Wael animol we i gat seven hed we Revelesen 13:1 i tokbaot, i minim politik sistem blong fulwol.

•   Hem i gat otoriti, paoa, mo wan tron, mo hemia i soem se hem i wan politik paoa.—Revelesen 13:2.

•   Hem i rul antap long ‘olgeta traeb, olgeta grup blong man, olgeta lanwis, mo olgeta kantri,’ taswe hem i bigwan moa i bitim wan gavman we i rul long kantri.—Revelesen 13:7.

•   Olgeta haf blong ol fo wael animol we i stap long profet tok blong Daniel 7:2-8, oli stap long wael animol ya, hemia se bodi blong hem i olsem wan leped, leg blong hem i olsem blong bea, maot blong hem i olsem blong laeon, mo i gat ten hon. Ol wael animol long profet tok blong Daniel, oli ol king, o ol politik paoa, we oli rul wan afta long narawan, antap long ol narafala nesen. (Daniel 7:17, 23) Taswe wael animol long Revelesen japta 13 i minim evri politik paoa.

•   Wael animol ya i “kamaot long solwota,” hemia ol man we oli no stap kwaet, we olgeta nao oli putumap ol gavman.—Revelesen 13:1; Aesea 17:12, 13.

•   Baebol i talem se namba, o nem, blong wael animol ya, hemia 666, hem i “namba blong man.” (Revelesen 13:17, 18) Toktok ya i soem se wael animol long Revelesen japta 13, hem i no wan paoa blong spirit o dimon, be i wan paoa blong man.

 Nating se ol nesen oli no save agri long plante samting, be olgeta evriwan oli gat wan tingting nomo, hemia blong holemtaet otoriti blong olgeta i bitim we oli stap aninit long rul blong Kingdom blong God. (Ol Sam 2:2) Long Amagedon, bambae oli joen tugeta blong faet agensem ami blong God we Jisas Kraes i lidim, be faet ya bambae i distroem olgeta nesen.—Revelesen 16:14, 16; 19:19, 20.

“Ten hon mo seven hed”

 Baebol i yusum sam namba blong pijarem sam samting. Eksampol, ten mo seven i minim samting we i fulwan. Sipos yumi wantem kasemsave stret mining blong ol “ten hon mo seven hed” blong wael animol long Revelesen japta 13, yumi mas kasemsave long wan narafala wael animol we Revelesen i tokbaot biaen. Animol ya i red, i gat seven hed mo ten hon, mo hem i “pija blong wael animol.” (Revelesen 13:1, 14, 15; 17:3) Baebol i talem se ol seven hed blong red animol ya, oli minim “seven king,” o gavman.—Revelesen 17:9, 10.

 Long sem fasin, ol seven hed blong wael animol long Revelesen 13:1 i minim seven gavman: hemia ol men politik paoa we oli bin rul antap long ol nesen tru long histri, mo oli stap bos strong antap long ol man blong God, i gat Ijip, Asiria, Babilon, Media mo Pesia, Gris, Rom, mo Inglan mo Amerika. Sipos yumi talem se ol ten hon oli minim olgeta kingdom nomata se oli smol o bigwan, i stret tu blong talem se ol hat blong king we i stap long ol hon ya wanwan, oli soem se ol nesen ya wanwan oli stap rul long semtaem wetem men politik paoa we i stap rul long taem ya.