“Eni samting we yu wantem, yu jes talem nomo, bambae mi glad blong mekem.” I sua se bambae yu no save talem toktok olsem long wan man we yu no save hem nating, no wan man we maet yu jes stat blong save hem. Be i tru se yu save talem toktok olsem long wan man we yu fren gud wetem hem longtaem finis. Wan man we i fren gud wetem narafala, bambae i glad nomo blong mekem samting we fren blong hem i askem.

Baebol i soemaot se oltaem Jehova i save samting we hem i mekem long ol man we oli wosipim hem, blong oli harem gud. Yu traem tingbaot King Deved. Hem i glad blong fren gud wetem God. Hem i talem se: “Hae God, yu yu God blong mifala. Yu yu mekem plante samting finis blong givhan long mifala. . . . Mi mi no save tokbaot olgeta evriwan, oli plante tumas.” (Ol sam 40:5) Antap long samting ya, Jehova i mekem samting we i soemaot se hem i lavem olgeta we oli no save hem yet. ‘Hem i givim kakae long olgeta mo hem i mekem se oltaem oli stap harem gud.’—Ol Wok 14:17.

Jehova i glad blong givim samting we i mekem man i harem gud, taswe i stret nomo blong olgeta we oli wantem kam fren blong hem, oli mas mekem ol samting we hem “i glad” long hem. (Ol Proveb 27:11) ?Yu yu save mekem wanem, blong God i glad long yu? Baebol i ansa se: “Oltaem yufala i mas mekem ol gudfala fasin, mo yufala i mas givgivhan long yufala, from we ol fasin ya tu i olsem we yufala i stap kilim anamol blong mekem sakrefaes i go long God, we hem i glad tumas long olgeta.” (Hibrus 13:16) ?Hemia i min se, Jehova i glad long yumi taem yumi mekem i gud long narafala mo yumi givhan long olgeta?

Baebol i talem se: “Sipos man i no bilif strong long God, hem i no save mekem God i glad long hem.” (Hibrus 11:6) Yu traem tingbaot, ‘Ebraham i bilif long Jehova’, taswe ol man oli stap singaot hem se, “fren blong God.” (Jemes 2:23) Jisas tu i talem se, yumi mas gat “bilif long God,” olsem nao bambae yumi save harem gud long ol blesing blong hem. (Jon 14:1) Taswe, ?olsem wanem yu save gat bilif, we God i wantem se ol man blong hem oli gat? Blong mekem olsem, oltaem yu mas stadi long Baebol. Nao bambae yu “luksave olgeta samting we God i wantem,” mo bambae yu lanem olsem wanem blong ‘mekem laef blong yu i kam stret gud olsem we God i wantem.’ Mo taem yu gohed blong lanem moa save long saed blong Jehova, mo yu mekem ol samting we yu lanem oli wok long laef blong yu, bambae bilif blong yu i kam strong moa. Antap long hemia, Jehova bambae i kam klosap long yu.—Kolosi 1:9, 10.