Nogat, God i no makemaot stret taem blong man i ded. Baebol i no agri long tingting ya, be hem i talem se plante taem wan samting i hapen “we man i no tingbaot,” nao hem i ded from.—Prija 9:11.

?Be Baebol i no talem se i gat “wan taem blong ded”?

 Yes, Prija 3:2 i talem se: “I gat wan taem blong pikinini i bon, mo i gat wan taem blong ded, i gat wan taem blong planem kakae, mo i gat wan taem blong pulumaot kakae.” (King James Version) Be ol vas raonabaot oli soemaot se vas ya i stap tokbaot ol samting we oli hapen oltaem long laef blong ol man. (Prija 3:1-8) God i no makemaot stret taem blong yumi wanwan i ded, sem mak olsem we hem i no fosem wan fama blong planem kakae long wan stret dei. Bigfala poen se, yumi no mas bisi tumas long ol samting long laef blong yumi, nao yumi fogetem God Ya We i Wokem yumi.—Prija 3:11; 12:1, 13.

Yumi save mekem laef i kam longfala

 Nating se yumi no save kontrolem evri samting we i hapen long laef blong yumi, be plante taem yumi save mekem laef i kam longfala, sipos yumi mekem ol waes desisen. Baebol i talem se: “Ol tijing blong man we i waes, oli stamba blong laef, yes, oli pulum man blong i tanem baksaed long trap ya we i lidim man i go long ded.” (Ol Proveb 13:14) Mo tu, Moses i talem long ol man Isrel se oli “save stap longtaem” sipos oli obei long ol loa blong God. (Dutronome 6:2) Be yumi save sotem laef blong yumi, sipos yumi mekem ol nogud fasin mo ol krangke samting.—Prija 7:17.

 Nating se yumi waes mo yumi lukaot gud, be yumi no save ronwe long ded. (Rom 5:12) Be samting ya bambae i jenis, from we Baebol i promes se long fiuja “bambae i no moa gat man i ded.”—Revelesen 21:4.