Jehova God i mekem plante milian enjel, bifo we hem i mekem man. (Job 38:4, 7) Ol enjel oli wok blong God mo oli gat paoa. Samtaem, hem i sanem olgeta oli kam long wol blong lidim mo protektem ol man blong hem. (Ol Sam 91:10, 11) Tede, oli stap givhan long ol man, blong oli harem gud nius we ol man blong Jisas oli stap talemaot.—Ridim Revelesen 14:6, 7.

?Yumi mas prea long ol enjel blong oli givhan long yumi? Nogat. Prea i wan haf blong wosip, mo wosip ya i go long God nomo. (Revelesen 19:10) Ol enjel oli wok blong God, taswe oli mekem ol samting nomo we God i askem olgeta blong oli mekem. Oli no save mekem samting we yumi askem long olgeta. Taswe, yumi mas prea i go long God nomo, tru long Jisas.—Ridim Ol Sam 103:20, 21; Matiu 26:53.

Ol enjel oli fri blong mekem samting we oli wantem, mo oli save jusum blong mekem gudfala fasin no rabis fasin, sem mak long yumi man. Sore tumas, plante enjel oli jusum blong agensem God. (2 Pita 2:4) Fas enjel we i agensem God hemia Setan. Biaen, sam narafala enjel oli joen wetem hem, mo oli kam rabis. Ale, olgeta long heven oli sakemaot Setan wetem ol rabis enjel ya oli kamdaon long wol, mo oli no moa save gobak.—Ridim Revelesen 12:7-9.

Stat long 1914, trabol mo rabis fasin oli kam plante. Ol trabol oli soemaot se i no longtaem, God bambae i stopem Setan wetem ol rabis enjel, blong oli no moa mekem trabol long wol. Biaen bambae hem i mekem wol ya i kam paradaes.—Ridim Revelesen 12:12; 21:3, 4.