JOSEF i harem gud long smel blong ol naesfala flaoa ya, lotus mo sam narafala flaoa we oli gru long wota. I gat wan grup blong ol tredaman, we oli lidim hem i go long ol flat ples klosap long maot blong Nael Reva. Yu traem tingbaot wan laen blong ol man, we oli stap lidim ol kamel blong olgeta folem saed blong wota blong go long wan narafala taon blong Ijip. Samtaem oli sek long ol pijin olsem heron, mo aebis we oli stap long wota ya. Josef i stap tingtingbak long ples blong hem long Hebron, we i stap plante handred kilometa longwe. Be naoia, i olsem we hem i stap long wan narafala wol olgeta.

Yu traem tingbaot ol mangki we oli stap jamjam olbaot mo oli mekem plante noes antap long ol detpam mo ol figtri. Hemia i olsem toktok blong ol man, we Josef i harem taem oli stap wokbaot. Maet hem i traem blong kasem save sam toktok we ol man ya talem, mo hem i lanem ol toktok ya. Hemia from we hem i save se, bambae hem i neva luk ples blong hem bakegen.

Josef i wan yangfala nomo, hem i gat samwe 17 no 18 yia blong hem. Nating se i olsem, hem i kasem ol trabol we oli save mekem ol bigman oli fraet. Ol brata blong Josef oli jalus long hem from we papa blong olgeta i laekem hem moa i bitim olgeta. Ale oli wantem kilim Josef i ded, be afta oli no mekem, oli salem hem long sam tredaman. (Jenesis 37:2, 5, 18-28) Ol tredaman ya oli wokbaot sam wik finis blong go long Ijip. Naoia oli glad we oli glad from we i no longtaem, bambae oli go insaed long taon ya, mo bambae oli kasem moa mane, taem oli salem Josef mo ol narafala samting blong olgeta. ?Wanem i mekem se Josef i gat strong bilif? ?Olsem wanem yumi save mekem olsem Josef, taem yumi kasem ol trabol blong laef? Yes, bambae yumi lanem plante samting long stori blong Josef.

“Nao taem ol laen blong Ismael oli tekem Josef i go long Ijip, oli salemaot hem bakegen i go long wan haeman blong king blong kantri ya. Haeman ya, nem blong hem Potifa, mo hem i kapten blong ol gad blong haos blong king.” (Jenesis 39:1) Ol tok ya, oli givhan long yumi blong tingbaot filing blong wan yangfala, we oli salem hem tu taem. !Hem i olsem wan samting nating nomo! Yu traem tingbaot, Josef i stap folem niufala masta blong hem, we i wan haeman blong king blong Ijip mo oli stap wokbaot i go long ples we Josef bambae i stap long hem. Long rod we oli folem, i gat fulap man mo i gat plante ples tu blong mekem maket.

Taem Josef i kasem niufala hom blong hem, hem i harem se ples ya i no olsem prapa hom blong hem. From we, hem i gruap long wan famle we oltaem oli stap muv long wan ples i go long narafala ples, mo oli slip long ol haos tapolen nomo, mo oli lukaot long ol sipsip blong olgeta. Be long Ijip, ol rijman olsem Potifa, oli gat ol naesfala haos we oli pentem wetem ol naesfala kala. Ol man blong digim graon oli faenemaot se ol man Ijip bifo, oli gat ol naesfala garen, we oli planem ol tri blong mekem sado, mo oli gat ol pul blong wota blong planem ol papiras, lotus mo ol narafala tri we oli gru long wota. Sam haos oli wokem insaed long ol garen, mo oli gat ol vranda we plante win i pas long hem. Long ol haos ya i gat ol bigfala windo blong win i save pas, mo i gat plante rum insaed long hem. I gat wan bigfala rum blong kakae mo i gat ol rum blong ol wokman.

