Smita, i wan mama we i gat 35 yia, mo hem i laef long taon ya Dhaka, long Banglades. * Hem i glad oltaem, hem i gat gudfala fasin mo i kea long ol narafala. Hem i wok had oltaem, mo i wantem givhan long ol man blong oli save God. Ol man oli savegud hem from ol gudfala fasin ya blong hem. Be sore tumas, wantaem nomo hem i kasem wan strong sik, mo sam dei biaen, hem i ded. Ol famle mo ol fren blong hem oli sek bigwan.

Jemes mo woman blong hem, tufala i gat samwe long 30 yia. Tufala tu i gat ol gudfala fasin olsem Smita. Tufala i laef long Niu Yok. Wan dei, taem ples i no kolkol tumas mo i no hot tumas, tufala i go luk ol fren blong tufala long Wes Amerika. Be afta, tufala i no moa kambak. Yes, taem tufala i stap longwe, tufala i aksiden long trak mo tufala i ded. Ol famle mo ol fren blong tufala oli harem nogud tumas.

Evri dei yumi luk ol rabis fasin mo ol man oli stap harem nogud. Ol faet bitwin ol kantri, oli kilim i ded plante man, mo plante ami tu. Plante gudfala man oli harem nogud from raf fasin we narafala i mekem long olgeta. Ol man oli ded long aksiden, oli kasem ol strong sik, nating se oli haeman, oli yangfala, no oli olfala. Disasta i spolem ol gudfala man mo ol rabis man tu. Mo fasin ya blong no laekem narafala laen, mo blong mekem i gud moa long wan man i bitim narafala, i kam antap long evri ples. Ating yu tu yu stap harem nogud from wan long ol trabol ya.

Ol trabol ya oli mekem yumi tingbaot sam kwestin olsem:

• ?From wanem trabol i kasem ol gudfala man?

• ?God nao i stamba blong ol trabol?

• ?Ol man nao oli mekem ol trabol ya, no oli kamaot olsem nomo?

• ?Man i harem nogud from ol samting we hem nomo i mekem, olsem tijing blong Kama i talem?

• ?Sipos God i gat olgeta paoa, from wanem hem i no blokem ol trabol we oli stap kasem ol gudfala man?

• ?Bambae ol trabol mo hadtaem oli finis samtaem?

Blong ansa long ol kwestin ya, fastaem yumi mas save ansa blong tu impoten kwestin: ?From wanem trabol i kasem ol man? ?God bambae i mekem wanem blong finisim olgeta?