Waef i faenemaot se hasban i stap lukluk ol rabis pija long saed blong seks. Hasban i talem sore wetem fulhat blong hem. Hem i promes blong lego rabis fasin ya, mo i tru, hem i lego blong smoltaem. Afta, hem i foldaon bakegen, waef i faenemaot, mo sem trabol i stat bakegen.

 ?Yu yu stap long wan trabol olsem? Sipos yes, yu mas kasem save se fasin ya blong lukluk ol rabis pija i stap mekem wanem long waef blong yu, mo olsem wanem blong lego fasin ya blong olwe. a

Long atikol ya

•  Samting we yu mas save

•  Samting we yu save mekem

•  Sipos hasban blong yu i lukluk ol rabis pija

 Ponografi i save spolem mared. Hem i save mekem waef blong yu i kros mo i no moa trastem yu. b

 Taem hasban i lukluk ol rabis pija, maet waef i harem olsem:

•   Hasban i no stap tru. Sarah i talem se: “I olsem se hasban blong mi i stap slip wetem ol narafala woman bakegen mo bakegen.”

•   Waef i harem se hem i no naf. Wan woman we hasban blong hem i stap lukluk ol rabis pija, i harem se hem i “no naes nating mo i sem.”

•   No moa trastem hasban blong hem. Helen i talem se: “Mi no moa trastem eni samting we hasban blong mi i mekem.”

•   Wari. Catherine i talem se: “Mi wari long rabis fasin blong hasban blong mi gogo samting ya i kam bos long laef blong mi.”

 Blong tingbaot: Baebol i talem se hasban i mas lavem waef blong hem. (Efesas 5:25) ?Yu ting se hem i lavem waef blong hem sipos hem i mekem se waef i gat ol nogud filing we yumi jes tokbaot?

 I no isi blong lego fasin ya blong lukluk ol rabis pija. Stacey i talem se: “Hasban blong mi i lego sigaret, maruana, mo strong dring, be hem i no naf yet blong lego ponografi.”

 Sipos yu yu olsem, ol advaes we i kam biaen i save halpem yu blong lego rabis fasin ya blong olwe.

•   Kasem save from wanem ponografi i nogud. Ponografi i pusum man blong tingbaot hem wan nomo, mo samting we i mekem hem i harem gud. Hemia i spolem ol fasin we oli impoten insaed long mared, olsem lav, tras, mo fasin blong stap tru. Mo tu, man we i lukluk ol doti pija i no soemaot respek long Jehova God we i krietem mared.

   Advaes blong Baebol: “Evri man i mas tinghae long mared.”—Hibru 13:4.

•   Luksave se i fol blong yu. Yu no mas talem se: ‘Sipos waef blong mi i soemaot lav moa, bambae mi no nidim ponografi.’ I no stret blong blemem waef blong yu, hemia wan eskius nomo blong lukluk ol rabis pija bakegen, taem waef blong yu i mekem yu yu harem nogud.

   Advaes blong Baebol: “Ol samting blong traem man i save kam strong long hem taem hem i wantem tumas wan samting, nao samting ya i pulum hem, mo i trikim hem.”—Jemes 1:14.

•   No traem haedem wan samting long waef blong yu. Kevin i talem se: “Evri dei mi askem long waef blong mi sipos hem i ting se mi bin lukluk samting we i no stret. Taem mi mekem olsem, hem i save se mi no stap traem blong haedem samting long hem.”

   Advaes blong Baebol: “Mifala i wantem tumas we oltaem mifala i stap mekem i stret nomo long olgeta samting.”—Hibru 13:18.

•   Gohed blong lukaot gud. Nating se yu lego rabis fasin ya plante yia finis, sam samting i save pulum yu blong gobak long hem. Kevin i gohed se: “Afta we mi bin lego ponografi blong ten yia, mi ting se mi winim fasin ya finis mo mi no moa gat wan problem. Be fasin ya i stap slip insaed long mi, i stap wet long taem we i stret blong pulum mi bakegen.”

   Advaes blong Baebol: “Man we i ting se hem i stap stanap strong, hem i mas lukaot blong bambae hem i no foldaon.”—1 Korin 10:12.

•   Taem filing i pulum yu, wet fastaem. Maet yu no save blokem filing ya we i pulum yu, be yu save jusum sipos yu folem filing ya o nogat. Filing ya bambae i pas, be bambae i pas kwik moa sipos yu lanem blong jenisim tingting blong yu mo putum i go long narafala samting.

   Advaes blong Baebol: “Yufala wanwan i mas save olsem wanem blong bos long prapa bodi blong yufala long fasin we i klin mo i soem ona. Mo yufala i no mas folem fasin blong ol man . . . we . . . oli griri, oli wantem tumas ol rabis fasin blong seks nao oli bitim mak long hem, be oli harem se i no naf yet.”—1 Tesalonaeka 4:4, 5.

•   Stap longwe long ol samting we i save pulum yu blong gobak long rabis fasin ya. Buk ya Willpower’s Not Enough i talem se: “Taem yu stap long wan situesen we i pulum yu, i olsem se yu laetem wan mases. Naoia i nidim smol karsin nomo . . . blong statem wan faea.”

   Advaes blong Baebol: “Yu no letem wan nogud samting i bos long mi.”—Ol Sam 119:133.

•   Yu no mas lusum hop. I save tekem longtaem, maet plante yia, blong waef blong yu i trastem yu bakegen. Be plante kapol oli winim trabol ya finis.

   Advaes blong Baebol: “Man we i gat lav, hem i gat longfala tingting.”—1 Korin 13:4.