?Olsem wanem? ?Ol samting ya oli mekem Josef i glad? I luk olsem se nogat. Maet hem i harem se hem i stap hem wan nomo. Hem i wan strenja long Ijip, from we hem i no save lanwis blong olgeta, fasin blong olgeta blong putum klos, mo tu hem i no save wosip  blong olgeta. Olgeta oli wosipim plante defren kaen god, oli mekem majik mo ol wok we oli narakaen. Mo tu, oli gat ol narakaen tingting long ded mo laef afta long ded, we oli mekem ol man oli harem nogud. Be i gat wan samting we i mekem tingting blong Josef i stap strong oltaem. Baebol i talem se: “Hae God i stap wetem Josef.” (Jenesis 39:2) Josef i talemaot olgeta tingting blong hem long Jehova. Baebol i talem se: ‘Oltaem God i stap klosap long olgeta we oli stap krae i go long hem.’ (Ol Sam 145:18) ?Wanem samting bakegen we i mekem se Josef i stap klosap long God?

Yangfala man ya i no letem tingting blong hem i foldaon, hem i gohed nomo blong mekem wok blong hem, olsem we hem i naf blong mekem. Jehova i blesem hem, mo i no longtaem niufala masta blong hem i glad long hem. Potifa i luksave se Jehova i stap blesem Josef, mo samting ya i mekem se hem i stap kam rij moa. Sloslo, Potifa i putumap Josef blong i lukaot long olgeta samting blong hem, from we hem i trastem hem.—Jenesis 39:3-6.

Josef i soemaot nambawan eksampol long ol yangfala we oli stap mekem wok blong God tede. Yu traem tingbaot. Taem ol yangfala oli stap long skul, samtaem oli harem olsem se oli strenja nomo. Maet taem oli stap wetem ol narafala we oli mekem sam narakaen samting, taem oli stap long wan ples we i gat plante nogud samting i hapen, mo taem oli stap wetem ol man we oli no gat gudfala tingting long laef. Sipos wan samting olsem i hapen long yu, i gud blong tingbaot se Jehova i no jenis. (Jemes 1:17) Hem bambae i gohed blong stap klosap long olgeta we oli holemstrong long hem mo oli mekem ol samting we hem i glad long hem. Bambae hem i blesem yu, sem mak olsem we hem i mekem long ol gudfala man blong hem.

Ol yia oli pas, mo Baebol i talem se bodi blong Josef tu i stap jenis. Naoia yangfala ya i kam wan man mo “bodi blong hem i naes.” Tok ya i soemaot se i gat denja i stap tu. Naes bodi i save pulum man blong gat nogud tingting.

Josef i tinghevi long fasin ya blong stap tru long narafala. Be woman blong Potifa i no stap tru long man blong hem. Baebol i talem se: ‘Woman blong Potifa i kavetem Josef, nao i askem long hem blong i kam slip wetem hem.’ (Jenesis 39:7) ?Olsem wanem? ?Josef i folem rabis fasin blong woman ya? Nogat. Baebol i soemaot klia se Josef i gat strong tingting blong blokem nogud tingting we ol yangfala man oli gat. Hem i no letem tingting blong woman ya i winim hem, nating se woman ya i rij, mo hem i woman blong wan man we plante man i tinghae long hem. ?Olsem wanem? ?Josef i gat tingting ya se masta blong hem bambae i neva save samting ya? ?Hem i gat tingting ya blong mekem nogud fasin wetem woman ya, blong kasem ol samting we woman ya i gat?

Blong talem stret, yumi no save tingting blong Josef long taem ya. Be ansa we hem i givim long woman ya,  i mekem yumi save klia samting we i stap long hat blong hem. Hem i talem se: “!Nogat! !Mi mi no save mekem olsem! !Yu luk! Naoia, masta blong mi i no trabol long wan samting nating long haos blong hem, from we mi mi stap. Hem i putum mi mi bos long olgeta samting we hem i gat. Mo mi gat raet long olgeta samting long haos ya, stret olsem we hem i gat. Yu nomo yu stap long han blong hem from we yu yu woman blong hem. Sipos mi mi kam slip wetem yu, bambae mi mi mekem i no stret long hem, mo mi mekem sin long fes blong God tu. Hemia i nogud tumas ya.” (Jenesis 39:8, 9) Yu traem tingbaot Josef, taem hem i stap talem ol toktok ya wetem strong tingting. Hem i harem nogud taem hem i tingbaot nogud samting we woman ya i wantem. ?From wanem?

