud tingting blong yufala blong mekem.”

    ?From wanem God i intres long samting we yu mekem long bodi blong yu?

 Folem ol samting we yumi tokbaot finis, plante man oli mekem desisen blong no kasem wan tatu. Blong talem stret, oli faenem samting we i moagud i bitim ol tatu. Teresa we yumi tokbaot finis, i talem se: “Sipos i gat sam toktok we yu laekem tumas, o wan man o woman we i impoten long yu, ale folem toktok ya long laef blong yu o talem long man o woman ya olsem wanem oli impoten long yu. Taem yu laef folem samting we yu bilivim, hemia i moa gud i bitim wan tatu.”