ATING yu yu sapraes taem yu luk kwestin ya long fran pej blong magasin ya. Sam man oli no ting se God i olsem, be plante narafala man tede oli ting se God i stap spolem ol man. ?From wanem?

Sam man we oli luk ol disasta we oli hapen long ples blong olgeta oli askem se: “?From wanem God i letem ol samting olsem oli hapen? ?Hem i no laekem ol man? ?No hem i stap spolem ol man?”

Sam narafala oli askem sem kwestin olsem, taem oli ridim Baebol. Taem oli ridim stori blong Noa mo bigfala wota we i ron long taem ya, oli stap askem se: ‘?From wanem God i kilim i ded ol man ya? ?I tru se hem i stap spolem ol man?’

?Yu yu askem kwestin olsem samtaem? ?No maet yu yu harem se i had blong givim ansa long man we i askem kwestin ya long yu? Nating se i olsem, i gud blong tingbaot wan impoten kwestin we i save halpem yu.

Blong talem stret, yumi no wantem spolem narafala, from we yumi save samting we i stret mo samting we i no stret. Yumi no olsem ol anamol. God i mekem yumi blong “yumi tekem fasin” blong hem. (Jenesis 1:27) ?Tok ya i minim wanem? Tok ya i pulum yumi blong tingbaot se God i mekem yumi blong yumi naf blong soemaot ol fasin blong hem mo ol tingting blong hem long saed blong klin fasin, blong jusum wanem i stret mo wanem i no stret. Ale, sipos yumi no laekem fasin ya blong spolem narafala, hemia i pruvum se God tu i no laekem fasin ya.

Baebol i talemaot klia se God i no laekem fasin ya blong spolem ol man. God i talem se: “Tingting blong mi i hae we i hae, i antap olgeta long tingting blong yufala, mo fasin blong mi i antap olgeta long fasin blong yufala.” (Aesea 55:9) Sipos yumi talem se God i stap spolem ol man, i olsem we yumi stap talem se, tingting blong yumi i hae moa long tingting blong God. Taswe, bifo we yumi talem wan samting olsem, i gud blong tingbaot se from wanem yumi talem olsem. Yumi mas tingbaot kwestin ya se: ?From wanem sam samting we God i mekem, i givim tingting ya se hem i stap spolem ol man? Hemia wan gudfala kwestin blong tingbaot, i bitim we yumi talem se God i stap spolem ol man. Be blong givhan long yumi blong kasem ansa blong kwestin ya, i gud we fastaem yumi faenemaot se taem man i “spolem” narafala man, hemia i minim wanem.

Taem yumi talem long wan man se hem i stap spolem narafala, i olsem we yumi stap talem se tingting we i pusum hem blong mekem wan samting i no stret. Wan man we i stap spolem narafala, hem i glad blong luk ol narafala oli harem nogud, mo hem i no gat sore long olgeta. Taswe, wan papa we i stretem pikinini blong hem, from we hem i wantem spolem filing blong pikinini ya, hem i wan papa we i stap spolem pikinini blong hem. Be wan papa we i stretem pikinini blong hem, from we hem i wantem tijim mo lukaotgud long hem, hem i wan gudfala papa. Taem wan man i mekem wan narakaen samting, plante taem yumi no save from wanem hem i mekem olsem. From samting ya, i isi nomo blong yumi jajem tingting we i pusum hem blong mekem wan samting. Ating samting olsem i hapen finis long yu.

Naoia bambae yumi tokbaot tu samting we i soemaot from wanem sam man oli ting se God i stap spolem ol man. Faswan samting hemia, ol disasta we yumi luk oli stap hapen tede, mo nambatu samting hemia, ol jajmen blong God we yumi ridim olgeta long Baebol. ?Olsem wanem? ?Ol samting ya oli rili soemaot se God i stap spolem ol man?