Yes. Hemia sam waes advaes we oli kamaot long Baebol, mo oli halpem plante milian man mo woman blong oli gat wan hapi famle:

1.   Yu mas rejistarem mared blong yu long gavman. Promes we yu mekem long taem blong mared, hem i fandesen we i mekem mared i hapi oltaem.—Matiu 19:4-6.

2.   Soem lav mo respek. Hemia i min se yu mas mekem i gud long hasban no waef blong yu, olsem we yu wantem se hem i mekem i gud long yu.—Matiu 7:12; Efesas 5:25, 33.

3.   Yu no sakem ol strong tok long hem. Yu toktok kaen, nating sipos hasban no waef blong yu i talem no i mekem wan samting we i mekem yu harem nogud. (Efesas 4:31, 32) Ol Proveb 15:1 i talem se: “Sipos yu toktok gud long man we i kros, bambae yu save mekem tingting blong hem i kam kwaet, be sipos yu tok strong long hem, bambae yu mekem hem i kros moa.”

4.   Yu no lego hem. Yu mas laekem tumas hasban no waef blong yu nomo, mo yu mas slip wetem hem nomo. (Matiu 5:28) Baebol i talem se: “Evri man i mas tinghae long mared. Mo i no mas gat wan samting i mekem mared bed i doti.”—Hibrus 13:4.

5.   Trenem ol pikinini wetem lav. Yu mas stretem pikinini blong yu taem hem i mekem wan rong, be yu no mas stretem hem long fasin we i strong tumas.—Ol Proveb 29:15; Kolosi 3:21.