Tok ya “bon bakegen” i minim stat blong wan niufala frensip bitwin God mo man we i bon bakegen. (Jon 3:3, 7) God i adoptem olgeta we oli bon bakegen blong oli kam ol pikinini blong hem. (Rom 8:15, 16; Galesia 4:5; 1 Jon 3:1) Sem mak olsem ol pikinini we man i adoptem olgeta folem loa, olgeta tu oli ekspiriensem wan jenis, from naoia oli kam pat blong famle blong God.—2 Korin 6:18.

?From wanem wan man i bon bakegen?

 Jisas i talem se: “Sipos man i no bon bakegen, bambae hem i no save luk Kingdom blong God.” (Jon 3:3) So fasin blong bon bakegen i rerem wan man blong i rul wetem Kraes long Kingdom blong God. Kingdom ya i stap rul long heven, taswe Baebol i diskraebem “bon bakegen” olsem wan samting we God i “putumgud i stap long heven” blong pasem long sam man. (1 Pita 1:3, 4) Olgeta we oli bon bakegen, oli kasem wan bilif we i strong gud se ‘bambae oli king mo oli rul’ wetem Kraes.—2 Timoti 2:12; 2 Korin 1:21, 22.

?Olsem wanem wan man i bon bakegen?

 Taem Jisas i stap tokbaot topik ya, hem i talem se olgeta we oli bon bakegen bambae oli “bon long wota mo long tabu spirit.” (Jon 3:5) So tok ya i soemaot se olgeta ya oli baptaes long wota mo biaen oli baptaes long tabu spirit.—Ol Wok 1:5; 2:1-4.

 Jisas nao i faswan man we i bon bakegen. Hem i bin baptaes long Jodan Reva, biaen God i makemaot (o baptaesem) hem long tabu spirit. Yes, tabu spirit i mekem se Jisas i bon bakegen olsem pikinini blong God, we i gat hop blong gobak laef long heven. (Mak 1:9-11) Mo God i mekem hop ya blong hem i kamtru, taem i mekem Jisas i laef bakegen olsem wan spirit man.—Ol Wok 13:33.

 Ol narafala we oli bon bakegen, olgeta tu oli baptaes long wota bifo we oli kasem tabu spirit. a (Ol Wok 2:38, 41) Olgeta ya oli sua fulwan se bambae oli laef long heven, taem God i mekem olgeta oli laef bakegen.—1 Korin 15:42-49.

Rong tingting long saed blong bon bakegen

 Rong tingting: Wan man i save jusum blong i bon bakegen.

 Trutok: Eni man i save gat janis ya blong kam fren blong God mo blong God i sevem hem. (1 Timoti 2:3, 4; Jemes 4:8) Be, God nao i stap jusum olgeta we bambae oli bon bakegen o makemaot olgeta long tabu spirit. Baebol i talem se bon bakegen “i no dipen long samting we man i wantem o long samting we hem i traehad blong mekem, be i dipen long God.” (Rom 9:16) Tok ya “bon bakegen,” samtaem oli tanem i kam “bon i kamaot long heven,” hemia i blong soemaot se fasin blong jusumaot olgeta we oli bon bakegen, “i kamaot long heven,” o long God.—Jon 3:3.