Yes. God i save givhan long olgeta we oli askem samting we i stret long tingting blong hem. Sam man long Baebol oli prea i go long God se: “God, yu givhan long mi.” Stori blong olgeta ya i save leftemap tingting blong yu, nomata se yu neva prea bifo. Hemia sam eksampol:

•   “Hae God, yu yu God blong mi. Plis yu givhan long mi. Oltaem yu yu lavem mi tumas, plis yu sevem mi.”—Ol Sam 109:26.

•   “Hae God, Masta blong mi . . . Plis yu no letem mi mi mekem olgeta we oli trastem yu oli sem.”—Ol Sam 69:6.

I tru se man we i raetem ol toktok ya i bilif strong long God.  Be God i harem prea blong olgeta man we oli prea long hem wetem stret tingting, olsem “ol man we tingting blong olgeta i kam nogud,” mo “ol man we tingting blong olgeta i foldaon olgeta.”—Ol Sam 34:18.

 Yu no mas ting se God i stap longwe tumas nao hem i no wantem save long problem blong yu. Baebol i talem se: “Nating we yu yu hae olsem, oltaem yu stap lukaot gud long ol man we tingting blong olgeta i stap daon. Be ol praod man oli no save haed long fes blong yu.” (Ol Sam 138:6) Mo tu, Jisas i talem long ol disaepol blong hem se: “Ol hea blong hed blong yufala, hem i kaontem evriwan.” (Matiu 10:30) God i luk evri samting long saed blong yu, nating sipos yu yu no save olgeta. !Taswe, bambae hem i lesin sipos yu prea blong hem i givhan long yu blong winim ol wari blong yu!—1 Pita 5:7.