Taem God i wokem fas man mo woman, hem i mekem se tufala i mared. Hem i stanemap mared olsem wan spesel samting blong mekem man mo woman i fasgud tugeta, olsem wan strong fandesen blong famle.—Jenesis 1:27, 28; 2:18.

 God i wantem we ol mared man mo woman oli hapi. (Ol Proveb 5:18) Hem i putum sam loa long saed blong mared long Baebol, wetem sam gudfala advaes blong givhan long mared.

Long atikol ya

•  ?Wanem ol rul blong God long saed blong mared?

•  ?Olsem wanem long fasin blong seraot mo divos?

•  ?Yumi mas rejistarem mared wetem gavman, blong God i glad long hem?

•  ?Baebol i tokbaot wanem wok blong ol hasban mo waef?

•  ?God i talem se ol mared man mo woman tede oli mas gat pikinini?

•  ?Olsem wanem Baebol i save givhan long mared blong mi?

•  Sam vas blong Baebol long mared

 God i stanemap mared blong joenem wan man wetem wan woman. (Jenesis 2:24) God i no agri long fasin blong mared long plante man o woman wantaem, fasin blong homoseksuol, o man mo woman we i stap tugeta be i no mared. (1 Korin 6:9; 1 Tesalonaeka 4:3) Jisas i tijim ol man blong hem blong folem tingting we God i gat fastaem long mared.—Mak 10:6-8.

 Long tingting blong God, mared i blong olwe. Taem wan man mo woman i mared, tufala i promes blong stap tugeta mo stap tru long tufala, blong ful laef blong tufala. God i wantem se tufala i holem promes ya.—Mak 10:9.

 Maet i gat sam taem we hasban mo waef i mas seraot blong smoltaem, olsem sipos wan long famle i kasem trabol, nao wan long tufala i mas travel i go blong givhan long hem. Be Baebol i no wantem se ol problem insaed long mared oli mekem tufala i seraot. Baebol i pulum tufala we i gat problem long mared, blong wok tugeta blong stretem.—1 Korin 7:10.

 Baebol i talem se tufala i save divos from wan samting nomo, hemia adaltri. (Matiu 19:9) Taswe, sipos tufala i mekem desisen blong seraot o divos from wan narafala risen, folem Baebol tufala i no fri blong mared bakegen long narafala, o frenem narafala wetem tingting blong mared.—Matiu 5:32; 1 Korin 7:11.

 God i wantem se ol Kristin oli obei long loa blong gavman long saed blong mared. (Taetas 3:1) Taem tufala i rejistarem mared blong tufala folem loa, tufala i soemaot respek long gavman, mo long loa blong God se mared i wan promes blong olwe. a

•   Ol wok we tufala i serem. Hasban mo waef tufala i mas lavlavem mo respektem tufala. (Efesas 5:33) Wetem lav, tufala i mas givim samting we narawan i nidim long saed blong seks, mo tufala i no mas mekem wan samting blong spolem mared blong tufala. (1 Korin 7:3; Hibru 13:4) Sipos tufala i gat sam pikinini, tufala i serem wok ya blong tijim mo lukaot gud long olgeta.—Ol Proveb 6:20.

   Baebol i no tokbaot ol smosmol wok we wanwan long tufala i mas mekem long haos o blong winim mane. Tufala i save mekem ol desisen ya tugeta, folem samting we i gud long famle.

•   Wok blong hasban. Baebol i talem se “hasban i hed blong waef blong hem.” (Efesas 5:23) Hem i hed long fasin ya we hem i lidim famle, mo i mekem ol desisen we oli gud long waef mo pikinini blong hem.

   Hem i mas traehad blong lukaot gud long famle long saed blong bodi, filing, mo wosip. (1 Timoti 5:8) Hem i soemaot se hem i tinghae long ol gudfala fasin mo save blong waef blong hem, taem hem i lesin long tingting blong hem, mo i tingbaot filing blong hem long ol desisen we hem i mekem. (Ol Proveb 31:11, 28) Baebol i talem se hasban i mas mekem ol wok blong hem wetem lav.—Kolosi 3:19.

•   Wok blong waef. Baebol i talem se “waef i mas gat bigfala respek long hasban blong hem.” (Efesas 5:33) God i glad long waef we i respektem posisen we God i givim long hasban blong hem.

   Wok blong waef i blong givhan long hasban blong hem, halpem hem blong mekem ol gudfala desisen, mo sapotem hem olsem hed blong famle. (Jenesis 2:18) Baebol i presem waef we i mekem gud ol impoten wok blong hem insaed long mared.—Ol Proveb 31:10.

 Nogat. Long taem bifo, God i talem long sam man blong hem se oli mas gat pikinini. (Jenesis 1:28; 9:1) Be oda ya i no blong ol Kristin. Jisas i neva talem long ol man blong hem se oli mas gat pikinini. Mo i no gat wan long ol disaepol blong Jisas tu, we i talem se ol mared man mo woman oli mas gat pikinini. Ol kapol oli save mekem desisen ya.

 I gat ol gudfala advaes long Baebol we i save halpem ol kapol blong statem gud mared blong olgeta. Mo advaes ya i save givhan tu blong oli blokem o winim ol hadtaem.

 Ol advaes blong Baebol i save halpem man mo woman we i mared blong . . .

•   soemaot trufala lav.—1 Korin 13:4-7; Kolosi 3:14.

•   stretem ol tingting we oli defdefren.—1 Korin 10:24.

•   lesin gud.—Jemes 1:19.

•   soemaot respek.—Rom 12:10.

•   fofogivim tufala.—1 Pita 4:8.

•   stap tru.—Mak 10:9.

•   gat longfala tingting.—Efesas 4:2, 3.

•   wok olsem wan tim.—Prija 4:9.

•   mekem tingting i strong moa blong stap tugeta olwe.—Sing Blong Solomon 8:7.