“Mi stap joen oltaem wetem ol fren blong mi nomo, mo i had blong mi go joen wetem ol narafala.”—Alan.

 “Mi gat wan smol grup blong ol fren we mi laekem blong joen wetem olgeta. Mi no lan blong go toktok long ol man we mi no savegud olgeta.”—Sera.

 ?Yu tu yu harem olsem Alan mo Sera? ?Yu yu gat wan smol grup blong ol fren we yufala i stap joen tugeta oltaem, mo i had long yu blong faenem ol niufala fren?

 Sipos i olsem, atikol ya i save givhan long yu.

•  Ol problem we i save kamaot taem yu joen wetem wan smol grup nomo

•  Samting we yu save mekem

•  Sam yangfala oli talem wanem

 I no rong blong gat wan grup blong ol fren we yu joen gud wetem olgeta. Ating yu glad taem yu gat ol fren we oli savegud yu mo oli laekem yu nating se oli save ol slak fasin blong yu.

 “Yumi ol yangfala, yumi wantem tumas se ol narafala oli laekem yumi mo yumi joen long wan grup. Hemia i mekem yumi harem gud.”—Karen, 19.

 ?Yu yu save? Jisas i gat plante fren, mo sam long olgeta hemia ol 12 aposol blong hem. Be i gat tri long ol 12 aposol ya we hem i joen moa wetem olgeta, hemia Pita, Jemes, mo Jon.—Mak 9:2; Luk 8:51.

 Be sipos oltaem yu joen wetem wan smol grup nomo, mo yu no wantem joen wetem ol narafala, i save gat sam problem we i kamaot. ?Wanem sam long ol problem ya?

•   Hemia i save blokem yu blong yu no faenem sam moa gudfala fren.

   “Sipos yu fren nomo wetem olgeta we oli sem mak long yu, bambae yu mestem janis blong traem ol niufala samting mo blong gat sam moa nambawan fren.”—Evan, 21.

•   Ol narafala oli save ting se yu flas.

   “Sipos yu joen nomo wetem wan smol grup blong ol fren, bambae ol narafala oli save ting se yu no intres blong toktok wetem olgeta.”—Sera, 17.

•   Ol fren ya oli save pulum yu blong jikim mo spolem ol narafala.

   “Taem yu stap yu wan, maet yu no save spolem narafala. Be sipos yu stap wetem ol fren blong yu, nao oli jikim o spolem narafala, maet yu laf mo yu ting se i oraet nomo.”—Jemes, 17.

•   Ol fren ya oli save pulum yu blong mekem wan samting we i nogud.

   “Maet wan man nomo insaed long wan grup i gat ol nogud fasin, be hemia i save pulum evriwan long grup ya blong oli mekem samting we i nogud.”—Matina, 17.

•   Tingbaot se yu wantem gat wanem kaen fasin.

   I gud yu askem se: ‘?Mi mi wantem blong gat wanem kaen fasin? ?Ol fren blong mi oli stap givhan long mi o oli stap spolem ol gudfala fasin blong mi? ?Mi mi rere blong mekem eni samting nomo blong ol fren ya oli laekem mi?’

   Advaes blong Baebol: “Ol rabis fren oli save spolem ol gudfala fasin.”—1 Korin 15:33.

   “Sipos yu joen long wan grup blong ol fren we fasin blong olgeta i no sem mak long yu, bambae oli save pulum yu blong mekem ol samting we yu neva ting se bambae yu mekem.”—Elen, 14.

•   Tingbaot wanem samting we i moa impoten.

   I gud yu askem se: ‘?Mi stap tingbaot moa blong mekem ol fren blong mi oli glad i bitim we mi folem ol rul blong Baebol? ?Bambae mi mekem wanem sipos wan fren blong mi i mekem wan samting we i nogud?’

   Advaes blong Baebol: “Olgeta man we mi mi lavem olgeta, mi stap soemaot rong blong olgeta.”—Revelesen 3:19.

   “Sipos wan fren i mekem wan samting we i nogud mo yu no gat strong tingting blong folem ol rul blong Baebol, maet bambae i had long yu blong go talemaot rong blong hem from we yu no wantem salem hem.”—Melani, 22.

•   Faenem sam moa fren.

   I gud yu askem se: ‘?Mi save traehad blong kasem save moa long samfala we mi no save gud olgeta mo kam fren blong olgeta?’

   Advaes blong Baebol: “Yufala i no mas tingbaot yufala nomo, be yufala i mas tingbaot ol narafala man tu.”—Filipae 2:4.

   “I gat sam yangfala we oli no stap joen wetem ol narafala from we oli stap fesem ol problem long haos. Be taem yu save gud olgeta, plante taem bambae yu faenemaot se oli gat ol gudfala fasin.”—Braean, 19.

 Stamba poen: I no rong blong gat wan grup blong ol fren we yu joen gud wetem olgeta. Be long semtaem, maet i gud sipos yu traehad blong faenem sam moa fren. Baebol i talem se: “Man we i stap mekem ol narafala oli harem gud, bambae ol narafala oli mekem hem tu i harem gud.”—Ol Proveb 11:25.