Olsem we Josef i talem, masta blong hem i trastem hem. Potifa i putumap Josef blong i lukaot long evri samting we oli stap long haos blong hem, be woman blong hem nomo i stap long han blong hem. Josef i no wantem spolem masta blong hem, from we masta blong hem i trastem hem. Hem i no laekem rabis tingting blong woman ya. Be i gat wan samting we hem i tingbaot, we i givhan long hem blong no mekem nogud fasin ya. Hemia se, hem i no wantem mekem sin long fes blong God blong hem, Jehova. Papa mo mama blong Josef tufala i tokbaot tingting we God i gat long mared mo fasin blong stap tru long narafala. Jehova i mekem fas mared mo i talemaot tingting blong hem se, man mo woman we tufala i mared, tufala i kam olsem “wan bodi nomo.” (Jenesis 2:24) Olgeta we oli brekem promes ya, oli mekem wan samting we i nogud long fes blong God. Yu traem tingbaot samting we i hapen long ol man we klosap oli spolem woman blong Ebraham, mo woman blong Aesak we i bubu woman blong Josef. Klosap ol man ya oli kasem bigfala trabol. (Jenesis 20:1-3; 26:7-11) Josef i lanem plante samting long stori blong olgeta, mo hem i folem long laef blong hem.

Woman blong Potifa i harem nogud taem hem i harem tok blong Josef. Yu traem tingbaot, we slef ya i no wantem mekem samting we woman blong wan haeman i talem. Mo hem i talem long woman ya se: “!Hemia i nogud tumas ya!” Nating se i olsem, woman ya i gohed nomo blong traem Josef. Taem Josef i daonem flas blong hem, faea blong hem ded, nao hem i harem nogud mo i traem evri rod blong tanem ‘No’ blong Josef i kam ‘Yes.’ Hem i mekem fasin olsem Setan we i traem blong pulum Jisas. Jisas i no letem Setan i winim hem, be Setan i stap wet blong “kambak long hem samtaem.” (Luk 4:13) Ol man we oli gat strong bilif, oli mas gat strong tingting, mo oli mas stanap strong. Hemia samting we Josef i mekem. Nating se fasin ya i gohed olsem “evri dei,” be Josef i stanap strong nomo. Baebol i talem se: ‘Josef i no wantem fasin ya.’ (Jenesis 39:10) Woman blong Potifa tu, i gat strong tingting blong mekem ol fasin we oli pulum Josef blong i slip wetem hem.

Woman ya i luk we ol man blong wok oli aot long haos, mo hem i save se Josef bambae i kam insaed long haos blong mekem sam wok. Taem Josef i kam, hem i mekem sam samting blong traem switim Josef. Hem i holem kot blong Josef, mo hem i talem long Josef se: “!Ale, yu kam! !Yu kam slip wetem mi!” Josef i tekem aksen kwiktaem. Woman ya i holem kot blong Josef, be Josef i tanraon mo ronwe i go afsaed, i lego kot blong hem.—Jenesis 39:11, 12.

Maet yumi tingbaot advaes blong Pol se: “!Yufala i no moa mekem fasin nogud wetem woman!” (1 Korin 6:18) Josef i soemaot nambawan eksampol long ol Kristin tede. Sipos yumi stap long wan taem we klosap yumi mekem nogud fasin wetem ol man, we oli no save loa blong God long saed blong ol nogud fasin. Be hemia i no min se yumi save mekem nogud fasin. !Nogat! Yumi mas tekem aksen kwiktaem, mo yumi mas ronwe.

Trabol we Josef i kasem i bigwan tumas. Woman blong Potifa i kros long Josef, mo hem i wantem givimbak long Josef. Wantaem nomo hem i krae bigwan mo i stap singaot long ol man we oli wok insaed long haos blong hem. Hem i giaman long olgeta se, Josef i fosem hem blong slip wetem hem be hem i no wantem, ale Josef i ron i go afsaed. Hem i holemtaet kot blong Josef blong pruvum tok blong hem, mo i wet long Potifa. Taem Potifa i kambak, hem i talem sem toktok long hem, blong giaman long hem. Hem i talem se, hemia fol blong man blong hem, from i tekem slef ya i kam wok long haos blong tufala. ?Potifa i mekem wanem? Baebol i talem se: “!Hem i kros we i kros!” Hem i tekem Josef mo putum hem long wan kalabus.—Jenesis 39:13-20.

