Baebol i soemaot se i no rong blong lavem yu wan, yu save lavem yu wan be yu no bitim mak. Hemia i min se yu save lukaotgud long yu wan, yu respektem yu wan, mo yu no ting nating long yu wan. (Matiu 10:31) Baebol i no leftemap fasin ya blong tingbaot yu wan nomo, be hem soemaot se i stret we man i lavem hem wan be i no bitim mak.

?Yumi mas lavem hu fastaem?

1.   Yumi mas lavem God fastaem. Baebol i tijim se loa we i hae moa hemia se: “Yu mas lavem God blong yu Jehova, long olgeta hat blong yu.”—Mak 12:28-30; Dutronome 6:5.

2.   Mo seken loa we hae moa hemia se: “Yu mas lavem ol man raonabaot long yu olsem we yu stap mekem long yu wan.”—Mak 12:31; Levitikas 19:18.

3.   Nating se i no gat wan loa long Baebol we i talem stret se yu mas lavem yu wan, be loa ya se “yu mas lavem ol man raonabaot long yu olsem we yu stap mekem long yu wan” i soemaot se i stret nomo we yumi lavem mo respektem yumi wan. Sipos yumi no bitim mak bae samting ya i givhan long yumi wan.

?Jisas i lavem hu fastaem?

 Jisas i skelem gud olsem wanem blong lavem God, lavem ol man raonabaot, mo lavem hem wan, mo hem i talem long ol disaepol blong hem blong folem eksampol blong hem.—Jon 13:34, 35.

1.   Hem i lavem Jehova fastaem mo i wok had blong mekem wok blong Jehova. Hem i se: “Blong mekem ol man long wol oli save se mi mi lavem Papa, mi mas mekem ol samting we Papa i talem long mi blong mi mekem.”—Jon 14:31.

2.   Jisas i lavem ol man raonabaot long hem. Hem i mekem olsem taem i givim samting we oli nidim, mo i kasem mak ya we i givim laef blong hem from olgeta.—Matiu 20:28.

3.   Hem i soemaot se i lavem hem wan taem i tekem taem blong spel, kakae, mo i haremgud blong joen wetem ol disaepol blong hem mo sam narafala bakegen.—Mak 6:31, 32; Luk 5:29; Jon 2:1, 2; 12:2.

?Olsem wanem, sipos yu lavem narafala fastaem bae yu lusum glad mo ting nating long yu wan?

 Nogat, from we God i wokem yumi blong tekem fasin blong hem. Mo stamba fasin blong hem hemia se hem i lavem ol man. (Jenesis 1:27; 1 Jon 4:8) I min se hem i wokem yumi long fasin we yumi tu yumi save lavem ol narafala. I tru se yumi save lavem yumi wan kasem wan mak we i stret, be taem yumi lavem God fastaem mo ol narafala yumi glad moa. Baebol i tokbaot samting ya tu i se, “man i harem gud moa taem hem i givim samting long narafala, i bitim we hem i kasem samting.”—Ol Wok 20:35.

 Tede plante man oli talem se man i glad taem hem i tingbaot hem wan fastaem. Long olgeta ya, oli putum tok ya “lavem yu wan” long ples blong tok ya “lavem neba blong yu.” Be eksperiens tede i soem se helt blong man i gud moa mo man i glad moa taem hem i folem waes advaes ya blong Baebol se: “I nogud man i stap lukaot rod we i save givhan long hem nomo. Hem i mas lukaot rod blong givhan long ol narafala man.”—1 Korin 10:24.