Tok ya “Alfa mo Omega” i go long Jehova God ya we i gat Olgeta Paoa. Tok ya i kamaot tri taem nomo long Baebol.—Revelesen 1:8; 21:6; 22:13. a

 Alfa hem i fas leta blong alfabet long lanwis Grik mo omega hem i laswan leta. Hemia wan lanwis we oli yusum blong raetem haf blong Baebol ya we oli kolem Niu Testeman, we hemia i minim tu buk blong Revelesen. Stret ples we tufala alfabet ya i stap long hem long Grik lanwis, i blong soemaot se Jehova nomo i stat mo i en. (Revelesen 21:6) Longtaem finis i kam, hem i God ya we i gat Olgeta Paoa, mo bambae hem i gohed blong stap olsem God ya we i gat Olgeta Paoa gogo i no save finis. Hem nomo i ‘stap we i stap, mo bambae i save stap oltaem, gogo i no save finis.’—Ol Sam 90:2.

 Baebol i yusum tufala tok ya blong tokbaot Jehova God mo blong tokbaot Pikinini blong hem, Jisas, be mining blong tufala i defren. Traem luk tu eksampol.

•   Long Aesea 44:6 NW, Jehova i talem se: “Mi mi faswan mo mi mi laswan. I no moa gat narafala God, mi nomo.” Long ples ya Jehova i wanem makem se hem nomo i tru God olwe, i no moa gat wan narafala God i stap. (Dutronome 4:35, 39) Hemia nao from wanem tok ya “Mi mi faswan mo mi mi laswan” i gat sem mining nomo olsem “Alfa mo Omega.”

•   Mo tu, tok ya “Faswan [pro’tos, i no alfa] mo tok ya Laswan [e’skha·tos, i no omega]” we i kamaot long Revelesen 1:17, 18 mo 2:8. Long ol vas ya, ol tok raonabaot long hem oli stap tokbaot wan man we hem i bin ded mo biaen i laef bakegen. Taswe ol vas ya oli no stap tokbaot God from we God i neva ded. (Habakuk 1:12) Be, Jisas hem i bin ded mo i laef bakegen finis. (Ol Wok 3:13-15) Hem nao i faswan man we i laef bakegen, i go long heven wetem wan spirit bodi we i no save ded bakegen samtaem, mo hemia nao ples we hem i stap long hem naoia, mo bambae i laef long heven “oltaem gogo i no save finis.” (Revelesen 1:18; Kolosi 1:18) Jisas nao i openem rod blong olgeta man oli save laef bakegen. (Jon 6:40, 44) Taswe hem i laswan man we Jehova stret i mekem hem i laef bakegen. (Ol Wok 10:40) From samting ya, Jisas i stret blong karem nem ya “Faswan mo Laswan.”

 Nogat. Long Revelesen 22:13, man we i toktok i no klia se hem i hu, mo long japta ya, i gat plante man we oli toktok. Profesa William Barclay i tokbaot haf blong Revelesen ya i se: “Ol samting we i hapen long ples ya i no folem wan oda; . . . mo plante taem i no isi nating blong luksave se hu i stap toktok.” (The Revelation of John, Volume 2, Revised Edition, pej 223) Taswe, tok ya “Alfa mo Omega” long Revelesen 22:13, yumi save talem se hemia nem blong sem Man nomo we i tekem taetel ya we yumi faenem long buk blong Revelesen—hemia Jehova God.