Yes, from we God i wantem se ol man oli joen wanples blong wosipim hem. Baebol i talem se: “I gud yumi stap tingbaot yumi, blong yumi pulum yumi blong yumi lavem ol narafala, mo blong yumi mekem ol gudfala wok. Yumi no mas les blong kam wanples long ol miting blong yumi.”—Hibru 10:24, 25, futnot.

 Jisas i talem se ol man blong hem bambae oli kam wan grup, hem i se: “Sipos yufala i lavlavem yufala, bambae olgeta man oli save se yufala i disaepol blong mi.” (Jon 13:35) Blong soemaot lav ya, ol disaepol oli mas joen wetem ol narafala we oli gat sem bilif. Olgeta oli joen long ol kongregesen we bambae oli mit oltaem blong mekem wosip. (1 Korin 16:19) Mo olgeta evriwan bambae oli joen olsem wan famle.—1 Pita 2:17.

I no naf nomo blong kam memba blong wan relijen

 I tru, Baebol i talem se ol man oli mas joen tugeta blong wosipim God, be samting ya nomo i no save mekem se God i glad long wan man. Blong God i glad, relijen blong man ya i mas afektem ol aksen blong hem evridei. Eksampol, Baebol i talem se: “Long fes blong God ya we i Papa blong yumi, wosip we i klin mo i no gat doti long hem, i olsem: Man i mas lukaot gud long ol pikinini we oli no gat papa mama blong olgeta mo long ol wido taem oli kasem trabol, mo hem i mas holem laef blong hem i klin, blong wol i no mekem hem i doti.”—Jemes 1:27.