Rong tingting: God i stanemap Sabat dei taem hem i spel long namba seven dei.

 Trutok: Baebol i talem se: “God i blesem namba seven dei mo i mekem i tabu, from we long dei ya, hem i spel long ol wok we hem i krietem mo mekem.” (Jenesis 2:3, King James Version) Vas ya i no talem wan loa we ol man oli mas folem, be i talem nomo samting we God i mekem long namba seven dei blong kriesen. Baebol i no tokbaot eni man bifo long taem blong Moses we i kipim sabat.

 Rong tingting: Ol man Isrel oli stap aninit long loa blong Sabat bifo we oli kasem Loa blong Moses.

 Trutok: Moses i talem long ol man Isrel se: “Jehova God blong yumi, i mekem wan kontrak wetem yumi long Horeb,” hemia eria klosap long hil ya Sinae. Insaed long kontrak ya, i gat loa blong Sabat. (Dutronome 5:2, 12) Sabat i wan niufala samting long ol man Isrel. God i talem se Sabat dei i mas mekem oli tingbaot taem ya we hem i mekem olgeta oli kamfri long wok slef long Ijip. ?Olsem wanem i save mekem samting ya sipos oli bin stap aninit long loa ya bifo finis, taem oli stap long Ijip? (Dutronome 5:15) Sipos oli stap kipim Sabat finis, ?from wanem God i talem long olgeta se oli no mas pikimap mana long namba seven dei? (Eksodas 16:25-30) ?Mo from wanem oli no save wanem samting oli mas mekem long fas man we i brekem loa blong Sabat?—Namba 15:32-36.

 Rong tingting: Sabat i wan kontrak blong olwe, taswe yumi mas kipim yet.

 Trutok: Taem sam Baebol oli tokbaot Sabat, oli talem se hem i wan “kontrak blong olwe.” (Eksodas 31:16, King James Version) Be Hibru tok we oli tanem i kam “olwe” i save minim tu se “gohed go kasem samtaem long fiuja,” be i no min se i neva save finis. Baebol i yusum sem tok blong tokbaot wok blong ol pris long Isrel, we God i finisim samwe long 2,000 yia finis.—Eksodas 40:15; Hibru 7:11, 12.

 Rong tingting: Ol Kristin oli mas kipim Sabat, from we Jisas i kipim.

 Trutok: Jisas i kipim Sabat from we hem i wan man Jiu, mo oli mas obei long Loa blong Moses stat taem oli bon. (Galesia 4:4) Taem Jisas i ded, kontrak blong Loa, we i minim Sabat tu, i finis.—Kolosi 2:13, 14.

 Rong tingting: Aposol Pol i wan Kristin mo hem i kipim Sabat.

 Trutok: I tru se Pol i go long sinagog long Sabat dei, be hem i no joen wetem ol man Jiu blong kipim dei ya. (Ol Wok 13:14; 17:1-3; 18:4) Folem kastom blong taem ya, hem i talemaot gud nius long sinagog, mo plante taem oli singaot man blong narafala ples blong i kam givim wan tok long ol man we oli joen wanples blong mekem wosip. (Ol Wok 13:15, 32) Pol i prij “evri dei,” i no long Sabat dei nomo.—Ol Wok 17:17.

 Rong tingting: Ol Kristin oli mas kipim Sabat long Sande.

 Trutok: Baebol i no talem se ol Kristin oli mas spel mo mekem wosip long Sande. Ol Kristin bifo oli wok long Sande, olsem ol narafala dei. Buk ya The International Standard Bible Encyclopedia i talem se: “Long ol yia 300 nomo, Sande i stat blong kam wan sabat dei, taem Hedgavman blong Rom, Konstantin, we hem i wan hiten man, i mekem loa se i gat sam kaen wok we ol man oli no mas mekem long Sande.” a

 ?Be olsem wanem long ol vas we oli tokbaot Sande olsem wan spesel dei? I tru we Baebol i talem se aposol Pol i kakae wetem ol narafala Kristin “long fas dei blong wik,” Sande. Be hem i mekem olsem from we long nekis dei, bambae hem i aot long olgeta. (Ol Wok 20:7) Long sem fasin, sam kongregesen oli kasem advaes blong putum sam mane i stap gud “long fas dei blong evri wik,” Sande, blong givhan long olgeta we oli kasem hadtaem. Be hemia wan advaes nomo blong givhan long ol man blong oli yusum gud mane blong olgeta. Oli kipim mane ya long haos blong olgeta, oli no go saksakem wanples long ples blong miting.—1 Korin 16:1, 2.