Yumi no gat plante save long saed blong ol kalabus long Ijip, long taem ya. Ol man blong digim graon oli faenemaot se ol stonwol blong ol kalabus ya oli strong gud. Josef i tokbaot ples ya olsem wan hol we i no gat laet long hem, mo we man i no save mekem wan gudfala samting long ples ya. (Jenesis 40:15) Buk blong Ol Sam i tokbaot samting we oli mekem long Josef  taem hem i stap long kalabus. Hem i talem se: “Ol jen oli fasemtaet leg blong hem, mo bigfala aean i holemtaet nek blong hem.” (Ol Sam 105:17, 18) Samtaem ol man Ijip, oli mekem i nogud tumas long ol man we oli putum olgeta long kalabus. Sam long ol man ya, oli pulum han blong olgeta i go biaen long bak blong olgeta, mo oli fasemtaet olgeta. Samfala oli putum jen i goraon long nek blong olgeta. Yu traem tingbaot, Josef i safa blong nating nomo.

I nogat wan samting we i save blokem Josef. Baebol i talem se: “Josef i go stap long kalabus ya.” Hem i spenem plante yia long rabis kalabus ya. * Hem i no save se bambae oli letem hem i fri no nogat. Josef i stap long kalabus longtaem, be ?olsem wanem hem i no letem tingting blong hem i foldaon?

Baebol i talemaot klia se: “Oltaem Hae God i stap wetem hem, i stap blesem hem.” (Jenesis 39:21) Ol strong stonwol blong kalabus ya, ol jen, mo hol ya we i nogat laet, oli no save blokem lav we Jehova i gat long gudfala man ya blong hem. (Rom 8:38, 39) Yu traem tingbaot Josef, taem hem i stap prea mo i stap talemaot ol filing blong hem long Papa blong hem long heven. Mo afta, hem i kasem pis ya we i kam long “God ya we i stamba blong fasin blong givhan.” (2 Korin 1:3, 4; Filipae 4:6, 7) ?Wanem samting bakegen we Jehova i mekem long Josef? Baebol i talem se Jehova i gohed blong givhan long Josef, i se: “Nao bos blong kalabus ya i glad long hem.”

Ol man we oli stap long ol kalabus ya, oli gat ol prapa wok blong olgeta. Mo bakegen Jehova i blesem Josef. Hem i wok had blong mekem evri samting we hem i mas mekem, mo hem i putum ol narafala samting long han blong Jehova. Ale Jehova i blesem hem, i mekem se ol narafala man we oli stap long kalabus, oli gat respek long hem mo oli trastem hem, sem mak olsem taem we hem i stap long haos blong Potifa. Baebol i talem se: ‘Man we i lukaot long kalabus ya, i putumap Josef blong i lukaot long ol narafala man we oli stap long kalabus ya, mo i mekem hem i bos tu long olgeta wok long kalabus ya. Nao bos ya i no moa trabol long ol wok ya, from we Hae God i stap wetem Josef, mo i stap mekem olgeta wok ya we hem i mekem i gohed gud.’ (Jenesis 39:22, 23) !Hemia i mekem Josef i harem gud tumas blong save se Jehova i stap lukaot long hem!

Maet i gat sam nogud samting we oli hapen long laef blong yumi. No maet laef blong yumi i kam nogud wantaem nomo, be nating se sam man oli mekem samting we i no stret long yumi, stori blong Josef, i save givhan long yumi blong gat strong bilif. Sipos oltaem yumi kam klosap long Jehova long prea, yumi holemstrong long ol loa blong hem, mo yumi wok had blong mekem samting we i stret long fes blong hem, hem bambae i blesem yumi. Long saed blong Josef, Jehova i gohed blong blesem hem yet. Bambae yumi luk ol blesing ya long nekis haf blong stori ya.